Éxodo 20 - Biblia Mixe de Quetzaltepec

Ja majkpë ja ënä'ämën tëyajtën

¹ Ënät ojts ja Tios kyäjpxy ets tnikajpxtaay ya'atë aaw ayuk:

² Ëjts jëtu'un Wintsënajtp, mëti'ipë mijts mTios'ajtypyën, mëti'ipë ojts mjuutyën jap Egiptë, ma ënäty mmëtuny m'ëyoyën.

³ Ka'ap wiinkpë tios xymyëët'atëty ets ënät ëjts xy'ëxtijnëty.

⁴ Ka'ap tii kë'ëm xyajkojëty ëkë xyajnikojtu'utëty mëti'ipë jam tsajpjotm ijtpën, ëkë mëti'ipë naax pa'tkë'pën, ëkë mëti'ipë jap nëëjotyën naaxpa'tkë'pë yajpaatyën.

⁵ Ka'ap jëtu'unpë xywyinkoxtänëty, ëkë xymyëjjaw xyjyäänty jyawëty. Jä'ä ko ëjts jëtu'un mWintsën Tios, mëti'ipë ni'äkë'ajtp ets tmo'oy ja tëytyu'unën ja taak teety ja y'ëxëëktu'un y'ëxëëkkajpxën ma ja u'unk ëna'kën ets ma ja ok'u'unk ok'ëna'kën ets ma ja ok'u'unk ok'ëna'kën ja y'u'unk y'ëna'këty, tëkëëk ets taxk najtskä'äxë paat.

⁶ E mëti'ipës xytsyojkp xyjya'apën ets tpatuny ja n'ënä'ämënës ntëyajtënës, mëj këjääjës yë ntsoky njawë ets winë xëëw winjëmëjt n'oyjyawëja'anyës.

⁷ Ka'ap yë mWintsën Tios yë xyëëw ëëwpäjn kajpxpäjn je'eyë xywya'anëty, jä'ä ko yë'ë ka'ap jëtu'unyë tnayajninaxa'any mëti'ipë ënäty nëkoo ja xyëëw tyuk'ëyë'këpën.

⁸ Mja'amyätsëp xëmë yë po'kxënxëëw ets jää yë Tios xymyëjjaw xyjyäänty jyawëty.

⁹ Tëtujkxëëw mtunëty mye'eyëty ets jää xytyuunta'ajëty mëti'ipë ënäty mtunäämpyën.

¹⁰ E ja mëwëxtujkxëëwpë po'kxënxëëw jäänë, mëti'ipë ja mWintsën Tios yajtukwintsë'ëkëpën. Nitituunk mëpaat xykyatuny jä'ä xëëw, näjyëtu'un yë mmaank, yë mnëëx, yë mtuunpë ye'etyëjkpë, to'oxytyëjkpë; yë mjëyujk ets jaaypyaat jaaypyo'kxy ka'ap mëpaat jää nitituunk tuntë.

¹¹ Jä'ä ko yë Tios tëtujk xëëw ojts t'oytyuny yë tsajp ets naaxwiinyëtë, yë nëëmejy ets tëkokyë mëti'ipë yajpatpën ma yë'ëjëtyën ets ojts pyo'kxy kom wëxtujk xëëw. Jëtu'un'äämpy ojts ja Tios tkënu'kxy yë po'kxënxëëw ets ojts tnikäjpxy ko wya'atsëty.

¹² Mwinkutsë'ëkëp yë mteety mtaak ets jëtu'un jeky mjuuky'atëty yaa naaxwiiny naaxkëjxy, ja juukyajtën mëti'ipë yë mWintsën Tios mmooyëpën.

¹³ Këtii myajja'ay'ookëty.

¹⁴ Këtii xyajwintsë'këntëkoyëty yë pëjkën ukën.

¹⁵ Këtii mtonëty mmäätsëty.

