Ester 1 - Biblia Mixe de Quetzaltepec

Ma ja yajkutujkpë Asuero tu'uk ja ka'ayën ukën tnipëjktaakën

¹ Ya'atë aaw ayuk mëti'ipë yam yajnimëtya'akaanpën, jää ojts tyunyë jyätyë ma yajkutukyën yë Asuero. Jä'ä ënäty tnitänë ja it naaxwiinyëtë mëko'px ja i'px wëxtujk it, tyimtsoony jam India ets jyä'ty Etiopíë.

² Yë kyutujktakn jam ënäty tmëëtëty ma tu'uk kajpn txëëwatyën Susa.

³ Kom tëkëëk jëmëjt ma ënäty yajkutukyën, jää tnipëjktakëy tu'uk ka'ayën ukën. Wa'ats twoowmujktaay ja wintsëntëjk, ja mëti'ipë kutuunk'ajtëpën ets ja tsiptuunpë wintsënëty, maajaty kajpn kajpn yajpaatën, mëti'ipë ënäty të tniwa'aktën ko ja tsip y'ijty,

⁴ ets tyaj'ixa'anyë ja myëj'ajtën kyutujkën, wi'ix kyuwit kyumeenyëtyën ets wi'ix tmëët'atyën ja mëk'ajtën. Ja xëëw jä'ä jyejky tëtujk po'o.

⁵ Ko jëtu'un y'ëkkëjxy y'ëknajxy, ënät wiinkpë ja ka'ayën ukën tnipëjktakëy mëti'ipë jäjkën wëxtujk xëëw. Jam ja xëëw tyuunë tëjk'ëkë'ëm ma ja kutujkëntëjkën. Tëkokyë ja ja'ayëty mëti'ipë ënäty jam tsënaaytyëpën ma ja Susa kajpnën. Wa'ats yajwoowtaaytyë; wä'än yë'ëjëty ja ja'ay mëti'ipë mëj'äämpyën ets ka'apë myëj'äämpyëtyën.

⁶ Ja tëja'aw ojts t'oytyuntë mëët oyëtypë wit atëëytyuk mëti'ipë myëët'ajtypyën wyooxyajtën poop, yëktsuxk ets tsuxk, yë'ë mëët tukkëxuuytyë oypyiity mëti'ipë tyijtëpën linëpiity, tsu'unkpë y'ixëtyën ets yë'ë mëët kyëxjenyëty poop pujxn, yë'ë mëët nyipotsëty yë marmol. Ojts näjyëtu'un tyaj'oyëtë u'unyääypyäjn, aak pu'ts pujxn ets poop pujxn mëët y'oytyunyëty. Ja tëkot jä'ä mëët wyimpotsëty ja tsaa u'unk mëti'ipë të'kxpën jajpën ets tsaa mëti'ipë yajwääpyën poop ets yëk.

⁷ Aak pu'ts pujxn y'a'ukën'ajtëp, tëkatsyjyäty y'ixëty. Ja uuky mayjyajtëp jam, jëtu'un ijxtëm yajnijawë'atyën ma tu'uk yajkutujkpën, ka'ap tii y'ëmaaytyä'äky.

⁸ Ja yajkutujkpë tëë ënäty tnikäjpxy ma ja tyuunpëtëjkën ko këtii pën yajtuk'atsip'atëty ja nëë, ka'ap pën atsip y'uukëty, kë'ëm ja'ay t'ixtëty jënu'un y'uuka'anyën.

⁹ E ja Vasti, ja yajkutujkpë ja kyutëjk, ojts näjyëtu'un tuknipëjktaakë tu'uk mëj xëëw ma twoowtaayën ja to'oxytyëjktëjkëty ma ja yajkutujkpë Asuero kyutujktaknën.

¹⁰ Ja yajkutujkpë Asuero janty'oy ets janty jotkujk nyäjya'awëyë ma wyëxtujkxëëwpejtyën ja xëëw, tëë ënäty y'uuky. Ënät tkejxy ja Mehumán, Biztá, Harboná, Biktá, Abagtá, Zetar ets Carcás, niwëxtujk tkejxy aakyë'ë mëti'ipë tyukjotkujk'ajtypyën,

¹¹ ets nëjkx twowtë ja yajkutujkpë to'oxytyëjk Vasti ets tmëminëty ja kujän mëti'ipë ja yajkutujkpë to'oxytyëjk yajtuuntëpën, jëtu'un ja naax kajpn t'ixëty wi'ix ja yajkutujkpë to'oxytyëjk y'oy tsyujëtyën, jä'ä ko ja yajkutujkpë Vasti janty'oy ënäty kyëxë'ëky.

¹² E ja yajkutujkpë to'oxytyëjk ka'ap tmëmëtooy ja yajkutujkpë Asuero, paaty jyoot'anpëjky. Tä ënätyë ja wyintsëntëjk tyajtëëy tii mëpaat tunyën.

