Efesios 1 - Biblia Mixe de Quetzaltepec

¹ Ëjts Pablo, Jesukristë y'ayuk kajpxwa'kxpë mëët ko ja Tios jëtu'un të tuknipëjktaakë. Yë'ëjës ya'atë noky ntuknikäjxtëp mëti'ipë ja Tios jä'ä''ajtëtëpën ets myëpëjktëp ja Kristë Jesús jam Éfeso.

² Wä'än ja nTeety'ajtëm Tios ets ja Wintsën Jesukristë mmo'ojëtë ja kënu'kxën ets ja jotkujk'ajtën.

Tios ja tyuunk mëti'ipë yajnitsokpën

³ Mëjjaw jaantyjawë nyäxy ja Tios, mëti'ipë yë Wintsën Jesukristë Tyeety'äjtypyën. Tëë xykyënu'kxëmë ko tu'ukyë nyajpatëmë mëët ja Kristë ets të xytyuknikäjxëmë ja kyënu'kxën ma y'ityën tsajpjotm.

⁴ Tios të xywyin'ijxëmë ko ja Kristë të nmëpëjkëmë naamka'anëm ënäty ja naaxwiinyëtë tsyo'ontä'äkynyëm ets jëtu'un wa'ats n'ijtmëty wyintuuy mëët ja tsyojkën jya'awën.

⁵ Tëë ënäty tuknipëjktaakë ko ja Jesukristë mëët xy'u'unkniwa'ana'anëmë, jëtu'un ijxtëm ënäty të tmëmay të tmëtajyën ko ja oyjyot oywyinma'any jëtu'un tmëëtëty.

⁶ Paaty xëmë ja Tios nmëjja'aw njaantyja'awëmë jä'äkyëjxm ko ja mëjmëyajtën të xynyamo'oyëmë mëët ja y'u'unk, mëti'ipë ni'ik tsyojkpyën.

⁷ Mëët yë'ë ko xytsyojkëmë tëë ja Tios xyaj'ëwaatsëpëtsë'emëmë ko ja y'u'unk ja nye'pyny të tsyuny të xye'kxy ets ja npoky'ajtëm të xynyimä'kxëmë.

⁸ Jëtu'un ja Tios tyaj'ixyë ja tsyojkën ko xymyo'oyëmë tu'kë'ëyë ja wijyajtën kejyajtën,

⁹ ets të xytyuk'ijxëm ja wyinma'any mëti'ipë ijty ka'ap yajnijawën wi'ix të tuknipëjktaakën tyajwintu'upëka'any mëët ja Kristë.

¹⁰ Jatëp jëtu'un wi'ix të tuknipëjktaakën ko ja xëëw tpaatëty ets tukë'ëtëjkëtya'aja'any ja Kristë mëti'ipë tsajpjotm ijtpën ets mëti'ipëjaty ijtpën naaxwiiny.

¹¹ Tiosës të xywin'ixy etsës ja kuma'ayën n'ëxajëty ko ja Kristë mëët n'ityës, jëtu'un ijxtëm të tuknipëjktaakën yë Tios mëti'ipë tu'kë'ëyë winë tyuunpyën ijxtëm tsokyën.

¹² E tëë ja Tios jëtu'un tuny ets jëwyiin ja Kristë nmëpëjkmëty ets njuuky'ajtmëty wi'ix mëpaat ja Tios mëjjaw jaantyjawë y'ityën ja myëj'ajt y'oyajtën.

¹³ Yajkukajpxëp ja Kristë, näjyëtu'un miitsëty ko të xymyëtowtë ja mëtëypyë ja aaw ayuk, oy aaw oy ayuk mëti'ipë yajnitsokpën ets xymyëpëjktë, jëtu'un ojts miitsëty mwë'ëmtë tä tii yajtsa'ayën mëët ja Tios ja jyot myëjaaw ets yë'ë mjä'ä'ata'anëtë.

¹⁴ Ya'atë Kënu'kxymyëkajtën yë'ë yajnikëxë'kpy ko xypyaat'ajtëmë ja kuma'ayën mëti'ipë ja Tios yakäämpyën, ko ënäty ja mëtëypyë ja nipaye'eyën të tyajkä'pxy ets të xykyajpnniwa'anëm, jëtu'un ni'ëmukë ja Tios nmëjja'aw njaantyja'awëmëty ko tmëët'aty ja myëj'ajt y'oyajtën ets ja kyutujkën.

Tsajpkäjpxy ma yajkënu'kxta'aktën yë mëpëjkpëtëjkëty

¹⁵ Paaty koos nnijawë ko miits xymyëët'atë ja mëpëjkën ma ja Wintsën Jesúsën ets ja tsyojkën jya'awën mëti'ipë myëët'ajtypyën ma ja nyaax kyajpnën wa'atspë,

¹⁶ xëmës ja Tios nkukajpxë mëët miitskyëjxmëty, nja'amyätstë koos ja Tios nmëkäjpxy.

¹⁷ N'amëtoopyës ja Tios ja myëj'ajt jyääntyajtën mëët ja Wintsën Jesukristë ets mmo'ojëtëty ja Kënu'kxymyëkajtën mëti'ipë yäjkpyën ja wijyajtën kejyajtën, ets yajxon xynyijawëtëty ja mëti'ipë Tios'ajtpën.

¹⁸ N'amëtoopyës ja Tios ets mtukja'akyukëtëty ja oypyë mëti'ipë mjëjp'ijxtëpën, ja oypyë tsujpë kuma'ayën mëti'ipë ja Tios të mtukniwoowtsowëtën ets mmo'oja'anëtë ma mnaax'at mkajpn'atëtën,

¹⁹ ets näjyëtu'un xyjyä'äkyukëtëty ko ja Tios ja myëk'ajtën ka'ap kyixy kyäxy, yë'ë tuunp ma ëëtsajtëmën ko nmëpëjkëmë. Ya'atë mëk'ajtën nän yë'ë mëti'ipë Tios ojts tyaj'ixyën mëët ja kutujkën

²⁰ ko ja Kristë ojts tyajjuukpyiky ets tyajtsajpejty ets tyajnaaxwe'tsy y'aka'any'äämpy,

²¹ ojts tpëjktä'äky ets tnikopk'atëty tu'kë'ëyë ja ënä'ämën kutujkën, mëk'ajtën ets ma tu'kë'ëyë mëti'ipë jää'ajtëpën, ma tyampën ets mëti'ipë miimp këtakpën.

²² Kristë tyukkë'ëtëjkëy ets tnitënaaytya'ajëty tu'kë'ëyë winë ets nän yë'ë ojts tukë'ëtëkë ja mëpëjkpëtëjk ets tnikëpajk'atëty.

²³ Yë Kristë mëti'ipë myëët'ajtypyën tu'kë'ëyë winë, yë'ë tu'kë'ëyë nyitënaaytyääpy ja mëpëjkpëtëjk, mëti'ipë ijtëpën ijxtëm jeexyë jam yajpaatën ma ja Kristë ja nyi'kx kyopkën.