Daniel 4 - Biblia Mixe de Quetzaltepec

Ma ja Nabucodonosor pyojën

¹ Ëjts Nabucodonosor, ntsojkpyës ets jyää'atëty jotkujk'ajtën, oy juukyajtën ma nitëkokyë ja'ayëtyën mëti'ipë naax tsënaay kajpn tsënaaytyëpën, ma wiinkëtypë naax kajpnën ets ma tëkokyë naaxwiinyëtën mëti'ipë wiink ayuk kyajpxtëpën.

² Ntsojkpyës ets miitsëty xynyijawëtëty wi'ix yë Tios Ni'ik Këjxmëpë tii winë tunyën ets wi'ix winë mëj këjää të tunyën ma ëjtsën.

³ Tëë yë myëj'ajtën tyaj'ixyë mëjwiin këjää. Xëmëkyëjxm y'ita'any yë kyutujkën ets y'ënä'ämën ijtëwaanp yë tu'kjuuky tu'kkä'äx.

⁴ Ëjts Nabucodonosor, jotkujkës ënäty jam njuuky'äty maas yë nkutujktaknën ets nitiijës ënäty nkamëmay nkamëtajy.

⁵ Ets tëkok ojts jyäty kyëpety, koots, ko'knääpyës ënäty koos ojts nwinkuma'ay, nëkooyës ojts ntsë'kënë. Jä'ä ko atsë'ëk ajawës ojts nwinkuma'ay.

⁶ Ënätës nikajpxëtyääy ja wijyjyä'äytyëjk mëti'ipë yajpatëpën ma Babilonyë kajpnën, etsës xytyukmëmëtya'aktëty wi'ix ja nkuma'ayës nyiwijyën.

⁷ Tä myiintaaytyë ja wijyjyä'äytyëjkëty, ja xëëwmääpyëtëjkëty ja najtsja'apëtëjkëty ets tëkokyë ja ijxpëkyjyä'äytyëjkëty, ënätës ntukmëmëtyaktaaytyë ja nkuma'ayës, je'eyëp ko ka'ap ojts tmëwinma'aypyaatë wi'ix nyiwijyën.

⁸ Ok yë Daniel myiiny, mëti'ipë näjyëtu'un yajtijpën Beltsasar jä'ä ko jëtu'unës yë ntios txëëwaty, yë Daniel jëtu'un yë jyuuky'äty ijxtëm yë tios tsokyën mëti'ipë wa'ats ijtpën, e tëëtsës ja nkuma'ay ntukmëmëtyä'äky:

⁹ Mijts Beltsasar, mëti'ipë nyiwintsën'ajtypyën yë wijyjyä'äytyëjkëty, wa'atsës nijawë ko mijts Tios mnë'ëwinwoow mtu'uwinwoowëp ets mnija'awëtyääpy mëti'ipëjaty tsipën. Mëtoow'it mëti'ipë nwinkuma'ayën ets xytyukmëmëtya'akëtyës wi'ix nyiwijyën.

¹⁰ Jëtu'unës të nwinkuma'ay maas ënäty nma'ayën: Jam naaxjotm jam tu'uk yë mëj kepy tyänën këjxm.

¹¹ Ja kepy ojts yeeky ets mëj kepy y'awinpijty; yë xye'enty jampaat jyä'ty tsajpkëjxm, jam këjxm wa'ats yajtuk'ijxëtyä'äy ja naaxwiinyëtë.

¹² Oy jyänty yaj'ixy ja y'ääy ets nëkooyë myäy'ajnë, jyëkyejpy ja aayjëyujk ujtsjëyujk jam jyi'kxypyata'atëty. Jam ja jëyujk tpa'tma'a tpa'tpo'kxtë ma nyinikën, ja joon jëyujkëty jëtu'un ja pyä'än jam tjanty y'oytyuntë ma ja kepyxye'entyën ets aak ja yaj'ixy jyi'kxypyata'atëty tëkokyë jënu'un winë jyuuky'ätyën.

¹³ Ënätës ajotkumonë të n'ixy tu'uk kyëtä'äky yë tsajpjotmëtë kukäjpxy,

¹⁴ ets mëk të yajmëtoy y'ënä'äny: Yajkëtawtë tääpë kepy, winpujxta'atë yë xye'enty, yajjënajktaayëtë y'ääy ets ixko'owta'atë yë tyëëm. Wä'än tkäkta'atë yë jëyujkëty mëti'ipë pya'tmaatëpën ma nyinikën ets wä'än tkäkta'atë yë joonëty mëti'ipë jam yë pyä'än të t'oytyuntën.

¹⁵ Yi'iyë kepy kyopk yajwë'ëmtë ets tyikts; yë'ë tuknaaxkutsumëtë yë juunpujxntejpxy ets yëk pujxn ets jam ujtsjotm xy'ëxmatstëty. Wä'än tnimaanikyë ets jëtu'un tyajpaaty tä aayjëyujk ujtsjëyujkën.

