Éxodo 30 - Biblia Mixe de Quetzaltepec

Ja poom ja nyiwintsë'këntyakn

¹ Oytyun tu'uk yë wintsë'këntyakn, yë'ë myajtunëp yë acacië kepy ets jam tyoyëty yë poom.

² Taxktatsk xy'oytyunëty, tu'kkë'ënux xyaj'ayeny'atëty ets xyajmëjjwiin'atëty tu'kkë'ënux ets xyajkëjxm'atëty mäjtsk kë'ënux, ja nyiwaj tu'ukyë mëët nyämyatsëtëty ja wintsë'këntyakn.

³ Ets xynyikooytya'ajëty mëët yë pu'ts pujxn mëti'ipë nëkëjxy ijtpën ets majktaxkëty ja pya'a ets ja wyajëty ets näjyëtu'un ëpëky yë pu'ts pujxn xytyukpa'awitsëty.

⁴ Pëjkta'ak yë nyitëëyë'ëk aak pu'ts pujxn ma y'awits pa'tkën, mäjtsk xypyëjkta'akëty ma jam mäjtsk ja tyatskën tu'kpa'apë ets nän mäjtsk ma ja wiinkpën ets jap ja kepy yajtijnaxëty mëti'ipë yajtukëëyë'ëkëpën.

⁵ Ya'atë kepy yajtijyën witsë, yë'ë ajë kepy myajtunëp ets ënät xytyukniwitsëty yë pu'ts pujxn.

⁶ Ja potsy ma ja wintsë'kën yajyäkyën jam xypyëjkta'akëty ma yajpaatyën yë wit'atëëytyuk, mëti'ipë jam winkon yajpatpën ma kaaxën mëti'ipë myë'ijtypyën yë käjpxytyu'unën, jëyëjp wyë'ëmëty, maas ëjts näpyaata'anyën mëët mijts.

⁷ Xëmë winjopy yë Aarón tpëjkta'akëty yë poom ets yë'ë jap pa'akxuukëp, jää xëëw tpëjkta'akëty ma ja kutë'kxn tyaj'oyëtën.

⁸ Näyjyëtu'un ko jyënäkyxyëëwajnëty yajtoyëp jää ko näjyëtu'un ja kutë'kxën tjëjpkonëty. Ya'atë jëtu'unpë xëmë yaj'oytyuntëty Wintsën wyintum, tyim itëty jëtu'un kë'ëyxyëëw kë'ëyjyëmëjt.

⁹ Këtii oymyëti'ipë poom xypyëjkta'akëty ma ya'atë wintsë'këntyaknën ets ni yë'ë tsajpmok jam xykyapëjkta'akëty ets ni yë'ë tsatym nyëë jam xykyaxijkxjëtitëty.

¹⁰ Ya'atë wintsë'këntyakn wa'ats mëpaat y'ity mëti'ipë yë Tios yë'ë të yajtuknipëjktaakën, winjëmëjt yë Aarón tukuutsëty yë kupixyny nye'pny, mëti'ipë yajyajkpën ma ja nëë poky yajtukunaxyën, winjëmëjt xykyë'ëyaktëty tu'uk yë wintsë'kën mëti'ipë mnatyukunaxëtëpën mëëtkyëjxm ja mpokyëty ets jëtu'un myajpokywyinmä'kxtëty.

Wi'ix mëpaat ja juukyajtën këtii tyëkoyën

¹¹ Ënät ja Tios ojts tninëjkx ja Moisés ets t'ënëmaay:

¹² Ko xyajpëtë'ëkëty tu'uk yë jaaymyujkën, ma tu'ukjaty ja Israel ja'ay yajkëxja'ayën ja xyëëw, yakëp wäänë oytyiijëty ets yë'ë ja jyuukyajtën tukuyakëty, mëti'ipë ja Tios jä'ä myo'ojëpën, këtiipë tii ëyo'on kyëta'akëty ma jyuuky'ajtënën mëët ko ënäty ja jaaymyujkën myuky.

