Éxodo 12 - Biblia Mixe de Quetzaltepec

Ëmaayxyëëw

¹ Ënät yë Tios ojts myëtyä'äky mëët yë Moisés ets Aarón ets y'ënëmaayëtë:

² Ya'atë po'o myiny kyëtä'äkyën, yë'ë tu'uk yë po'o mëti'ipë mëj'äämpy mjëkyäptëpën; yë'ë mëti'ipë më''ëka'any timtso'ontakpën, ko yë jëmëjt tsyo'ontä'äky.

³ Jëtu'un xy'ënëëmëty tëkokyë yë Israel ja'ay: Ko ya'atë po'o myajk'anëty, jää nëjkx xyaj'ooktë nitu'ukjaty yë mtsajppaxëty ëkë mkupixynyëty ets nitëkokyë jëtu'un maajaty yë jëën tëjkën.

⁴ E ko ja ja'ayëty nyiwäänë'atëty ma tu'uk ja jëën tëjkën, jyëkyäpëp twowëty ja myëjëën myëtëjk ets ja tuka'any jä'ä mëët tukmuktëty ets tsu'utstëty tukkaytyëty, tu'knax mëpaat tyajwa'kxtë ja tuka'any ja ja'ayëty ijxtëm naje'eyë tukkaytyëtyën.

⁵ Ja jëyujk mëti'ipë nëjkx xyaj'ooktën, yë'ë mëti'ipë ënäty ja jyëmëjt tu'uk të t'apetyën, yä'äypyë ets oypyë mëkpë; oy yë'ë'atëty yë kupixyny ëkë tsajppax.

⁶ Jam xymyëët'atëty ets këwent'aty xyaj'itëty koonëm ënäty ja xëëw tpaaty ma ya'atë po'o myajkmajkts anyën. Tukë'ëyë ja Israel ja'ayëty jää nëjkx tyaj'ooktë ja tsyajppaxëty ëkë kyupixynyëty ko jyënäkyxyëëw'atëty.

⁷ Ja ne'pny nëjkxëp xypyëjkë'ëktë ets yë'ë mëët xytyukkoytyëty ja mtëjk'aawëty, ma ënäty mkaytyën m'uuktën.

⁸ Jä'ä tsu'um nëjkx xytsyu'utstë ja tsyu'utsy tsyä'äy, yë'ë mëët xyjyë'kxtëty ja aay ujts, mëti'ipë ta'amën ets tsajpkääky ka'apë tsyooymyëëtëtyën ets tsäk.

⁹ Nitu'kpoty xykyatsu'utstëty tsuxk ëkë nëëkë'ëw. Tu'kë'ëyë jëyujk tsu'utsy jëtu'unyë jëtu'un xytsyääytya'atëty mëët yë kyë'ë tyeky ets mëët yë kyëpajkëty tyiintsyëty.

¹⁰ Nitii xykyayajwë'ëmtëty komjëpom, pën tii ënäty wë'ëmpën ënätyë xytyimnino'kojnëtëty.

¹¹ Tëë ënäty ja mwit mtujkxy xytyuktëjkënyëtë ets tëë ënäty ja mkë'ëkëty xykyëxjäänëtë mtekykyijxy, jëtu'unyë nëjkx ye'epy mjaakkay mjaaktsu'utstë, jä'ä ko Wintsën jää y'ëmaayxyëëw itaanp.

¹² Näy jä'ä tsu'umës ëjts njëtita'any jap Egiptë winjëën wintëjk etsës nyaj'o'kta'aja'any tëkokyë yë kä'äxkopktëjk maajaty yë jëën tëjkën. Näyjyëtu'unës nyaj'o'kta'aja'any tëkokyë yë jëyujkëty yë kyä'äxkopkëty etsës ntëytyuuntaja'any tëkokyë mëti'ipë tios'ajtëpën Egiptë. Ëjts, mëti'ipë Wintsën'ajtpën, ëjts ënaanp.

¹³ Yë ne'pny yë'ë nëjkx yë mjëën mtëjkëty xytyukkoytyë, yë'ëtsës n'ixëp etsës jëtu'un nijawëty ko ënäty miitsëty jap myajpaatë. Paaty koos ënäty naxy ma ja Egiptë ja'ayëty ja jyëën tyëjkëtyën, maas ënäty nyaj'ooka'anyën tëkokyë ja kä'äxkopktëjk. Ma miitsëtyën nitu'uk pën kya'ookëty, jä'ä ko ja ne'pny jä'äs n'ixëp etsës jëkäm naye'eyëty ja mjëën mtëjkëty.

