Daniel 2 - Biblia Mixe de Quetzaltepec

Ja yajkutujkpë Nabucodonosor ja tsyuu wyinkuma'ay

¹ Ma ënäty mëmäjtsk jëmëjt ja Nabucodonosor yajkutukyën, ojts kanaak ok jää wyinkuma'ay, ja wyinkuma'ay jä'ä tyäty myëmääpy tyäty myëtäjpy paaty ka'ap oy y'ëkmaa y'ëkpo'kxnë.

² Ënät twinwoowmujky kanaak ja këpetyjyä'äytyëjk, najtsja'apëtëjk, kajpxpojkpëtëjk ets ja ijxpëkyjyä'äytyëjk ets tyajniwijtëty ja kuma'ay. Ojts myiinta'atë ja ja'ayëty jam ma ja yajkutujkpën mëti'ipë ojts yajmëkajpxtën,

³ ets y'ënëmaayëtë ja yajkutujkpë: Ëjts tëëjës nwinkuma'ay, yë'ëjës yam nmëmääpy nmëtäjpy jä'ä ko ka'apës oy nja'akyukë tiitën jyatijäämpy.

⁴ Ënät ja wijyjyä'äytyëjkëty ojts t'ëtsowtë ja yajkutujkpë mëët yë arameë ayuk: Mëj'äämpy yë yajkutujkpë y'ity. Tukmëmëtyaktëk ëëtsëty mëti'ipë të xywyinkuma'ayën ets yam myajtuknijawëty tii jëtu'un ja mkuma'ay jyatijäämpyën.

⁵ Ëjts jëtu'unës të ntuknipëjktaakë, jëtu'un ja yajkutujkpë y'ëtsooy: Pën miitsëty ka'ap oy xyajniwijtë ja nkuma'ayës, piw nuuk ënät mjajta'atëty ets ja mjëën mtëjkëty xit ko'ow y'awinpijta'aja'any.

⁶ E pën miitsëty xytyuk'ëwa'anëtëpës wi'ix nyiwijyën yë nkuma'ayës, myajmo'otëp yë näynyamo'ojë ets näykyumayë, ëpëky myajmo'otëty yë mëju'uyënëty. Paaty miitsëty yam n'ënëëmëtë ets xytyuk'ëwaanëtyëtyës wi'ix jëtu'un yë nkuma'ayës nyiwijy.

⁷ Ënät ja ixpëkyjyä'äytyëjk jatëkok y'ëtsoowinpijtë: Tukmëmëtyaktëk ëëtsëty wi'ix jëtu'un yë yajkutujkpë të wyinkuma'ay etsës yam nimëtya'aktëty wi'ix nyiwijyën.

⁸ Ëjts wa'atsës ntyätynyijawë wi'ix miitsëty mëta'aka'antë. Jëtu'un ja yajkutujkpë y'ëtsooy. Jä'ä ko tëë xynyijawëtë wi'ix yam të n'ëna'anyën.

⁹ Paaty n'ënëëmëtë pën miitsëty ka'ap xynyikajpxtë yajxon wi'ix nyiwijyën mëti'ipës të nwinkuma'ayën, miitsëty tu'knax yam xykyumëtowtëty, jä'ä ko jä'ä nëjkx yajja'akyukë ko miitsëty tëë xytyuknipëjktaakëtë wi'ix xywyin'ëëna'antënës.

¹⁰ Ka'ap maa pën naaxwiinyëtë naaxkëjxy yajpaaty. Jëtu'un y'ëtsoowtë ja wijyjyä'äytyëjk, mëti'ipë nyikajpxëpën mëti'ipë Wintsën tsyojkpyën. Näyjyëtu'un ka'ap maa yajkutujkpë mëti'ipë jëtu'un ënaanp ets y'amëtoopyën tii tä mijts të xy'amëtoyën yë wiyjyä'äytyëjkëty, najtsja'apëtëjkëty ets ixpëkytyëjkëty.

¹¹ Mëti'ipë yë yajkutujkpë y'amëtoopyën tsip ets pën tnikajpxëty, yë'ë tëy yë tiostëjkëty mayëtëp yë'ë; je'eyëp ko yë tiosëty ka'ap yajpaatë ma naaxwiinyëtë ja'ayën.

¹² Ënät ja yajkutujkpë jyoot'anpëjky ets ni'ënä'ämëy ja ijxpëkyjyä'äytyëjk ets wijyjyä'äytyëjkëty mëti'ipë jam Babilonyë yajpatëpën ets y'ooktëty.

