Éxodo 11 - Biblia Mixe de Quetzaltepec

Yajnikäjpxy ko ënäty y'o'kta'aja'antë ja kä'äxkopktëjkëty

¹ Tä ja Tios t'ënëmaay ja Moisés: Njaakyajminäämpyës tu'uk yë ëyo'on ma mëj'ënä'ämpën ets ma tëkokyë yë Egiptë ja'ayëtyën. Ko ja jëtu'unpë tyunëtëty jyatëtëty ka'ap nëjkx yë mëj'ënä'ämpë je'eyë m'ënë'ëmxëty nëjkxtë, nëjkxëp kë'ëm mtimnyiminëtë ets nëjkx mënu'kxtä'äky myajtsoonëtë.

² E tyam, ënëëmë nitëkokyë yë Israel ja'ayëty, wä'än t'amëtowtë yë myëjëën myëtëjkëty yë apëjk atu'unën ets oy tyimtiijëty, nëkoo ko tmëët'aty yë pu'ts pujxn.

³ Yë Tios yë'ë ojts kë'ëm tyajkutuky ets Egiptë ja'ayëty janty'oy tjawëtëty yë Israel ja'ayëty. Näyjyëtu'un ënät ja wintsëntëjkëty, mëti'ipë mëët tyuunmuktën ja mëj'ënä'ämpë, jëtu'un tyajnajxtë ja Moisés tä tu'uk yë ja'ayën, mëti'ipë mëj këjää winë tyuunpy kyäjpxypën.

⁴ Ënät ja Moisés t'ënëmaay ja mëj'ënä'ämpë: Jëtu'un yë Tios y'ënä'äny: kujkytsyu'umës naxa'any ma tu'kë'ëyë yë Egiptë kajpnën,

⁵ ets y'ooka'antë yë kä'äxkopktëjkëty maajaty yë jëën tëjkën jap Egiptë, yë'ëpaat yë mëj'ënä'ämpë myaank, mëti'ipë jam ënyääypyën ma kutujktaknën ets yë'ëpaat yë to'oxytyëjk mëtuunpë mëti'ipë jëjtstëpën myaankëty. O'kta'ajantëp näjyëtu'un yë kyä'äxkopkëty yë jëyujkëty.

⁶ Mëj këjää nëjkx yë jë'ëyën yaxën y'ity ma Egiptë kajpnën, jëtu'un tä ka'ap nijëna'a tyunyënëm jyätyënëm ets ka'ap nëjkx nijëna'a y'ëktuun y'ëkjajtënë.

⁷ Ets nëjkxëp näjyëtu'un xynyijawëtë ko yë Tios ëpëky tyaj'ity yë Israel kajpn mëët yë Egiptë kajpn, ma Israel ja'ayëtyën ni'uk kyawoja'any ets ni jëyujk tsajpkaa kyayajnipëtë'ëka'any.

⁸ E ya'atë wintsëntëjkëty nëjkxëp jää xynyimintës ets koxtänë nëjkx kya'atë ets xy'ënëëmëtëtyës: Tun yë mëyajtën, nëjkxtë ets woownëjkxta'atë tëkokyë yë mja'ay. E ëjts ka'apës jää ntsojktsoona'any pën ka'ap ënäty jëtu'un tyunyë jyätyë. Yë Moisés yajxon ënäty të jyoot'anpëky, ko ojts jap tsyo'onë ma ja mëj'ënä'ämpën.

⁹ Ënät ok ja Tios t'ënëmaay ja Moisés: Yë mëj'ënä'ämpë ninu'un tkamëpëka'any yë m'aaw m'ëyuk, e kajts yë wyi'ixëty oy jëtu'un. Ets jëtu'un'äämpy tjëkyäpëty wi'ixtsowës yë nmëjajtën njaakyaj'ijxkojëtëty, mëti'ipës njaaktunäämpyën yaa Egiptë.

¹⁰ Yë Moisés ets Aarón ojts ya'atë mëj'ajtën tyaj'ijxta'ajëtë ma mëj'ënä'ämpën, yë Tios yë'ë ënäty të tuknipëjktaakë ets ka'ap tsojk kyäjpxyjyä'äkyukëty, paatykyëjxm ojts ka'ap tsojk t'ëxmajtsy yë Israel ja'ayëty ets jap tsyoontëty Egiptë.