Daniel 12 - Biblia Mixe de Quetzaltepec

Ma juukyajtën kyukëxën

¹ Ënät jam nyänyikëxë'ëkyë yë Miguel, tsajpjotmëtë kukäjpxy, mëti'ipë kyuwäänpyën yë mkajpn. Ëyo'on jotmay tunanëp, jëtu'un tyuna'anyë ëyo'on jotmay tä nikajëna'a jëtu'un yaj'ixynyëmën maju'unëm nyaaxkëtä'äkyën yë naax kajpn. Ko ënäty jëtu'unpë ja xëëw jëmëjt tukja'ty jäänëm nëjkx y'ëwaatsëpëtsëmtë tëkokyë ja ja'ayëty mëti'ipë mijts mkajpn'ajtypyën mëti'ipë miintëpën ja xyëëwëty kuja'ay jap nokyjoty.

² May ja mëti'ipë maatëpën jap naaxjoty, nëjkxëp jyuukywyijtë: Tam mëti'ipë nëjkx jyuuky'ätyën xëmëkyëjxm ets tam mëti'ipë nëjkx je'eyë tsyëtyuny jyääypyätë ets nëjkx ja ëyo'on tpaaty ja xëmëkyëjxmëpë.

³ Ja wijyjyä'äytyëjkëty, mëti'ipë ojts may ja ja'ay oy tu'uwinwowtën, jëtu'un nëjkx tyë'kxtë jyajtë ja niwits nijuuxën, ja tsajp; xëmëkyëjxm nëjkx yaj'ixtë mëtsa'ajën.

⁴ E mijts Daniel, yu'utsy ya'atë xymyëët'atëty ets ta'tspëky yë noky xy'akëëymyukëty koonëm tpaatëty ja xëëw jëmëjt ma ënäty ja juukyajtën jyëjpkëxyën. May ja ja'ay jyëtita'any xiitsow yaatsow t'ixta'aja'any tiijaty y'ëkjaak nija'ap.

⁵ Ëjts Daniel, tëëjës wiinkpë ja'ay nimäjtsk n'ixy jam tyänëtë nëë'ëkë'ëm, tu'uk yaatsow ets tu'uk jamtsow.

⁶ Nitu'uk yë'ëjëty të tyajtëy ja mëti'ipë linë wit wyit'ajtypyën, mëti'ipë ënäty jam nëëwinkëjxy yajpatpën: ¿Jëna'a jëtäätën tyaapë y'atëwa'any mëti'ipë yam n'ijxëmën ka'ap nijëna'a yaj'ixynyëmën?

⁷ Ja ja'ay mëti'ipë linë wit wyit'ajtypyën ënät ja kyë'ë të tyujkxajy jam tsajpjotm ets ja Tios juukpyë të tukajpxpety ets të y'ënä'äny: Ma ënäty tëkëëk jëmëjt ja kujkm të nyäxyën, ma ënäty o'ktëy të yajtuunta'ayën ja kyutujkën ja Tios ja kyajpn, ënätnëm nëjkx ya'atë ëyo'on kyixy nyäxy.

⁸ Tëës njamëtoy ko kyäjpxy je'eyëp ëjts nijënu'unës të nkaja'akyukë. Ënätës të nyajtëy: Wintsën, ¿tiijën tunan jatanëp ko ya'atë jëtu'un kyixy nyäxy?

⁹ Etsës të xy'ëtsoy: Yo'oy yë mtu'u, Daniel, jä'ä ko tyaapë yu'utsy mëpaat y'ity koonëm jyëjpkukëxëty ja nyixëëw nyijëmëjt.

¹⁰ May ja ja'ay y'ëyowa'any jyotëkoyä'äny mëët ja ëyo'on mëti'ipë yam të yajnikäjpxyën ets nëjkx wya'atstë ets nitii ëxëëkajtën tkamëët'ata'antë. Yë ëxëëkja'aytyëjk je'eyëm tuna'any tkajpxa'antë winë ëxëëkjaty ets ka'ap tja'akyukëja'antë tii tuunëp jajtëp, e yë wijyjyä'äytyëjkëty jyä'äkyujkëtya'ajantëp winë wa'ats.

¹¹ Tuk mil ja mäjtsk mëko'px ja majkta'px majk nëjkx nyäxy ja xëëw ma ënäty të yaj'akajpxtukyën këtiipë ja wintsë'kën y'ëkyajyajknëty ja jëpom jëpompë yajyäkyën ets ma ënäty të y'ëxëëkën ja Wintsën ja tsyajptëjk.

¹² E ja ja'ay mëti'ipë ënäty ëwxijtp mä'kxtujkpën ma tääpë ja tu'uk mil ja tëkëëk mëko'px ja i'px majkmokx xëëwpë nyaxa'anyën, jotkujk ja yajpaata'any.

¹³ E mijts Daniel, ye'eymyës yë mtu'u mapaat jyä'tyën ets mpo'kxëty, jä'ä ko ënäty jëtu'un të nyajxta'ay të kyëjxta'ay winë jää nëjkx mpëtë'ëky ets nëjkx xy'ëxajë ja mkuma'ayën.