Éxodo 26 - Biblia Mixe de Quetzaltepec

Ja tsajptëjk

¹ Oytyun tu'uk yë tsajptëjk, majkwitsy xyajtunëty yë linë wit awiity, ukywyit, tsu'unk wit ets tsaptswit; jam xykyëxjo'okëty yë tsajpjotmëtë kukäjpxy y'awinax.

² Tëkokyë ya'atë wit atëëytyuk tu'knax mëpaat kyijpxy'atë tuktujk xajpk ja tu'kkë'ënux y'ayeny'atëty ets tu'kxajpk ja tu'kkë'ënux myëjwiin'atëty.

³ Mëkoxk nëjkx xy'axuuymyuky, yajxon xyajnäynyiwitsëtëty ets jatu'kpëky mëkoxk näjyëtu'un xy'axuuymyukëty,

⁴ ets xytyukpa'ajo'okëty yë ëtsi'itjut mëët yë ukypyiity, ma ja mëti'ipë jëyëjp të xy'axuuymyukyën ets näjyëtu'un ma ja wiinkpën.

⁵ Jëtu'un tä ja wit'atëëytyuk ënäty të xy'axuuymyukyën ja mëjëyëjpë ets ja okpë, wëxtyikxy majk yë ëtsi'itjut xyajkojëty ets tu'knax yaj'awijtsmukëty.

⁶ Oytyun näjyëtu'un wëxtyikxy majk yë nyijo'kn aakyë'ë pu'ts pujxn, mëti'ipë mëët yajtuk'ajo'kmuktëty ja wit'atëëytyuk mëti'ipë të yaj'axuuymyukyën ets jëtu'un ja tsajptëjk tu'ukyë ja ijxën tpëkëty.

⁷ Oytyun näjyëtu'un majktu'uk yë po'o'atëëytyuk, aakyë'ë tsajppax nyipo'o myajtuunëp ets yë'ë xytyuknitëyëty ja tsajptëjk.

⁸ Tu'kë'ëyë ya'atë po'o'atëëytyuk aak tu'knax mëpaat kyijpxy'atë; taxtujk xajpk y'ayeny'atëty ets tu'kxajpk ja tu'kkë'ënux myëjwiin'atëty.

⁹ Axuuymyuk tu'kpëky yë wit'atëëytyuk ets näjyëtu'un xy'axuuymyukëty yë wiinkpë e ja mëtëtujkpë ja wit'atëëytyuk yë'ë mnä'äkwinpitëp ets yë'ë wyë'ëmëty wintuuytsyow ma ja wit tëjk ja nyitëjkëtyaknën.

¹⁰ Oytyun näjyëtu'un wëxtyikxy majk yë nyijäänë'ëk, mëti'ipë jam mpëjkta'akëpën ma ja wit'atëëytyuk yaj'ajë'pmukëtyën ets wëxtyikxy majk xy'oytyunëty mëti'ipë jam tunëpën ma ja wiinkpë ja wit'atëëytyukën.

¹¹ Wëxytyikxy myajk näjyëtu'un xy'oytyunëty yë nyi'ajo'kn aakyë'ë tsuxkpujxn ets jëtu'un xyjyo'kmukëty ma ja jäänë'ëkën ets ja wit tëjk jëtu'un tu'ukyë nyämyatsëtëty.

¹² E jä'ä ko yë tëjk atëëytyuk yë nyiwit yenyëty, paaty kujkwä'kxy jap xyajkutëëynyaxëty jëxkë'p'äämpy ma ja Tios ja jyëën tyëjkën.

¹³ Jëtu'un'äämpy nëjkx ja mëjtsajptëjk wyi'imy nituky mëët ja wit mëti'ipë ënäty natëjkëpën, mëti'ipë kutëëynyajxpën pë'aay, jä'ä y'itëty tu'kë'ëtsom tu'kpa'ajatyëty ets näjyëtu'un ja tu'kpa'a.

¹⁴ Oytyuunë näjyëtu'un ya'atë wit tëjk yë nyikäm, aakyë'ë kupixyny ayääkë'ak mtuknikkämëp, mëti'ipë tëë wyatsnën tsapts, ëpëky näjyëtu'un xytyuknikkämëty yë oyjyätypë po'o.

¹⁵ Nipëjktaakë näjyëtu'un kanaak yë kepyjyiity, acacië kepy mëti'ipë jap tunëpën ma tsajptëjkën ets kujkyëty xypyëjktakta'ajëty ets tëywyijtsnëty.

¹⁶ Tu'ukjatypë ja kepyjyiity ya'atë kijpxën myëët'atëp. Jä'ä y'ayeny'atëty tëkëëk xajpk ets tu'kkë'ënux ja kujkm myëjwiin'atëty.

¹⁷ Jam ma kepyjyiity yë pya'ajën mtuktsäjtstu'utëp jam ets jëtu'un yajxon nyätyukjänëtëty, aakjëtu'un xytyuunta'ajëty yë kepyjyiity mëti'ipë tunaanpën ma tsajptëjkën.

¹⁸ Ko ënäty jam xy'oytyuny, i'px ja kepyjyiity xyajkojëty, mëti'ipë mpëjkta'akëpën ëpa'tkë'ëy'äämpy.

¹⁹ Näyjyëtu'un xypyëjkta'akëty yë nyi'ëjx, wëxtyikxy xynyipëjktaakëty, aakyë'ë mtuk'oytyunëp yë poop pujxn ma jam yajxon xyajkëxwa'akëtyën ja kepyjyiity. Tu'ukjaty ja kepyjyiity mäjtskpëky ja y'ëjx yajmo'ojëty ets jëtu'un yajxon ja kepy ta'tspëky nyätyukjänëtëty.