¹³ Ja yajkutujkpë Asuero jä'ä ënäty nyijawëjäämpy wi'ix ja tëyajtën y'ënä'änyën ko ja jëtu'unpë ja jotmay jyää'aty, jëtu'un ënäty jam tuny'atë ko tiijotmay ja yajkutujkpë tpaaty ma yë'ë jyuuky'ajtënën, yë'ë patëtëp tpaye'eytyëty ja ja'ay mëti'ipë nyija'awëtëpën ja ënä'ämën tëyajtën.

¹⁴ Ja ja'ayëty mëti'ipë ënäty tu'ukyë mëët nyäyaj'itëtën ja yajkutujkpë, ja Carsená, Setar, Admata, Tarsis, Merés, Marsená ets Memucán, niwëxtujk y'ijtë, aak mëj'äämpy ënäty yajjëkyäptë jam Media ets Persië. Ya'atë ja'ayëty mëët tu'ukyë tyuntë ja yajkutujkpë jam ma ja nyaax kyajpnëtyën.

¹⁵ Tä ja yajkutujkpë yajtëëwëtë: ¿Wi'ix ja ënä'ämën tëyajtën y'ënä'äny? ¿tii mëpaat yajtuny ko tääpë yajkutujkpë Vasti ka'ap të tpatuny ja n'ënä'ämënës, ijxtëmës ja nkäjpxynyajxpëty të jya'ënë'ëmxëtën?

¹⁶ E jam ma ënäty të myuktën ja mëjja'aytyëjk wintsëntëjk. Ja Memucán jëtu'un t'ëtsooy ja yajkutujkpë Asuero: Yë yajkutujkpë Vasti, ka'ap jye'eyëty të tkäjpxykyumëtoownaxy yë yajkutujkpë Asuero, nän tëë tukxi'iky ja kutuunktëjk mëti'ipëjaty të myintën yaa, ma ya'atë naax kajpnën ets mëti'ipëjaty ënä'ämtëpën ma naax kajpnën mëti'ipë ya'atë kutujkën nyitënääpyën.

¹⁷ Mëti'ipë ja yajkutujkpë Vasti të tunyën, tëë ja tnija'awëtya'atë ja to'oxytyëjktëjkëty, jëtu'un ënät ka'ap ja nyiye'etyëjk t'ëkmëj'ijxnëtëty ets y'ënanëtëty: Yë yajkutujkpë Asuero tëë tjakäjpxynyikexy yë yajkutujkpë Vasti ets jeexyë nyinëjkxyë. Yë yajkutujkpë Vasti ka'ap të tkupëky ets jam nyëjkxëty.

¹⁸ Ja wintsëntëjk ja tyo'oxytyëjktëjkëty, mëti'ipë jam Persië ets Media tso'ontëpën, ko ënät nijawëtëty wi'ix ja yajkutujkpë Vasti të y'ëti'ityën, tyämyë ënät mëët ja nyiye'etyëjkëty tyajkäjpxykyoja'antë, e ko ënät jëtu'un jyatëty kyëpätëty, nipäxëtëjkëmëp ënät ets ka'ap ënät pën xy'oy'ijxmëty.

¹⁹ Pën yë yajkutujkpë y'a'ijxëp ets yajja'ajëty tu'uk yë noky, ma ja'ay yajtuknijawëtëty wi'ix ja ënä'ämën tëyajtën y'ënä'änyën ets jëtu'un jap wyë'ëmëty këxja'ay nokyjoty ma ja Medë ja'ay Persië ja'ay yajtuknijawëtën ko: Ja yajkutujkpë tyo'oxytyëjk Vasti, ka'ap nijëna'a t'ëkwinkuwa'kënëty ja yajkutujkpë. Ets ma yajtijyën yajkutujkpë nëjkxëp yajpëjkë jëtu'unpë ja xëëw ets yajmo'ojëty wiinkpë to'oxytyëjk.

²⁰ Ya'atë ënä'ämën tëyajtën kopkpëky ko ja'ay tnija'awëtya'atëty maajaty ja ënä'ämën kutujkën yajmëët'atyën ets jëtu'un ja to'oxytyëjktëjk nijawëtëty wi'ix twinkutsë'ëkëtëtyën ja nyiye'etyëjk oy tiituunk timyajnëjkxëty.

²¹ Ja Memucán ja wyinma'any oy ojts ja mëjja'aytyëjk tmëtowtë, e ja yajkutujkpë ojts jëtu'un tuny,

²² ojts tnajtskäjxëtyä'äy ja noky xiitsow yaatsow, kajpn kajpn, kanaakpëky ja noky ojts tyajkojtë, tu'ukjaty aakjëtu'un jyä'äyëty tä ja ja'ay kyajpxtën ets jya'atën, ja noky jëtu'un y'ënä'äny: ko ja ye'etyëjktëjk yë'ë patëtëp y'ënä'ämtëty ma ja jëën tëjkën ets jëtu'un mëpaat tii yajtuny ijxtëm yë'ë y'ëna'antën.