Éxodo 22 - Biblia Mixe de Quetzaltepec

Ja nyitëyajtën wi'ix winë yajyajktëkatsëtyën

¹ Ko ënäty pën të twijtske'eky tu'uk yë tsajpkaa, ëkë tu'uk yë kupixyny ets tyaj'ookëty ëkë tookëty. Ko nëjkx tkëpäjnë, jä'ä nëjkx tyajknë mëkoxk ja nyitsajpkaa ja tu'ukpë ënäty të tmeetsyën ets taxk ja nyikupixyny ja tu'ukpë ënäty të tmeetsyën.

² Ko tu'uk yë mä'tspë pën pyaatëtëty ma ënäty jam myeetsyën ets yajtsëtyutëtëty ëkë tyimyaj'ookëtëty, ka'ap ja jëtu'unpë yajnipaye'eyëty, tä tu'uk yë ja'ayën mëti'ipë tsoky yajja'ay'o'kpën.

³ E pën jääts ënäty të y'ooky ma të xyiinyënën, jä'ä nëjkxëp ja yajnipaye'ey. Ja mëti'ipë ënäty të tyony të myeetsyën, kopkpëky ko tkujuuytya'ajëty, ja mëti'ipë ënäty të tmeetsyën. E ko ja meeny tkamëët'atëty mëti'ipë tyukujuyëpën kë'ëm nyätyookëtëty ets jëtu'un tkëpätëty ja mëti'ipë ënäty të tmeetsyën.

⁴ E pën jam ja jyëyujk tmëëtëty ma tyëjkën ets juuky jam tyajtänë, jä'ä nëjkx tkëpäjnë kujkwä'kxy tyajni'ikënëty, oy ënäty yë'ëjëty yë tsajpkaa ëkë krukts ëkë kupixyny.

⁵ Pën yë jyëyujk nyajtsmajtsëp ets nëjkx tyajjë'kxë'ëka'any ets muum tyëkëty ja'ay kyamjoty, ko kyëtyeyëty jä'ä nëjkx tkëpäjnë ja këtyey mëët ja kyë'ëm kam ëkë ja kyë'ëm tsatsymkyam.

⁶ Ko pën yë toyëjëën tyajkä'äkëty ets muum tyoyëty yë tsajpmokam, ëkë mëti'ipë muum nipëjkpety yajpatpën, ëkë mëti'ipë jam je'eyë yoonpnëmën. Ja ja'ay mëti'ipë ënäty të yajtoyëke'ekyën, yë'ë nëjkx tkëpäjta'ay ja pëjktä'äky, mëti'ipë ënäty të wyintëkoyën.

⁷ Pën yë myëku'uk tyukmëët'ajtyp yë wyit myeeny, ëkë oytyiijëty mëti'ipë tsoowpaatyëtyën ets yajmäätsëty jam ma ja jyëën tyëjkën. Ja mä'tspë kwanë ko tkujuuytya'ajëty mëti'ipë ënäty të tmeetsyën ets kujkwä'kxy tyajni'ikëty, pën yajpatp.

⁸ E ko ja mä'tspë kyayajpaatëty, ënät yajwoownëjkxëty Tios wintum ja ja'ay mëti'ipë kutëjk'ajtpën ets yaj'ixëty pën ka'ap yë'ëjëty të tyu'utsy mëti'ipë ja myëku'uk jyä'ä'ajtypyën.

⁹ Pën jyä'äniwäämpy tu'uk yë tsajpkaa, ëkë krukts, ëkë kupixyny, ëkë wit tujkxy, ëkë oy tyimtiijëty, mëti'ipë të tyëko'oyxyëtyën ets y'ëna'anëty ko yë'ë tjä'äjëty, tääpë nimäjtsk yë ja'ayëty mëpaat yajwoownëjkxtë jam Tios wintum ets jam yajnijawëty pën pokykya'ap; e mëti'ipë ënäty pokykya'apën kujkwä'kxy nëjkx tnikujuuypyäjnë ja mëti'ipë ënäty yajtsiptaktëpën.