¹³ Tëkokyë mëti'ipë yajkëxjaaytyën ma ja jaaymyujkën y'ijtyën, ya'atë nëjkx tyaktë ma ja Tiosën: mëkoxk nikonë yë poop pujxn, ya'atë kijpxën yë'ë mëti'ipë jap ijtpën ma tsajptëjkën.

¹⁴ Tëkokyë mëti'ipë ënäty yajkëxjaaytyëpën ma ja jaaymyujkën y'ityën, yë'ë mëti'ipë i'px ja jyëmëjnën ets jëtu'un tyimnëjkxy, aakjëtu'un nëjkx tmo'otë ja Tios ja ayajk ako'onën.

¹⁵ Ko xyaktëty ya'atë m'ayajk m'ako'onënëty ma Tiosën, mëët ko ënäty ja mjuukyajtën jä'ä xytyukniyajktu'utë, ka'ap yë kumeenyjyä'äy ni'ik jyä'ä tyakëty ets ni'ëyoopëja'ay wäänë tkayakëty, aak këëk mëkoxk nikonë ja poop pujxn xyaktëty.

¹⁶ Paaty mijts myajmukëp ya'atë poop pujxn, mëti'ipë ënäty yë Israel ja'ayëty nätyukuyajkëtëpën ets jap xykyë'ëyakëty ma ja wit tëjkën ma ja näpyaatë y'ityën mëët ja Tios. Yë'ë ya'atë Tios tyukja'amyätsëp yë Israel ja'ayëty, mëët ko ënäty ja jyuuky'ajtën tëë tnikëpäjtu'utë.

Ja pujxn kë'ëpujtakn

¹⁷ Ënät ja Tios ojts tmëkäjpxy ja Moisés ets t'ënëmaay:

¹⁸ Oytyun tu'uk yë kë'ëpujtakn, yë'ë pujxn mtuk'oytyunëp mëti'ipë yajtijpën tsuxkpujxn, ma y'ëjxën y'ita'anyën nän pujxn jap mpëjkta'akëp, yë'ëts wa'anëp kë'ëpujtakn, jap nëjkx xypyëjktä'äky itkujky ma ja wit tëjkën ma ja näpyaatë y'ityën mëët ja wintsë'këntyakn ets xyaj'utsëty mëët yë nëë.

¹⁹ Yë Aarón mëët ja myaankëty jap yë nëë tjuutëty ets kyë'ëpuj tyekpyujtëty.

²⁰ Jëtu'un nyäpyuj nyäjyä'ätsëtëty, ko koo jap tyëkëtëty ma ja wit tëjkën ma ja näpyaatë y'ityën mëët ja Tios, näjyëtu'un ko jam yajpaatëty ma wintsë'këntyaknën ets ja wintsë'kën tnino'oka'antëty Tios wintum, jëtu'un'äämpy ka'ap nëjkx y'ooktë.

²¹ Këtiipë y'ooktëty, kopkpëky ko tpujtëty tjä'ätstëty yë kyë'ë tyekyëty. Ya'atë ënä'ämën xëmëkyëjxm y'itëty ma Aaronkën ets ma y'u'unk y'okën.

Ja on mëti'ipë yajtukkënu'kxpën winë

²² Ënät ojts ja Tios tmëkäjpxy ja Moisés ets t'ënëmaay:

²³ Ëxta'a mijts kë'ëm yë aay ujts mëti'ipë pa'akxu'kpën, tëtujk tsim mëti'ipë ni'ik pa'akxu'kpën, tëkëëk tsim yë canelë, tëkëëk tsim yë waxk mëti'ipë pa'akxu'kpën,

²⁴ tëtujk tsim yë casië ets tëkëëk tsim jakujkmën yë olivë on, yë'ë kijpxën myajtunëp mëti'ipë jap ijtpën ma tsajptëjkën.