¹⁴ Ya'atë xëëw yë'ë tu'uk mëj'äämpy itëp, mëti'ipë ja Tios jä'ä yajtukmëjjawëpën ets xëmë jëtu'un nëjkx ja'amyetsy xyaj'itë. Ya'atë xëëw jëtu'un xyaj'itëty tä tu'uk yë ënä'ämënën mëti'ipë xëmë ijtëwëpën. Jä'ä ko yë m'u'unk m'ëna'këty kopkpëky ko nëjkx näjyëtu'un tja'amyätstë.

¹⁵ Ja tsajpkääky mëti'ipë mkaytyëpën ka'ap tii tsooy tmëët'atëty ets wëxtujk xëëw y'itëty. Paaty ma ënäty më''ëka'any tsyo'ontä'äkyën ja mëtu'kxëëwpë, kamaa yë tsooy kyayajpaatëty ma ja mjëën mtëjkëtyën, e pën jëtu'un ja tsajpkääky kyääpy tsooymyëëtpë, ma ya'atë ja wëxtujk xëëwpë ënäty të yajpëjktä'äkyën, nëjkxëp yajjo'otsy ma ja Israel kajpnën.

¹⁶ Jëtu'un ma ënäty tsyo'ontä'äkyën ets ma wyëxtujk xëëwpetyën, wa'ats mëpaat ya'atë xëëw tyunyë jyätyë. Ets näjyëtu'un ma ya'atë wëxtujk xëëwpë yajnikäjpxyën, ni pën mëpaat kyatuny, jääyë nëjkx winë xytyuunkojtë ko ënäty ja mka'ayën m'ukënëty xyaj'oyëja'antë.

¹⁷ Ya'atë xëëw ma ja tsajpkääky xykyäytyën ka'apë tsyooymyëëtëtyën, mtuntëp jëtu'un ya'atë xëëw xëmë ets ja'amyetsy nëjkx xyaj'itë. Jä'ä ko jää ojts miitsëty njuutë jap Egiptë. Ya'atë, jëtu'un yam wyi'imy tä tu'uk yë ënä'ämënën, oy yë'ëjëty yë m'u'unk m'ëna'këty ets m'ok'u'unk m'ok'ëna'këty nëjkxëp tmëjjawëtë ets xyëëwtuntë.

¹⁸ Ko ënäty ja po'o myajkmajtsk'any yë'ë mkaytyëp ja tsajpkääky mëti'ipë ka'ap tsyooymyëëtëtyën, jënäkyxyëëw jëtu'unpë tsyo'onta'akëty; e ko ja po'o y'i'px tu'uk'anëty, jënäkxyëëw nëjkx ja tsajpkääky xyjyaakaytyë.

¹⁹ Ka'ap mëpaat nitu'kjënu'un yë tsajpkääky tsyooy yajpaaty ma mjëën mtëjkëtyën, jëtu'un tyu'uye'eyëty ja xëëw po'o, koonëm wëxtujk xëëw kya'pxëty. Jä'ä ko pën ja tsajpkääky kyääpy tsooymyëët, nëjkxëp yajjo'otsy ma ja Israel ja nyaax kyajpnën, oy yë'ëjëty mëti'ipë Israel ja'ay'ajtpën ets oy tyimyë'ëjëty ja jaaypyaat jaaypyo'kxy.

²⁰ Nitii xykyajë'kxtëty mëti'ipë tsooymyëëtën. Oy maa mtimjyuuky'atëty, nëjkxëp ja jëtu'unpë ja tsajpkääky xykyäytyë mëti'ipë ka'ap tsyooymyëëtëtyën.

²¹ Ënät ja Moisés tmëkajpxmujktaay ja mëjja'aytyëjkëty jampë yajpaatën ma ja Israel kajpnën ets t'ënëmaay: Nëjkx yaj'ooktë tu'uk yë mtsajppaxëty ëkë mkupixynyëty mëti'ipë mtsu'utstëpën ets xynyixëëwtuntëty yë ëmaayxyëëw.

²² Yë ne'pny jap xyaj'axä'kxëtëty ma tu'uk yë tsimën ëkë pokën ets yë'ë mtukpatijë'ëktëp yë kepyxye'enty tu'k'atsumy mëti'ipë xyëëwajtypyën hisopo ets ënät ja mtëjk'aaw xytyukkoytyëty. Ma miitsëtyën ni pën mëpaat kyapëtsëmy tëja'p ma ënäty ka'ap xyiinyënëm.

²³ Ko ja Wintsën jam nyaxëty, mëti'ipë yajja'ay'o'kpën ma ja Egiptë kajpnën, ja ne'pny jä'ä y'ixëp mëti'ipë ënäty jamën ma ja mtëjk'aawëtyën ets jëkäm mnanaxëtëty. Jëtu'un'äämpy ka'ap tjëkyäpëty wi'ix nyatëkëtyën ma ja mjëën mtëjkëtyën ets yajja'ay'ookëty.