¹⁶ Wä'än yë jyot wyinma'any tëkooytyä'äy ets jëtu'un myäyëty tsyajëty jëyujkën ets wëxtujk jëmëjt jëtu'un y'itëty tsuu lokë.

¹⁷ Ya'atë tëytyu'unën të yajnikäjpxy, mëti'ipë yë anklëstëjk këwent'ajtpë të t'awitstën ets tëkokyë naaxwiinyëtë ja'ay nijawëtëty ko yë Tios Ni'ik Këjxmëpë myëët yë mëk'ajtën ma naaxwiinyëtë ja'ay kyutujktaknëtyën, myoopy yë kutujkën yë ja'ay mëti'ipë tyuk'më'a'ijxëpën ets yajwintsën'ajtyp ja ja'ay yu'unkpë naxymyëpë ma ja naax kajpnën.

¹⁸ Jëtu'unës të nwinkuma'ay, ëjts Nabucodonosor yajkutujkpë. E mijts Beltsasar, tuk'ëwa'anëkës ënät wi'ix nyiwijyën, jä'ä ko wijyjyä'äytyëjkëty mëti'ipë yajpatëpën maas yë nkutujktaknën ka'ap të tyajniwijtë; e mijts mayëtëp xyajniwijëty jä'ä ko yë'ë Tios yë myëj'ajt y'oyajtën kënu'kxypyë mtu'uwinwoowëp.

¹⁹ Ënät ja Daniel, tmëmay tmëtajy jeky, natsë'k naja'awëp wäänjaty jä'ä ko kanaak ja wyinma'any jap nyäxy tyëkë kyëpajkjoty. E ëjts yajkutujkpë ënätës t'ënëmaay ja Daniel, këtii nëkooyë xymyëmay xymyëtajy yë nkuma'ayës ets këtii xymyëmay xymyëtajy wi'ix nyiwija'anyën. Ets ja Beltsasar y'ëtsooy: Mon tuk ja yajpaaty ja yajkutujkpë ja myëtsip ma kyëta'aka'anyën ya'atë ëyo'on mëti'ipë yë yajkutujkpë të twinkuma'ayën.

²⁰ Ja mëj kepy mëti'ipë mijts yajkutujkpë të xywyinkuma'ayën, mëti'ipë tsajpjotmpaat ja'ajtpën ma yaj'ijxta'ayën winë naaxwiinyëtë apëtsëmy,

²¹ mëti'ipë janty oyëty ja y'ääyën ets may ja tyëëm ets jyi'kxypyata'atëty tëkokyë mëti'ipë juuky yajpatëpën, ma y'amin y'a'ookëtën ja aayjëyujk ujts jëyujkëty, ma ja pyä'än tpëjkta'aktën ja joonëty,

²² tääpë kepy mijts yë'ë yajkutujkpë, mëti'ipë të yeekyën ets mëk të mëj'äämpy të m'awinpity. Yë mkutujkën tëë yajxon myëjë kyëjääjë jëtu'un tä jeexyë jampaat jyä'tyën tsajpjotm ets m'ënä'ämën tëë jya'ajta'ay naaxwiinyëtë apëtsëmy.

²³ Mijts yajkutujkpë nän tëë xy'ixy ko tu'uk yë tsajpjotmëtë kukäjpxy kyëtä'äky ets y'ënä'äny: Yajkëtawtë tääpë kepy ets yajkutëkoytyë, yi'iyë kepy kyopk myajwë'ëmtëp ets tyikts; ets xykyutsumtëty mëët yë pujxntejpxy mëët yë juunpujxn aats, wä'än jam tyajpaaty aayjoty ujtsjoty. Ets nyimaanikëtëty ets jëtu'un jyuuky'atëty tä aayjëyujk ujtsjëyujkën wëxtujk jëmëjt.

²⁴ Jëtu'un nyiwijy ja Wintsën Ni'ik ja tyijytyu'unën mëti'ipë të tuknipëjktaakën tuna'any ma mijtsën yajkutujkpë.

²⁵ Mijts yajkutujkpë myajwoowpëtsëmaanp ma ja mayjyä'äyën ets myajwoownëjkxa'any jam aayjyotm ujtsjotm ma mjuuky'atëtyën tä aayjëyujk ujtsjëyujk jyuuky'atën; yë'ë m'okëp yë mëëy tä yë tsajpkaa myiiy'okyën ets nëjkxëp yë mjot mnini'kx nyimaanikyë. Jëtu'un nëjkx mjuuky'äty mijts yajkutujkpë wëxtujk jëmëjt, koonëm xynyijawëty ko yë Tios Ni'ik yë'ë myëët'ajtyp yë kutujkën ma tëkokyë yë naaxwiinyëtë ja'ayën ets yë'ë yaj'ëne'empy yajkutujkpy mëti'ipë yë'ë tyuknipëjktakëpën.