¹³ Ko ojts ja ya'atë ënä'ämën yajnijawë ënät näjyëtu'un yaj'ixtaaytyaktë yë Daniel ets ja myëku'uktëjkëty ets näjyëtu'un y'ooktëty.

Daniel tyajniwijy ja yajkutujkpë ja wyinkuma'ay

¹⁴ Ënät ja Daniel ojts mëët ja jot winma'any niwijypyë tmëkäjpxy ja Arioc, ja tsiptuunpë wintsën, mëti'ipë ënäty të nyiminëtën ets yaj'ooka'anëtë.

¹⁵ Tääts tyajtëëy: ¿Wi'ix ko yë yajkutujkpë jëtu'unpë ënä'ämën janty poj'am të tyajpëtsëmy? Tä ja Arioc tyukmëmëtyakëyë.

¹⁶ Ënät ja Daniel ojts nyijkxy ma ja yajkutujkpën ets tpëjktsooy wä'än myo'oyë tu'kxëëw mäjtsk xëëw ja juukyajtën ets yajniwijxëtëty ja wyinkuma'ay wi'ix nyiwijyën.

¹⁷ Ënät ojts nyijkxy ma ja y'ijtaknën ets ja myëku'uk tukmëmëtyaktaay wi'ix ënäty ja yajkutujkpë y'ënä'änyën, tam ënätyëty ja Ananías, Misael ets Azarías,

¹⁸ ets t'amëtow tpëjktsowtëty ja Wintsën ets myo'ojëtëty ja wijyajtën, këtiipë yaj'ookëtëty ja yajkutujkpë mëët ja wijyjyä'äytyëjkëty mëti'ipë Babilonyë ja'ayëtyën.

¹⁹ Jä'ä tsu'um yë Daniel ojts yë Wintsën tyuk'a'ijxnaxyë mëti'ipë ja Babilonyë yajkutujkpë nyijawëjäämpyën, ënät ja Daniel tkukajpxëy tja'awëkyëtakëy ja Wintsën.

²⁰ Mëët ya'atë aaw ayuk: Kënu'kxy yë xyëëw nyaaxëty xëmë yë Wintsën, jä'ä ko yë wyijy'ajtën ets kyutujkën yë'ë jyä'ä'ajtyp.

²¹ Yë'ë yajtëkatsyp yë xëëw jëmëjt; yë'ë pyëjktäkpy ets yë'ë yajkutujkpy mëti'ipë ënä'ämpën yajkutujkpën, yë'ë myoopy yë wijyajtën yë wijyjyä'äytyëjk ets yë'ë yaj'ijxpëkytyäkpy yë mëti'ipë ixpëkyën.

²² Yë'ë yaj'ijxëp ets yë'ë yajnikëxë'kpy ja jot winma'any tsipë ets yu'utsypë; nyija'ap mëti'ipë akootstuuy yajpatpën, jä'ä ko yë'ë myëët'ajtyp yë jajën të'kxën.

²³ Mijts Tios, mëti'ipë Tyiosajtën yë nteety n'apës, tyam nkukajpxë nja'awëkyëtä'äky ets tyam ntukxoontä'äky, jä'ä ko mijts tëëjës xyajwijtyä'äky ets tëëjës xymyo'oy yë wijyajtën; e mijts tëëjës ënät xytyuknijawë mëti'ipë të n'amëtowtën: Tëës xytyuknijawëtë mëti'ipë ënäty ja yajkutujkpë myëmääpy myëtäjpyën.

²⁴ Ënät ok ja Daniel ojts tninëjkxy ja Arioc, mëti'ipë ënäty ja yajkutujkpë të tyuknipëkyën ets tyaj'o'kta'ajëty ja wijyjyä'äytyëjk jam Babilonyë yajpaatën ets t'ënëmaay: Këtii xyaj'ooky yë wijyjyä'äytyëjk. Woowjaanpës ma yajkutujkpën wä'än nëk tukmëmëtyä'äky wi'ix yë wyinkuma'ay nyiwijyën.

²⁵ Ënät ja Arioc ojts twoownëjkxy ja Daniel jam ma ja yajkutujkpën Nabucodonosor ets t'ënëmaay: Ma yë jutië ja'ayëty tëëjës tu'uk npaaty yë ja'ay mëti'ipë nyija'apën wi'ix yë mkuma'ay nyiwijyën.

²⁶ Ënät ja yajkutujkpë t'ënëmaay ja Daniel, mëti'ipë ënäty tyijtëpën Beltsasar: ¿Mjanty yajniwijëp yë nkëma'ayësë mëti'ipës të nwinkëma'ayënë?