²⁴ Ya'atë ënä'ämën kwanë ko xypyatuntëty miitsëty ets näjyëtu'un ja m'u'unkëty m'ëna'këty, jä'ä y'itëty tä tu'uk yë ënä'ämënën winë xëëw.

²⁵ Ko ënäty miitsëty jam të mja'ajnëtë ma ja naaxwiinyëtën mëti'ipë ja Tios mo'ojanëtëpën, jëtu'un tä yë'ë twinwa'anëyën, ya'atë xëëw je'eyëm jam xytyuun'ëtë'ëtstëty.

²⁶ E ko ënäty ja m'u'unk m'ëna'këty jëna'a myajtëwëtë: ¿Tiitën mnixëëwtuuntëp?

²⁷ Tääts nëjkx xy'ëtsowtë: Ya'atë jëyujk yë'ë tu'uk yë wintsë'kën mëti'ipë yajtukmëjja'awëpën yë ëmaayxyëëw ma ja Tios yajmëjjawën. Mëët ko tëkokyë tyaj'o'ktaay ja kä'äxkopktëjk jap Egiptë ets ko ja Israel ja'ayëty jëkäm ja jyëën tyëjkëty yajnanajxtë ma ënäty jap tsyëënëtën Egiptë ets jëtu'un'äämpy ojts tyajtso'oky ja nja'ayajtëmë. Ënät ja Israel ja'ayëty wyintak nyaaxkoowtë ets ja Wintsën tmëjja'aw tjaantyjya'awëtyë.

²⁸ E ënät ojts nyëjkxta'atë ets tuuntë tä ënäty ja Wintsën të tuk'ëne'emyën ja Moisés ets ja Aarón.

Jëtu'un ojts y'ooktë ja kä'äxkopktëjkëty

²⁹ Kujktsyu'um ënäty, ko ja Tios tyaj'o'ktaay ja kä'äxkopktëjk jap Egiptë, ojts y'ooky ja mëj'ënä'ämpë ja myaank mëti'ipë ënäty kä'äxkopkën, yë'ëpaat ojts y'ooktë ja myaankëty ja ja'ayëty mëti'ipë ënäty jap tsumy ijtëpën ets näjyëtu'un ja jëyujkëty ja kyä'äxkopkëty ojts y'o'kta'atë.

³⁰ Ënät myä'äypyëtë'ktaaytyë ja tsu'um ja mëj'ënä'ämpë mëët ja wyintsëntëjkëty ets tëkokyë yë Egiptë ja'ayëty, tääts tyëjkëtyë jëëpyë yaxpë, mëët ko ënäty të y'ooktë ja y'u'unkëty mëti'ipë kä'äxkopkëtyën maajaty ja jëën tëjkën.

³¹ Ënät ja mëj'ënä'ämpë ojts jä'ä tsu'um tmëkäjpxy ja Moisés ets ja Aarón ets t'ënëmaay: Nëjkxtë, winwa'ktutëkës yaa, nitu'kë'ëyë miitsëty Israel ja'ayëty. Nëjkx ëwtatë yë mWintsënëty, ijxtëm të m'ëna'antën.

³² Yajnëjkxta'atë yë mtsajpkaajëty, mtsajppaxëty, mkupixynyëty, jëtu'un ijxtëm xytsyoktën. Jam näjyëtu'un yë Tios xymyënu'kxta'aktëty mëët ëjts.

³³ Yë Egiptë ja'ayëty mëktä'äky t'ënëmaaytyë ja Israel ja'ay ets tsyoontëty jap Egiptë, jä'ä ko jëtu'un ënäty myäytyë tyajtë ko tsojk y'ëk'o'ktaaynyëtëty.

³⁴ Yë Israel ja'ayëty jëtu'unyë ojts tjaakyaj'oyëtë ja tsyajpmok jëtsyëty tsooytyuk ets tukwinpijtë yë wit, tääts nyätyukkejkpyëjkëtë.

³⁵ Ojts t'amëtowtë ja Egiptë ja'ayëty, yë pu'ts pujxn, poop pujxn ets wit tujkxy, jëtu'un tä ënäty ja Moisés të tni'ënä'ämën.

³⁶ Yë Tios yë'ë ënäty näjyëtu'un të tyajkutuky ets Egiptë ja'ayëty mëët yë oyjyot oywyinma'any winë tyaktëty, mëti'ipë ja Israel ja'ayëty y'amëtoowtëpën, jëtu'un'äämpy ojts yë Israel ja'ayëty may'äämpy jap winë tmëpëtsëmtë Egiptë.

Yë Israel ja'ayëty tsyo'onëtë jap Egiptë

³⁷ Jam ojts yë Israel ja'ayëty tsyoontë ma tu'uk yë kajpnën mëti'ipë xyëëwajtypyën Ramsés ets jam jya'ajtë Sucot, jä'ä ënäty ja ye'etyëjktëjk nyiwinë'atë nitëtujk mëko'px, mëti'ipë jyëkyäjpnëp tsyiptuntëtyën. Yë to'oxytyëjkëty ets pi'k'ëna'këty ka'ap ojts yajmëtyowtë.