²⁶ Yë ënä'ämën mëti'ipë ënaanpën ko wä'än ja tyikts ets ja kepy kyopk tyajwë'ëmtë, jä'ä nyiwijy ko yë yajkutujkpë yajmo'ojaanp jatëkok yë kyutujktakn ko ënäty t'ijxpaaty ets tja'akyukë ko yë Tios yë'ë myëët'ajtyp yë kutujkën.

²⁷ Paaty n'ënëëmë mijts yajkutujkpë ets xypyatunëty tëkokyë mëti'ipë yam ntukwinjawëjäämpyën: mëtëy winë tun ets këtii m'ëk pokytyuunë; ëxmats yë ëxëëktu'un ëxëëk kajpxën ets putëkë yë ëyoopëja'aytyëjk. Jëtu'un jeky mjuuky'atëty ets akujk jotkujk myajpaatëty.

²⁸ Tëkokyë ya'atë aaw ayuk mëti'ipë yajtuknikäjxën yë Nabucodonosor yajkutujkpë ojts tyuunta'ay jyajta'ayë:

²⁹ Tam ënäty tëkok nyäxy tyëkë ma kyëmoontëjkopkën mëti'ipë jamën Babilonyë,

³⁰ ko y'ënäny: Ixtë, nëkooyë yë Babilonyë kajpn myëj'ajnë. Ëjts të nkojy mëëtës yë nkutujkën ets mëëtës yë n'ënä'ämën ets yaj'ixëty wi'ix nmëj'äämpyëtyës.

³¹ Tam ënäty kyajpx ëtë'ëtsynyëm ko jam tsajpjotm yajmëtooy käjpxy y'ënä'äny: Mëtow yajxon mijts Nabucodonosor yajkutujkpë. Yë mkutujktakn ka'ap mijts xy'ëkjä'ä'ajnë;

³² Myajjuutaanp yam ma mayjyä'äyën ets nëjkx mjuuky'äty mëët yë aayjëyujk ujtsjëyujk; wëxtujk jëmëjt m'ujts jë'kxëty tä tsajpkaa y'ujts okyën, koonëm xynyijawëty ko yë Tios Ni'ik mëk yë'ë ets yë'ë y'ënä'ämtääpy yë naax kajpn naaxwiinyëtë apëtsëmy ets yë'ë pyëjktäkpy kë'ëm pën yajkutukëpën.

³³ Jä'ä xëëw ojts jyänty y'atëy ijxtëm ënäty ja kuma'ay të nyiwijyën, ojts ja Nabucodonosor jyänty yajjuuty jam ma ja mayjyä'äyën ets wëxtujk jëmëjt ojts tjë'kxy aay ujts tä tsajpkaajën, ojts ja jyot nyini'kx nyimaanikyë, koonëm ja wyääy yoontäky ets ja kyë'ëxooky jëtu'un ojts yaj'ijxnë tä yë witsnteky xyookyën.

Ma ja Nabucodonosor jatëkok tsyo'okyën

³⁴ Ko ojts ja kyäjpxy ja xëëw jëmëjt jënu'un ënäty të yaj'awitsyën ja tëytyu'unën, ëjts Nabucodonosor ojts mpa'at'ixy tsajpkëjxm etsës näjya'awëypyätë ko tëëtëmës ntso'oky; ënät ojts ja Tios Ni'ik mëti'ipë xëmë juukyajtpën, ojts nmëjjaw njaanty jawës ets nkukajpxës mëët ya'atë aaw ayuk: Yë myëj'ajtën xëmë y'itëty; yë kyutujkën xëmë yajpaatëty najts'ook najtskä'äxë.

³⁵ Ma yë'ëjën nitu'uk yë naaxwiinyëtë ja'ay kyamëkëty. Yë'ë jëtu'un winë tuny tä të tuknipëjktaakën, tsajpjotm ets naaxkëjxy. Ka'ap pën tjëkyepy yë myëk'ajtën tjëjpkuwa'akëty ets ka'ap pën tjëkyepy tyajtëëwinpitëty tii ya'atë xi'itë jëtu'un tuny.

³⁶ Ënät tsokyës ets ja njot nwinma'anyës jatëkok tyëjkëy ets mpatyës jatëkok ja nkutujkënës, nmëj'ajtënës ets ja njotkujk'ajtënës. Ja wintsëntëjkëty, ja ixpëkytyëjkëty ets ja mëti'ipës xy'ëëwij xykyajpxwijtëpën ojts xynyimintë etsës xytyukxoontaktë, jëtu'unës jatëkok ntuuntëjkëy maas ja nkutujktaknën ets ni'ik mëj'äämpyës ojts n'awinpijnë.

³⁷ E tyamts ënät, ëjts Nabucodonosor, nmëjja'aw njaantyjya'apës ets ntukxoontäkpyës yë yajkutujkpë tsajpjotmëpë, jä'ä ko tëkokyë mëti'ipë tyuunpyën aak mëtëy yë'ë ets wa'ats ets yë'ë yajnaaxkëtäkpy yë ja'ay mëti'ipë mëj këjxm näyajnaxanëpën.