Apocalipsis 13 - Biblia Mixe de Quetzaltepec

Nimäjtskpë mëj jëyujk

¹ Etsës n'ijxy tu'uk ja mëj jëyujk jam pyëtsimy mejyotm. Wëxtujk ja kyëpajk ets majk ja wyaj, ets aak kujänmëët ja wyaj. Tu'uktu'uk ja kyëpajk, aak ëxëëk käjpxy jam këxja'ay, yë'ë Tios wiinkjaty yajtijp.

² Ya'atë jëyujk mëti'ipës n'ijxën, jëtu'un kyëxë'ëky ijxtëm yë kuuyxyëpëjyën. Jëtu'un ja tyeky ijxtëm ja osë tekyën ets ja y'aaw ijxtëm ja kaa aawën. Ja mëj tsa'any ojts myo'oyë ja mëk'ajtën, ënä'ämtakn ets ja mëjkutujkën.

³ Ja mëj jëyujk tsëtyut tu'uk ja kyëpajk yaj'ixy yaj'ookanëp yowë; tsok ja tsyëtyut, ko ja naaxwiinyëtë ja'ay jëtu'un t'ijxtë wiinkuma'ayën ojts t'ixtë ets ojts tpanëjkxtë ja mëj jëyujk.

⁴ Ets twintsë'këtyë ja mëj tsa'any jä'äkyëjxm ko ja mëk'ajtën ets ja kutujkën ënäty të tmo'oy ja mëj jëyujk. Näyjyëtu'un ja mëj jëyujk twintsë'këtë ets y'ëna'antë: ¿Pën jëtää jëtu'un ijxtëm ya'atë mëj jëyujkën? ¿Pën yë'ë ëkmayëtëp?

⁵ Tääts näjyëtu'un ja mëj jëyujk yaj'ëwatsy ja tyu'u ets ja Tios tmëkajpxtëkoyëty. Näyjyëtu'un yaj'ëwatsy ja tyu'u ets y'ënä'ämëty wëxtyikxy mäjtsk po'o.

⁶ Jëtu'un tjantytyuuny, myëkajpxtëkooy ja Tios ets tni'ojëy ëxëëkjaty ja jyëën tyëjk ets mëti'ipë tsajpjotm ijtëpën.

⁷ Näyjyëtu'un yaj'ëwatsy ja tyu'u ets tmëtsiptunëty ja Tios ja jyä'äy koonëm tmëmëta'akëty. Jëtu'un ja kutujkën yajmooy ets t'ënä'ämëty ni'ëmukë ja naaxwiinyëtë ja'ay, mëti'ipë yajpatëpën maajaty ja naaxwiinyëtën ets maajaty ja naax kajpnën mëti'ipë tëkatyëty ja aaw ayuk kyajpxtëpën.

⁸ Ja naaxwiinyëtë ja'ayëty wyintsë'ëkëjantëp ja mëj jëyujk, mëti'ipë ja xyëëw ka'ap jap myintën kuja'ay ma ja nokyën mëti'ipë myë'ijtypyën ja Kupixyny U'unk ja jyuukyajtën, mëti'ipë ja ja'ay yajkruuts päjtën.

⁹ Pën mëtoop, wä'än tmëtoow'ity.

¹⁰ Mëti'ipë nitëjkëyëpën yajtsumëty, nëjkxëp ja yajtsumy; pën nitëjkëyëp yajkupuxëty, nëjkxëp ja yajkupuxy. Yaa yaj'ixa'any pën jotmëkën ets pën mëpëjkpën ma ja Tios ja nyaax kyajpnën.

¹¹ Okës n'ijxy wiinkpë ja mëj jëyujk pyëtsimy naaxjoty. Mäjtsk ja wyaj ijxtëm kupixyny u'unk yë wyajën ets jëtu'un kyäjpxy ijxtëm ja mëj tsa'anyën.

¹² Ja mëjëwyiinpë ja mëj jëyujk ojts myo'oyë ja kutujkën ets t'ënä'ämëty ja naaxwiinyëtë ja'ay ets t'ëwtatëty ja mëjëwyiimpë ja mëj jëyujk, mëti'ipë ja myëj tsëtyut ënäty të tsyo'okyën.

¹³ Näyjyëtu'un ja myëk'ajtën tyaj'ijxëy, tsajpwinmpaat ja mëj jëënyä'änk tyajtso'ony ets naaxkëjxy tyajkëtäky.

¹⁴ Jëtu'un'äämpy ja ja'ay twin'ëëny twinxajy ko ja myëk'ajtën tyaj'ixyë. Tääts twin'ë'ëny ja naaxwiinyëtë ja'ay ets t'ënëmaay ets t'oytyuntëty tu'uk ja awinax ijxtëm ja mëjëwyiinpë ja mëj jëyujkën mëti'ipë ka'ap të y'ookyën, oy të jyayajpuxy.

¹⁵ Tääts ja mëk'ajtën yajmooy ja mëmäjtskpë ja mëj jëyujk ets tyajjuukpyëkëty tyajkajpxpëkëty ja mëjëwyiimpë ja mëj jëyujk nikojtu'uty ets tyaj'ookëty mëti'ipë ka'ap wyintsë'ëkëtyën.

¹⁶ Ënät ja mëmäjtskpë ja mëj jëyujk tyajnikutujkëy ets ja ja'ay yajtsa'atëty ma y'a'oykyë'ëjëtyën ets ma wyimpokëtyën, wä'än tmëj tmutskëty, wä'än tkumeenyjyä'äyëty, wä'än t'ëyoopëja'ayëty, wä'än tmëtuunpë ëkë tkamëtuunpëty.

¹⁷ Ets ka'ap mëpaat pën jyuy tyooky pën ka'ap kyë'ëkëjxy ëkë wyimpokëjxm tsyä'äyëty mëët ja mëj jëyujk ja xyëëw ëkë ja nyimëtyo'owën.

¹⁸ Yaa ja wijyajtën tsyokyë. Pën jyä'äkyujkëp, wä'än tnimaaytyu'uty mëti'ipë ja mëj jëyujk myëtyo'owën'ajtypyën. Yë mëtsyo'owën, yë'ë ja tëtujk mëko'px ja tëkë'px tëtujkpë.