¹⁰ Pën yë myëku'uk tyukmëët'ajtyp tu'uk yë krukts, ëkë tu'uk yë tsajpkaa, ëkë tu'uk yë kupixyny, ëkë oy tyimtiijëyujkëty ets muum tsyëtyutëty wyintëkoyëty; ëkë wi'ix jyatëty kyëpätëty, ëkë yajmäätsëty ets ka'ap pën t'ixëty.

¹¹ Ja ja'ay mëti'ipë ënäty jëtu'un të y'ëyo'onpaatyën, nëjkxëp tmëëtmëtyä'äky ja kujëyujk ets Tios tyukkajpxpätëp, ko ka'ap ënäty wi'ix ja jëyujk të tuny, mëti'ipë ja myëku'uk tukmëët'ajtëpën. Ja mëti'ipë kujëyujk'ajtpën ja'akyukëp näjyëtu'un ets kyupëkëp tä ënäty yaj'ënëëmën ets ja tu'ukpë ka'ap nitu'kjënu'un tkujuyëty.

¹² E pën tëë tja'ixy ma ënäty jam ja jëyujk yajmeetsyën, kopkpëky ko nëjkx tkujuuyë ma ja jëyujk ja nyiwintsënën.

¹³ Pën tääpë jëyujk ëwa'anjëyujk ënäty të yaj'ookyë ets të tsyu'utsyë, ets ka'ap tkujuyä'äny ja jëyujk'ooky, yë'ë myënëjkxëp ja jëyujk tsu'tstuk jam ma ja kujëyujkën.

¹⁴ Pën y'amëtoopy ënu'kxy tu'uk yë jëyujk ets y'o'kxëtëty, ëkë tsyëtyutëty wyintëkoyëty, ma jam ka'ap yë wyintsën y'ixyën. Ja ja'ay mëti'ipë ënäty të jyëyujk'ënu'kxyën, nëjkxëp tnikëpäjtu'uty ja jëyujk ma ja wyintsënën ko ënäty të tsyëtyuty të wyintëkoy.

¹⁵ E pën jamts ja nyiwintsën y'ixyë, ko tsyëtyutëty wyintëkoyëty, yë'ë ka'ap nitu'kjënu'un tkujuyëty. Pën ja jëyujk je'eyë ënäty të yaj'ënu'kxy, je'eyë nëjkx tmëjuy, mëët ko ënäty të pyutëkëty.

Ja tëyajtën wi'ix mëpaat yë jot winma'any oy yajmëët'atyën ets wi'ix mëpaat yë Tios yajwinkutsë'ëkën

¹⁶ Pën tu'uk ja ye'etyëjk mye'tsyp ja to'oxy'ëna'k mëti'ipë ka'ap yë ye'etyëjk tmëët'atynyëmën ets ka'ap pën yë jyämyëët'ajtpënëm ets t'atsip'atëty ets tmëët'ata'anëty, kwanë ko nëjkx tkuyäky ets mëët pyëkëty.

¹⁷ Oy ënäty ja tyeety ka'ap jyayaka'anyë, ja ye'etyëjk kwanë ko tkuyakëty ja to'oxytyëjk, jëtu'un ijxtëm ënäty ja to'oxy'ëna'k tu'uk yajkukëpetyën mëti'ipë ka'ap ja ye'etyëjk tmëëtsëënënëm.

¹⁸ Këtii xyajwë'ëmëty juuky yë to'oxytyëjk, mëti'ipë kajpxpojkpën, myaj'ookëp ënätyë.

¹⁹ Pën mëët yë jëyujk y'ijtmuky ets jëtu'un tmëët'ataanpëty tä tu'uk yë ye'etyëjkën, ëkë to'oxytyëjkën, yë jëtu'unpë ja'ay nitëjkëyëp ets y'ookëty.