³⁸ Ojts kanaakpëky yë ja'ay pyanëjkxëtë, wä'än yë'ëjëty yë ka'apë ënäty y'Israel ja'ayëtyën ets janty nimay ojts näjyëtu'un yë tsajppaxëty, kupixynyëty ets jëyujkëty, tsajpkaajëty tyajnëjkxtë.

³⁹ Ka'ap ojts ja ka'ayën ukën oy t'ëknipëjktakënyëtë, jä'ä ko ja Egiptë ja'ayëty mëktä'äky jyänty y'ënëmaayënëtë ets tsyoontëty, paaty ko ënäty jam tu'u'am yajpatnëtë, yë'ë ojts tyajmë'ëkykyojtë ja tsajpmookjëtsy mëti'ipë ënäty ka'ap tsyooymyëëtëtyën ets tkaaytyë.

⁴⁰ Yë Israel ja'ayëty jä'ä ënäty jap të jyuuky'atë Egiptë, taxk mëko'px ja i'px majk jëmëjt.

⁴¹ Jä'ä xëëw ma ojts kyä'pxyën taxk mëko'px ja i'px majk jëmëjt, jä'ä xëëw ojts ja Tios ja nyaax kyajpn tsyo'onë jap Egiptë.

⁴² Yë Tios ojts kë'ëm yë nyaax kyajpn timkyëwent'aty jä'ä tsu'um ets tju'ty jap Egiptë, yë tääpë kootsajtën Tios ojts tjä'äniwa'any, paaty yë Israel ja'ayëty xëmë winjëmëjt ya'atë tsu'um'ajtën tja'amyätstëty ets jëtu'un ja'amyetsy y'itëty u'unk ok.

Ja ëmaayxyëëw ja nyitëyajtën

⁴³ Ënät yë Tios t'ënëmaay yë Moisés ets Aarón: Ya'atë jëtu'un wë'ëmp, tä tu'uk yë ënä'ämënën, mëëtkyëjxm yë ëmaayxyëëw. Nitu'uk mëpaat yë jaaypyaat jaaypyo'kxy tkatsu'utsy yë jëyujk mëti'ipë tëë wyintsë'kën'atyën,

⁴⁴ Yë'ë tëy yë mtuunpë mëti'ipë juy këpety myaj'ijtypyën, jyëkyäpëp tsu'utstëty, e ënät jëtu'un pën yajnatsujk'ëwtijtp ja ye'etyëjkajtën ko myutsk'ajty.

⁴⁵ Yë jaaypyo'kxyjyä'äy mëti'ipë tu'u'am'ajtpën, ëkë mëti'ipë jam mëtuunpën ma miitsëtyën, ka'ap mëpaat ya'atë jëyujk tsu'utsy.

⁴⁶ Jä'ä ko jäpyë tëkoty ma ja mjëën mtëjkëtyën mëpaat xytsyu'utstë, nitu'kpoty mëpaat pën tkamëpëtsëmy ya'atë tsu'utsy mëti'ipë tëë wyintsë'kën'atyën ets näjyëtu'un ja nyipajk ka'ap yajtëj yajwäxëty.

⁴⁷ Nitëkokyë yë Israel ja'ayëty jëtu'un tuntëty.

⁴⁸ Pën tu'uk yë atsënääpyë xyëëwtunäämpy yë ëmaayxyëëw ets jëtu'un yë Tios tmëjjawëja'any, jëyëjp tu'kë'ëyë yë ye'etyëjktëjk yajnatsujk'ëwtitëty yë ye'etyëjk'ajtënëty mëti'ipë ijtëpën ma tyëjkëtyën, täänëm tnixëëwtuntëty ja ëmaayxyëëw. Jä'ä ko jëtu'un ënäty nyajxnë tä tu'uk yë kunaax kukajpnën ma miitsëtyën. E pën ka'ap nyatsujk'ëwtityëty ja ye'etyëjk'ajtënëty, ka'ap tjëkyäpëty tsu'utsëty ja jëyujk'ooky.

⁴⁹ Ya'atë ënä'ämën tunëp ma ja kunaax kukajpnëtyën ets ma ja jaaypyaat jaaypyo'kxyën, mëti'ipë jam tsënaaytyëpën ma miitsëtyën.

⁵⁰ Yë Israel ja'ayëty ojts jëtu'un tuntë tä ënäty ja Moisés ets ja Aarón të y'ënä'ämëtën ja Wintsën.

⁵¹ Jä'ä xëëw ojts ja Wintsën jap tju'tnë Egiptë ja nyaax kyajpn.