¹⁶ Këtii ëxëëkjaty tëkatsyjyäty xynyikajpx xynyimëtya'akëty yë mjëëky mëku'uk.

¹⁷ Këtii xy'atsojkëty yë mmëku'uk yë jyëën tyëjk, këtii xy'atsojkëty yë tyo'oxytyëjk, këtii xy'atsojkëty yë myëtuunpë kyupëjkpë ye'etyëjkpë, to'oxytyëjkpë ets ni xykya''atsojkëty yë tsyajpkaa ets kyërukts ets tëkokyë ma tmëët'atyën winë.

Yë Israel ja'ayëty tsë'ëkëtë Tios

¹⁸ Nitëkokyë yë Israel ja'ayëty y'ijxtaaytyë ko ojts ja ënääw wëtsuk y'ëti'itsy y'ënä'äny, ko ja pujxnxuxn mëk jyänty xyuxy ets ko ja jëënjok tyajnitujktaay ja tun kopk. Ojts ja ja'ayëty may tsyë'ëkëtë ets ka'ap ojts nëkooyë wyinkontë ma kopkën.

¹⁹ Paaty t'ënëmaaytyë ja Moisés: Mijts ëëts mëëtmëtyaktëk ets npatuntëtyës tëkokyë, mëti'ipë ënäty mnikäjpxypën. Ka'apës ntsoktë ets Tios yë'ë xymyëkajpxtëtyës, jä'ä ko tsojkës xy'ëkyaj'o'ktaaynyëtëty.

²⁰ Tä ja Moisés y'ëtsowëtë: Këtii mtsë'ëkëtë, Tios yë'ë y'ixäämpy wi'ix miitsëty ja jot winma'any xymyëët'atën ets yë'ëkyëjxm xytsyë'ëkëtëty, këtiipë mpokytyuntëty.

²¹ Ja mayjyä'äyëty tam ënäty jëkäm yajpaatë ko ja Moisés tmëwinkoony ja yoots nëma'a mëti'ipë je'eyë akëxë'këpën yëkëm, jam ma ënäty ja Tios yajpaatyën.

Ja wintsë'këntyakn ja nyitëyajtën

²² Ënät yë Tios t'ënëmaay yë Moisés: Jëtu'un xy'ënëëmëty yë Israel ja'ayëty: Miitsëty wa'ats xynyijawëtë, ko ëjts tëëjës jam tsajpjotm nkäjpxy ets miitsëty të nmëmëtya'aktë.

²³ Nitii awinax xykyayajkojtëty, mëti'ipë oytyunyën mëët yë pu'ts pujxn, mëët yë poop pujxn ets xy'ëwtatëty ijxtëm jeexyë ëjts xy'ëwtatën.

²⁴ Paaty yam n'ënëëmëtë ets xy'oytyuntëty tu'uk yë wintsë'këntyakn, yë naax mtukpotstëp ets jamts xymyo'otëtyës yë mjëyujk mtsajpkaajëty ets xynyino'oktëty, jëtu'un'äämpy ntu'unmëty ja nay'ëëw'oy näykyajpx'oyë. Ëjts minaanpës ma miitsëtyën ets nkënu'kxa'antë, oy jëtu'un tyimmaa'atëty maas ënäty ntsokyën etsës ja nxëëw mëj jaanty y'itëty.

²⁵ E pën m'oytyuuntëp yë wintsë'këntyakn mëti'ipë tsaajën, këtii yë'ë xyajtuntëty mëti'ipë tëë yajpuxy yajtsetsyën. Jä'ä ko yë tsaa mëti'ipë tëë yajpuxy yajtsetsyën ka'ap yë y'ëkwa'ats'ajnë ets tu'uk yë wintsë'këntyakn yajtuk'oytyunëty.

²⁶ Yë wintsë'këntyakn ka'ap mëpaat yajwääpy ja nyitënaaypyäjn, këtiipë kyëxë'ëkëty ja mnini'kxëty niwa'ats ko ënäty jam mpatë.