²⁰ Pën myoopy yë wyintsë'kën yë wiink tios, jëtu'un tä jeexyë yi'iyë atu'uk yajmo'oyën yë Wintsën, yë jëtu'unpë ja'ay nän nitëjkëyëp y'ookëty.

²¹ Këtii nëkoo ëxaty xytyimtunëty yë jaaypyo'kxyjyä'äy, yë'ë ja'amyäts ko mijts ojts mjaaypyo'kxy'äty jap Egiptë.

²² Këtii ëxëëk xytyunëty yë ku'ookytyo'oxy ets ku'ooky'u'unk.

²³ Jä'ä ko pën jamëtën ëxaty xytyuny ets t'amëtow tpëjktsowtëty ja putëjk pupäjtën maas ëjtsën, ëjts ninëjkxäämpyës yë'ëjëty etsës mputëkëja'antë.

²⁴ Ets mëët tu'uk yë mëkjoot'an nëjkx mijts nyaj'ook nyajtëkoytyë, jëtu'un tä tu'uk yë ja'ay yajkupuxyën mëët yë tëypyujxn, jëtu'un nëjkx ja ëyo'on wyimpity ma miitsëtyën, ja mto'oxytyëjkëty jä'ä nëjkx ku'ooky wyë'ëmtë ets ja m'u'unk m'ëna'këty jä'ä nëjkx wyë'ëmtë ku'ooky u'unk ku'ooky ëna'k.

²⁵ Pën mtuk'ënu'kxyp yë mmëku'uk yë wit meeny, mëti'ipë ëyoop jotëkoopyën, këtii jëtu'un mnäyajnaxëtëty tä ja'ayën mëti'ipë yajnu'kxpën ets ni yë'ë xykyapatëkëty pën tëë tyaj'u'unk'aty tkayaj'u'unk'aty.

²⁶ Pën tääpë ja'ay mooyëp yë wyit tyujkxy mëët ko ënäty ja wit meeny xytyuk'ënu'kxy, ënätyë jatëkok xymyooywinpijtkojnëty jä'ä xëëw, ma ënäty ka'ap jyajmonyëmën.

²⁷ Jä'ä ko wi'ix nija'awëmëty wä'änxyëp ënäty yi'iyë tu'uk twit'aty, mëti'ipë nätyukniju'uxëpën e ko xykyamo'ojëty ¿tii nëjkx tnatukma'ay? Ko nëjkx xy'amëtoy xypyëjktsoy ja putëjk pupäjtën, yë'ë nëjkxëp mputëkë, jä'ä ko ëjts nnija'apës wi'ix ja'ay pya'ëyoy nyajts'ëyowën.

²⁸ Ka'ap yë Tios nijëna'a xy'ëxëëktijëty ëkë xypyokëty, näjyëtu'un ka'ap nijëna'a xy'ëxëëktijëty ëkë xypyokëty ja mëti'ipë nyikutuunk'ajtypyën yë mnaax mkajpn.

²⁹ Ka'ap xymyëpo'kxëty yë m'ayajk m'ako'onën ets mpëjktä'äky mëti'ipë mmëminëpën ma ëjtsën. Yë m'u'unk mmaay, mëti'ipë ënäty më''ëka'any mëxu'unk'ajtpën, ëjts xymyo'ojëp.

³⁰ Näyjyëtu'un ja më''ëka'anypë tyajja'tyën ja y'u'unk myääy ja mtsajpkaato'oxy, ëkë mtsajppax mkupixyny nëjkx xymyo'oyës. Jyëkyäpëp je'eyë wëxtujk xëëwën myëët'atëtëty yë tyaak, e ma ënäty tuktujk xëëw y'apäjnë, jää xymyooynyëtyës.

³¹ Miitsëty wa'ats mëpaat m'itë maas ëjtsën, këtii xytsyu'utstëty yë jëyujk, mëti'ipë muum ja jëyujk ëxëëk të tyunyën, ëkë të yaj'ookyën, yë'ë tëy mo'otëp yë uk, wä'än tsu'utsy.