Apocalipsis 8 - Biblia Mixe de Quetzaltepec

Mëwëxtujkpë tsa'ayën ets ja aak pu'ts pujxnpë poom ato'oyën

¹ Ko ja Kupixyny U'unk ojts tpu'uwä'kxy ja mëwëxtujkpë ja tsa'ayën, ënät y'ëmoontaay jam winë tsajpjotm.

² Etsës n'ijxy niwëxtujk ja tsajpjotmëtë kukäjpxy jam tyänëtë Tios wintum, mëti'ipë yajmooytyën këëktu'uk ja xuxn.

³ Ënät ja wiinkpë ja tsajpjotmëtë kukäjpxy ok jyaak miiny, yë'ë myëët'ajtyp yë jëën xijn, aak pu'ts pujxnpë, ets jam wya'ak o'oyëy ma ja wintsë'këntyaknën; ets yajmooy may ja poom ets jam wyintsë'kën'atëty ma ja wintsë'këntyaknën aak pu'ts pujxnpë, jam winkon ma jam Tios'ëwtatën ja naax kajpn tëëpë oy jyuuky'atën.

⁴ Jap tsajpjotmëtë kukäjpxy kyë'ëjoty tsyoony ja poom jok ets jyä'ty Tios wyintum, mëët ja käjpxy mëtyä'äky ma Tios'ëwtatën ja naax kajpn tëëpë oy jyuuky'atën.

⁵ Tääts ja tsajpjotmëtë kukäjpxy tkoonë'ky ja poom ato'oyën ets tyaj'ujtsy mëët ja jëënpajk mëti'ipë jamën ma ja wintsë'këntyaknën, ets najtswëjjëy ma ja naaxwiinyëtën ets myiiny ja ënääw wëtsuk ets mëk ujx.

Wëxtujkpë yë pujxnxuxn

⁶ Ja niwëxtujkpë ja tsajpjotmëtë kukäjpxy mëti'ipë këëktu'uk myëët'ajtëpën ja pujxnxuxn, ënät nyänyipëjktakëtyë.

⁷ Mëtu'ukpë ja tsajpjotmëtë kukäjpxy ojts tukxu'uxy ja pyujxn xuxn ets myiiny naaxwiiny ja tëtsn tuu ets ja jëën ne'pyny myëëtpë, jëtu'un tyooytyëkooy tu'kpëky ja naaxwiinyëtë ma ja tëkëëk pëkpyën mëët tu'kë'ëyë ja aay kepy ets ja aay ujts.

⁸ Ja mëmäjtskpë ja tsajpjotmëtë kukäjpxy ojts tukxu'uxy ja pyujxn xuxn, ënät ojts y'aka'ajë mejyjoty tu'uk mëti'ipë këxë'kpën ijxtëm kopkën jëënyä'änkjoty ets y'awinpijty ne'pynyën tu'kpëkpyë ja mejy ma ja tëkëëk pëkpyën.

⁹ Jëtu'un tu'kpëky tyëkooytyääy ja juukpyë mëti'ipë ënäty jap mejyjoty tsënaaytyëpën ets ja kepy nëëwinye'epyë näjyëtu'un wyintëkooytyë.

¹⁰ Ko ja mëtëkëëkpë ja tsajpjotmëtë kukäjpxy tukxuxy ja pyujxn xuxn, ënät tu'uk ja mëj matsa'a ojts kyä'äy tsajpwinm, jëtu'un tyoy ijxtëm jëënyä'änkën. Jam kyuka'ajëy ma tu'kpëky ja tëkëëk pëkpyë ja mëjnëëjën ets maajëty ja nëë myuutyën.

¹¹ Ta'am ja matsa'a txëëwajtyp. Ënät tu'kpëky ja tëkëëk pëkpyë ja nëë tya'amëy. May ja ja'ay y'o'ktë ko t'uktë ja nëë ta'ampë.

¹² Ko ja mëmajktaxkpë ja tsajpjotmëtë kukäjpxy ja xyuxn tukxuxy, ënät tu'kpëky ja tëkëëk pëkpyë ja xëëw, po'o ets ja matsa'a wyintëkooytyë. Jëtu'un ka'ap kyujajy kyutë'kxy ja xëëw, ja po'o ets ja matsa'a; taxk horë xëëny ets taxk horë koots y'ijty.

¹³ Tam ënäty jëtu'un n'ixyës koos n'ijxpaty tu'uk ja witsn kyäknaxy tsajp'itkujkm ets nmëtooyës mëk y'ënä'äny: Tyaapë ja'ayëty ëyo'onjëjp'am yajpaatë, mëët yi'iyë ko ënät yë nitëkëëkpë ja tsajpjotmëtë kukäjpxy tukxu'uxtëty ja pyujxn xuxnëty.