²⁵ Tëkokyë ya'atë aay ujts xy'apëjkmujkta'ajëty ets xy'oytyunëty tu'uk yë on, mëti'ipë mtukënu'kxëpën oy tii, jëtu'un nëjkx xytyuunk'aty tä tu'uk yë pa'akxu'kpë oytyuunpë tyaj'oyën yë pa'akxu'kpë. Ya'atë jëtu'un on'atëp wa'atspë, mëti'ipë tunëpën ets yajtukkënu'kxëty oytyiijëty.

²⁶ Nëjkxëp xytyuknixijkxy yë wit tëjk ma ja näpyaatë y'ityën ets näjyëtu'un ma ja kaaxën mëti'ipë myë'ijtypyën ja käjpxytyu'unën,

²⁷ ja kaaypyäjn mëët tëkokyë ja y'apëjk y'atu'unën, ja mëj jëëntooytyakn ets tëkokyë jënu'un mëët tyunyën ets ja poom wintsë'këntyakn,

²⁸ ja wintsë'këntyakn ma ja jëyujk yajno'oktën ets tëkokyë jënu'un mëët tyunyën ets näjyëtu'un ma ja pujxn kë'ëpujtaknën mëët ja y'ëjx.

²⁹ Jëtu'un nëjkx xykyënu'kxta'ay ets wa'ats wyë'ëmta'atëty, oy tyimtiijëty pën tii ënäty jam najxp, wa'ats nëjkx wyi'imy.

³⁰ Näy yë'ë ya'atë nëjkx xytyuknixijkxy yë Aarón ets y'u'unk y'ëna'k, jëtu'un nëjkx xykyënu'kxy ets yë'ë tyeety'atëty etsës xymyëtuntëtyës,

³¹ jëtu'un xy'ënëëmëty yë Israel ja'ayëty: Ya'atë on xëmë y'itëty, yë'ë tu'uk yë on wa'atspë, mëti'ipë mëët oy tyimtiijëty yajkënu'kxyën.

³² Këtii oypyënëty xytyukkuja'axtëty ets ni xykyayajkojtëty jëtu'unpë muum ëpëky tä tyaapën. Wa'ats yë'ë, wa'ats yajëkyäpëty oy tyimjëna'ajëty.

³³ Pën muum kë'ëmwinma'any yajkojpy yë on jëtu'unpë tä tyaapë y'ixëtyën, ëkë muum oypyënëty tukuja'axnëtëty; pën ënäty jëtu'un ëtëtspën, kopkpëky ko nëjkx yajjo'otsy ma ja myëkunaax myëkukajpnën.

Yë poom

³⁴ Ënät yë Tios t'ënëmaay yë Moisés: Ijxta'a mëti'ipë pa'akxu'kpën ets tu'knax myäy'atëty: kepy'u'pky, nëë jëyujk pajk oypyë xyuuky jyokyën, poomway ets ja gálbano kepy oypyë xyuuky jyokyën,

³⁵ yë'ë mëët xy'oytyunëty yë poom mëti'ipë oyën ets wa'atspë, yajxon xyëpiinta'ajëty jëtu'un tä tu'uk yë pa'akxu'kpë oytyuunpë tyaj'oyën yë tsooy.

³⁶ Tääts wäänë xymyä'äjëty ooky yajxon ets jam xypyëjkta'akëty winkon ma kaaxë y'ityën, jap ma ja wit tëjkën ma ja näpyaatë y'ityën mëët ja Tios, jap n'antijyës maas jap näpyaata'anyën mëët mijts. Ya'atë on wa'ats y'ita'any ma miitsëtyën.

³⁷ Ni pën mëpaat jëtu'unpë pa'akxu'kpë tkayajkojy ets kë'ëm tyajtunaanpëty. Yë Tios yë jëtu'unpë jyä'ä'ajtyp, paatykyëjxm mëpaat wa'ats xymyëët'aty.

³⁸ Pën jëtu'unpë yë on yajkojpy tä tyaapën ets tyajxuuka'any tyajjoka'any kë'ëm, kopkpëky ko nëjkx yajjo'otsy ma ja myëkunaax myëkukajpnën.