²⁷ Ënät ja Daniel y'ëtsooy: Ka'ap maa wiyjyä'äy, ka'ap ma nasja'apë, xëëwmääpyë, wijyjyä'äy mëti'ipë nyija'apën wi'ix nyiwijyën yë yajkutujkpë wyinkuma'ay.

²⁸ Tu'uk jää je'eyë Tios mëti'ipë tsajpjotm yajpatpën mëti'ipë nyikajpxtääpyën tiijaty yu'utsy'ijtpën ets yë'ë të tuknijawë yë yajkutujkpë tii tunan jatanëpën. Tyamës yë yajkutujkpë ntukmëmëtya'akëty mëti'ipë të twinkuma'ayën ets mëti'ipë të twin'ixyën ko ënäty jam myä'äy.

²⁹ Jam ënäty ja yajkutujkpë myä'äy wyiitykyijxy myaapäjnkëjxy; yë'ë ënäty myëmääpy myëtäjpy wi'ix ja xëëw jëmëjt myiny wyinkony, e mëti'ipë nyikäjpxypën ja mëti'ipë yu'utsy ijtpën tëë tyuknijawëty.

³⁰ Ëjts tëëjës näjyëtu'un nyajtuknijawë ya'atë winma'any mëti'ipë miimp këtakpën, ka'ap yë'ëjëty koos ni'ikës nwijyëty këtiinëm ja wiinkëtypë ja ja'ay, yë'ëkyëjxmës të nyajtuknijawë etsës ntukmëmëtya'akëty yë yajkutujkpë wyinkuma'ay wi'ix nyiwijyën ets tnijawëty tja'akyukëty wi'ix ja jyot wyinma'any y'ënä'änyën.

³¹ Ja Wintsën tëë twinkuma'ay tu'uk yë mëjpotsy mëti'ipë atë'kxpën ets nëkooyë yaj'ijxnë atsë'ëk ajawë.

³² Ja kyëpajk aakyë'ë pu'ts pujxn; ja kyäty aakyë'ë poop pujxn; ja myox ets ja jyëxk aakyë'ë tsuxkpujxn;

³³ ja pyuuy yë'ë juunpujxn; ja tyeky aakyë'ë juunpujxn ets ja wiinkpë yë'ë mo'onts.

³⁴ Yë'ë ënäty ja yajkutujkpë y'ijxyp, ko jam kopkkëjxm tu'uk tsaa të kyutëkë ets nitëyë jam të tyimkëtä'äky ma ja awinaxën mëti'ipë pujxn mëët y'oytyunyëtyën ets mya'ta'ay.

³⁵ E ja pujxn ets ja juunpujxn ets ja tsuxkpujxn ets ja poop pujxn ets ja pu'ts pujxn naaxwayën të jyajta'ay, jëtu'un tä yaj'ixyën yë naaxway ko xyëkopk'aty ko yë tsajpmok pyajk'aty ets të wyimpapojta'ay, ka'ap të wyi'imy nitu'uk nu'unën. E ja tsaa mëti'ipë të yajma'ta'ayën jëtu'un të y'awinpity tä tu'uk mëj kopkën ets tëë tyajwintujkta'ay yë naaxwiinyëtë.

³⁶ Jëtu'un ja yajkutujkpë të kyëma'ay. E tyam yë'ëjës yam nikajpxäämpy wi'ix nyiwijyën.

³⁷ Mijts yajkutujkpë mijts tu'uk mëj'äämpy mnajxp yajkutujkpë, jä'ä ko Wintsën mëti'ipë tsajpjoty yajpatpën yë'ë kutujkën të mo'oyë ets tëë mo'oyë mëk'ajtën ets mëj'ajtën

³⁸ ets mijts m'ënä'ämtääpy tëkokyë yë ja'ay, yë jëyujk yë joon ets wä'än timy tyiijëty, yë Tios yë'ë të mo'oyë mëk'ajtën ets mijts winë xy'ënä'ämta'ajëty, yë'ë jëtu'un të xywyin'ixy tä ja pu'ts pujxn tkëpajk'atyën.

³⁹ Ok wiinkpë yajkutujkpë pyëtsëma'any mëti'ipë naxy nëjkx nyäxy ma mijtsën ets nëjkxëp wiinkpë yajkutujkpë jyää'aty, mëti'ipë të xy'ixyën tä tsuxkpujxnën, mëti'ipë nëjkx näjyëtu'un y'ëne'emyën naaxwiinyëtë apëtsëmy.

⁴⁰ Nëjkxëp wiinkpë yajkutujkpë pyëtsimy, jä'ä ja mëmajktaxkpë, yë'ë të xywin'ixy tä juunpujxnën; jëtu'un tä yë juunpujxnën yajma'tääpy winë, jëtu'un nëjkx tääpë yajkutujkpë tyajkutëkooytyä'äy ja wiinkëtypë ja yajkutujkpë.

