Éxodo 24 - Biblia Mixe de Quetzaltepec

Ma yajnikäjpxyën ja käjpxytyu'unën

¹ Ënät ja Tios t'ënëmaay ja Moisés: Pät jam maas tyam nyajpaata'anyën, mëët yë Aarón, Nadab ets Abihú ets mëjja'aytyëjkëty oy nitëkë'px majkën, mëti'ipë nyimëjja'ay'ajtëpën yë Israel ja'ayëty, najëkämtëkë mtänëtëty ets mnäkyoxtënaaytya'akëtëty.

² Je'eyëp ko mijtsyë atu'uk xymyëwinkonëpës, mëti'ipë mjämyëët'ajtëpën, këtii nëkooyë wyinkontëty, yë wiink ja'ay ka'ap mëpaat pyety mëët mijts.

³ Ënät ojts nyijkxy ets tukmëmëtyaktaay ja naax kajpn ijxtëm ënäty ja Tios të y'ënë'ëmxëtyën ets ijxtëm ënäty winë të tyuk'ëne'emyën, ënät ojts ja naax kajpn tu'ukyë y'ëtsoowta'atë: Oy ëëtsëty jëtu'un ntuntëty ijxtëm ja Tios të tni'ënä'ämën.

⁴ Yë Moisés ojts tjaaypyäjta'ay tëkokyë mëti'ipë ënäty ja Tios të tnikäjpxyën, ko kyomjëpom'ajty, tsojk ojts myä'äypyëtë'kojy ets t'oytyuuny tu'uk yë wintsë'këntyakn jam ma kopk'ëjxën, majkmäjtsk ojts ja tsaa tkoontä'äky jëtu'un ijxtëm ënäty ja Israel ja'ayëty ja tyeety y'apetyën nimajkmäjtskpë.

⁵ Ënät ojts tuk'ëne'emy ja ëna'ktëjkëty ets tyaj'ooktëty ja tsajpkaa ets jä'ä tukwintsë'ëkëtëty ja Tios, jëtu'un'äämpy ja nay'ëëw'oy näykyajpx'oyë tuntëty mëët yë'ë.

⁶ Yë Moisés ojts ja ne'pny tpëky ets jap tpëjktäky ma tu'uk yë mëj'a'ukënën ets ojts tuknixijkxy kujkwä'kxy ja wintsë'këntyakn.

⁷ Tä ojts tu'uk ja noky tkoonë'ëky ma jap myinyën këxja'ay ja aaw ayuk ma ja käjpxytyu'unën ojts tuntën mëët ja Tios, ojts tukwinkukajpxë ja naax kajpn ets y'ëtsoowtë. Nja'akyukëjantëp ëëtsëty mëti'ipë ja Tios të tni'ënä'ämën.

⁸ Ënät ojts ja Moisés ja ne'pny tkëëyi'iky, mëti'ipë ënäty jap ijtpën a'ukënjoty ets ojts tuknixijkxta'ay ja mayjyä'äy, tääts t'ënëmaay: Ya'atë ne'pny yë'ë jëtu'un nyikäjpxyp ja käjpxytyu'unën, mëti'ipë ja Tios të tunyën mëët miitsëty, jëtu'un ijxtëm yap këxja'ay myinyën.

⁹ Tä ojts ja Moisés pyety jam kopkkëjxm mëët ja Aarón, Nadab ets Abihú ets mëët näjyëtu'un nitëkë'px majk ja mëjja'aytyëjkëty mëti'ipë nyimëjja'ay'ajtëpën ja Israel ja'ayëty.

¹⁰ Jam ojts ja Tios t'ixtë mëti'ipë yë Israel ja'ay Tyios'ajtëpën, ojts yë tyeky tyajnaaxkëtä'äky ets jëtu'un yaj'ijxy yë'ë yowë tyukte'empy yë wa'kpäjn mëti'ipë oytyunyën mëët yë tsaa mëktsuxkpë ets jëtu'un tyi'kxy tä tsajp jyäjyën.

¹¹ Tios ka'ap ojts wi'ix tuny ya'atë ja'ayëty, mëti'ipë ënäty mëj'äämpy ijtëpën ma ja nyaax kyajpnën ja Israel, oy ënäty tëë ja Tios tja'ixtë, ojts jam kyäytyë y'uuktë ma ënäty jam yajpaatën.

Moisés yajpaaty jam ma ja Sinaí kopkën

¹² Jëtu'un yë Tios t'ënëmaay yë Moisés: Pät jam ma kopkën, maas ëjts nyajpaatyën ets jamës xy'ëwxitëty, jam nmo'oja'any mäjtsk yë tsaatsetsy maas të nkëxja'ayën yë ënä'ämën tëyajtën mëti'ipë yë Israel ja'ayëty pyatuntëpën.

¹³ Ënät ja Moisés pyëti'ky ets ojts jam pyety ma ja Tios ja kyopkën, ojts pyanëjkxyë ja Josué mëti'ipë ijty xëmë jämyëët'ajtëpën.

¹⁴ Ets t'ënëmaay ja mëjja'aytyëjkëty: Yaa miitsëty m'ëwxitëty, koonëmës nwinpitëty, yaa näjyëtu'un wyë'ëma'any yë Aarón ets Hur mëët miitsëty, ko jää tiijotmay xymyëët'atëty yë'ë mtuk'ëwaanëtëp.

¹⁵ Ko ja Moisés myëtyaktaay, ënät jam pyejty kopkkëjxm ets ja yoots nëma'a jam kyëtäky ma ja kopkupi'tsykën, mëti'ipë ojts yajnitëkoyën.

¹⁶ Yë Tios yë myëj'ajt y'oyajtën ojts jam kyëtä'äky ma ja Sinaí kopkën, tëtujk xëëw ojts jëtu'un y'ity. Ko wyëxtujkxëëwpejtyp täänëm ja Tios ojts tmëkäjpxy ja Moisés jap jokjoty yootsjoty.

¹⁷ Yë Tios yë myëj'ajt y'oyajtën jëtu'un ojts t'ixtë yë Israel ja'ayëty jam kopkkëjxm, tä tu'uk yë jëënën mëti'ipë tsääpyën no'kpën.

¹⁸ Tä ja Moisés ojts jap tyëjkënë yootsjoty ko jam pyajnë kopkkëjxm, jä'ä jam kopkëjxm y'ijty wëxtyikxy xyëëw wëxtyikxy tsyu'um.