²⁰ Ja anëkëjxytsyowpë yajpaatyën ma tsajptëjkën, nän i'px näjyëtu'un ja nyikepyjyiity xyajkojëty.

²¹ Näyjyëtu'un ja nyi'ëjx wëxtyikxy aak poop pujxn mtuk'oytyunëp, jëtu'un ja kepyjyiity tpëktëty ja y'ëjx mäjtskjatyëty.

²² E ja mëti'ipë jap a'oytsyow yajpatpën, jä'ä ja nyikepyjyiity xy'oytyuunëty tëtujk.

²³ Majkjaty ja kepyjyiity xytyuknipëjktaakëty, mëti'ipë ma tyäkën tunëpën.

²⁴ Ya'atë kepyjyiity yë'ë mëët yë myëku'uk nyäpyaatëtëty jampë këjxm y'ityën. Näyjyëtu'un yaj'oytyunëty ja mäjtskpë ja kepyjyiity ma ja mäjtskpë ja tyäkën

²⁵ Jä'ä tëkokyë nyäpyata'ayë ja kepyjyiity tuktujk ets ja y'ëjx majkmokx tu'uk. Aakyë'ë mëët y'oytyuny'atëty yë poop pujxn, mäjtskjatyëty ja kepyjyiity ja y'ëjx yajmo'ojëty tu'ukjatypë.

²⁶ Oytyun näjyëtu'un mëkoxk yë kepy yë pëkixëtypë, mëti'ipë yajtukmajts'itëpën ja kepyjyiity tu'kpa'a ma tsajptëjkën, aakyë'ë acacië kepy.

²⁷ Mëkoxk ja nyikepy mëti'ipë ja kepyjyiity yajtukjë'pnaxëpën mëti'ipë tunaanpën matsow ja tsajptëjk ja pya'ajën, mëkoxk näjyëtu'un mëti'ipë yajtukjëëpëpën ja kepyjyiity mëti'ipë a'oytsyow tunaanpën.

²⁸ Ja nyikepy mëti'ipë yajtukëëyë'ëkëpën itkujky nyaxëty ma ja kepyjyiityën.

²⁹ Tääts ja kepyjyiity xytyukniwitsëty yë pu'ts pujxn ets xy'oytyuunëty näjyëtu'un yë nyijäänë'ëk ma yajtijnaxëtyën ja nyikepy, mëti'ipë yajtijpën nyipa'tkapë. Tëë ënäty jëyëjp yajwinkooytyä'äy mëët yë pu'ts pujxn.

³⁰ Tääts ënät xyajkojëty ja tsajptëjk, tä të nmo'oyën ja nyi''ijxpät ma ya'atë tun kopkën.

³¹ M'oytyunëp näjyëtu'un tu'uk yë wit mëjpë mëti'ipë y'atëëytyukëpën, kanaak yë y'ujkën tmëët'atëty: ukywyit, tsu'unk wit, tsaptswit ets linë wit awiity; jam xyajkëxkojëty mäjtsk yë awinax jëtu'unpë kyëxë'ëkyën, tä yë tsajpjotmëtë kukäjpxyëty y'awinax käkn mëëtpë.

³² Ënät xy'oytyuunëty näjyëtu'un yë nyijo'kn, jam xykyëxtëyëty ma ja nyixeny ënäty të yajpëjktä'äkyën taxk, aakyë'ë ajë kepy, tä näjyëtu'un xytyukniwitsëty yë pu'ts pujxn ets y'ëjx xy'oytyuunëty oy majktaxkën yë poop pujxn.

³³ Tääts ënät jam xykyëxtëyëty ja atëëytyuk ma ja nyijo'knën, jap jëxkë'ptsow xypyëjkta'akëty ja kaaxë, mëti'ipë myë'ijtypyën ja käjpxytyu'unën; ya'atë wit'atëëytyuk yë'ë yaj'ëwä'kxy'itëp ja wa'atspë ja tëkot mëët ja mëti'ipë ni'ikwa'atsën

³⁴ Tääts ënät xy'akë'ëjëty ja kaaxë, mëti'ipë ënäty jap të xypyëjktä'äkyën ma tëkotën, mëti'ipë yajtijpën tëkot kënu'kxypyë.

³⁵ Pëjkta'ak näjyëtu'un ja kaaypyäjn tëja'ptsow ma wyi'imyën ja wit'atëëytyuk, anëkëjxy'äämpy xypyëjkta'akëty, e yë mëj jëëntooytyakn ëpa'tkë'ëy'äämpy xypyëjkta'akëty, jëtu'un mëët yajxon nyäwyinku'ixëtëty ja kaaypyäjn.

³⁶ Oytyun näjyëtu'un tu'uk yë wit'atëëytyuk mëti'ipë mtuk'atëëytyukëpën, ma jam yajnitëkën yë tsajptëjk. Jä'ä y'ixë'atëty yë nyi'ujkën: uky, tsu'unk, tsapts ets linë wit awiity. Yajxon oy tsuj jyo'oky'atëty.

³⁷ Ets xy'oytyuunëty mëkoxk yë nyikupë aakyë'ë acacië kepy ets xytyukniwitsëty yë wa'ats pu'ts pujxn, mëët yë nyipu'ts pujxnjo'kn ets y'ëjx xy'oytyuunëty oy mëkoxkën, aakyë'ë tsuxkpujxn.