⁴¹ Yë yajkutujkpë tëë näjyëtu'un twin'ixy ko tam tu'uk ja tyeky mëti'ipë mo'ontsën ets tu'uk yë'ë juunpujxn; tääpë jä'ä nyiwijy ko ja kutujkën nëjkxëp mäjtskpëky nyäwyä'kxyë, tu'uk nëjkx mëk pyëtsimy ets tu'uk ëmaay paki'ix, jëtu'un tä tu'uk ja tyekyën pujxn ets tu'uk mo'onts.

⁴² Ja tyekywyä'äxy tam mëti'ipë pujxnën ets tam mëti'ipë mo'ontsën, tääpë jä'ä nyiwijy ko jëna'ajëty nëjkx ja yajkutujkpë mëk yajpaaty ets jëna'ajëty ka'ap.

⁴³ Ets jëtu'un tä ja yajkutujkpë të t'ixyën xëpiny ja tyekywyä'äxy tmëëtëty ja awinax, tam mëti'ipë pujxnën ets tam mëti'ipë mo'ontsën, jëtu'un nëjkx tääpë kutujkën jyäty; nëjkxëp jyanäpyëk jyanäy'uukëtë ja ja'ayëty, je'eyëp ko ka'ap nëjkx oy yajkutuktë, jä'ä ko jëtu'un ënätyëty tä yë pujxnën ka'ap nyätyuktëkëty mëët yë mo'onts.

⁴⁴ Ma ënäty tääpë yajkutujkpëtëjk y'ënä'ämtën, jää nëjkx yë Tios tpëjktä'äky yë kyutujktakn mëti'ipë ka'ap nijëna'a kyutëkoyën ets yë'ë nëjkx myëjnaxy, nëjkxëp ja wiinkëtypë ja kutujkën tyajkutëkooytyä'äy ets yë'ë xëmëkyëjxm nëjkx y'ity.

⁴⁵ Yë'ë yë yajkutujkpë të twin'ixy ko të t'ixy tu'uk ja mëjtsaa të kyutëkë ma ja kopkën ets ka'ap pën të kyutijnaxyë; ja tsaa mëti'ipë ojts tyaj'awinpijta'ayën naaxwayën ja poop pujxn, pu'ts pujxn, tsuxkpujxn, juunpujxn ets ja mo'onts. Yë mëjpë Tios tëë tuknijawë yë yajkutujkpë mëti'ipë tunan jatanëpën. Yë kuma'ay tëy yë'ë ets wi'ix nyiwijyën nän mëtëy yë'ë.

⁴⁶ Ënät ja Nabucodonosor yajkutujkpë nyäkyoxtënaaytyakë ma ja Danielën, ojts wyintä'äky nyaaxkoy ets ni'ënä'ämëy wä'än ja Daniel tyajmo'oy ja wintsë'kën ets wä'än tyajtukwinjoky yë poom.

⁴⁷ Ok t'ënëmaay yë Daniel: Tëy jaanty yë'ë mijts yë mTios, ni'ik myëjëty këtiinëm jyëtu'unëty yë wiinkëtypë tios; yë'ë nyiwintsën'ajtääpy yë yajkutujkpëtëjk ets yë'ë yäjkpy yë nija'awën ma tsipëtypë ets yu'utsypë winma'any, paaty mijts të xynyijawë wi'ix nyiwija'anyën ya'atë nkuma'ayës.

⁴⁸ Ënät ja Babilonyë yajkutujkpë ojts tpëjktä'äky mëj wintsën ma ja Babilonyë kajpnën, ojts näjyëtu'un tmo'oy may yë näynyamo'ojë ets näykyumayë, ojts tuknipëky ets y'itëty yajkutujkpë ma ja y'itjotmën ja Babilonyë ja'ayëty ets yë'ë ojts näjyëtu'un tpëjktä'äky ets tniwintsën'atëty ja ijxpëkyjyä'äytyëjkëty mëti'ipë jam ma ja naax kajpn yajpatëpën.

⁴⁹ Ojts näjyëtu'un yë Daniel t'amëtoy; ets yajkutujkpë tpëjkta'akëty yë Sadrac, Mesac ets Abed-negó ma mëj'äämpyëtypë tuunkën, mëti'ipë yajpatpën ma Babilonyë ja'ayëty yë y'itjotëtyën. Yë Daniel jam ojts wyi'imy wintsën ma ja yajkutujkpën.