2 Samuel 1 - Biblia Mixe de Quetzaltepec

Ma ja David tnija'awëyën ko ja Saúl ënäty të y'ooky

¹ Tëë ënäty ja Saúl y'o'knë, ko ja David ojts nyijkxy jam Siglag, yë'ë ënäty mëët të tsyiptuunta'ay ja Amalec ja'ayëty, ma ka'ap tyajmëtäkyën, jam ojts y'ity mäjtsk xëëw.

² Kom tëkëëk xëëw jam tu'uk jyä'äjty yë ja'ay ja tsyoony ma Saúl yë jya'ajtaknën, këëts këëts ja wyit ets ninaax kunaax mëët ko ja ëyo'on jotmay tmëëtëty. Ko jyä'äjty jam ma ja David yajpaatyën, ënät nyaaxkooy ets tyajnikëxë'ëky jëtu'un ja näwyinkutsë'ëkë.

³ Tä ja David yajtëëwë: ¿Ma mtsoony?. Tääts ja ja'ay y'ëtsooy: Jamës të nke'ekyës ma Israel ja'ay jam tsyiptuntën.

⁴ ¿Tiixën jam të tyuny të jyätyë? Tuk ëwa'anëkës, tun yë mëyajtën. Ja David mëktä'äky tjantyyajtëy ets ja ja'ay tyuk'ëwaanëtëty. Ënät ja ja'ay ojts y'ënäny: Yë nja'ayës tëë kyäkta'atë, ka'ap jam tsipjotm të myëta'aktë, tëë may y'ooktë. Jëtu'un ja ja'ay y'ëtsooy, tëë näjyëtu'un ja Saúl y'ooky ets ja myaank Jonatán.

⁵ Tää ja David ojts t'ëtsoy ja ja'ay mëti'ipë ënäty ja ayuk të tmëja'tyën. ¿E mijts wi'ix xynyija'apë ko ja Saúl ets ja Jonatán tëë y'ooktë?

⁶ Tääts ja ja'ay y'ëtsooy: Tyam ntuk'ëwaanëty, ëjts jamës ënäty nëkoo njëtijtpë ma ja kopk jam txëëwatyën Guilboa, koos ja Saúl të n'ijxpaaty jam nyäkyëxmëta'äkyë ma kyu'umën e jam ix'am tam jyänty pyaminëtë ja myëtsip mëët yë pujxnwintëkäämpë ets ma mëti'ipë këwaaykyijxyën jawäänë kyayajnaspatënyë.

⁷ Ko të nyäjyë'ixyë täätsës të xy'ijxpaaty etsës të xyaaxë. Ëjts tëëjës ninëjkxy etsës ntuna'any ja mëti'ipë ënäty xytyuk'ënä'ämaanpën.

⁸ Täätsës të xyajtëy: Mpën mijts, etsës të n'ëtsoy ko Amalec ja'ayës.

⁹ Ënätës të xy'ënëëmë koojëkës ntimyaj'ookëty, tëë y'ënu'kxënyë yajxon tim ookanëp ënätynyë.

¹⁰ Ënätës të njanty wiinkuwa'akë etsës të nyaj'ooky, jä'ä ko tëëjës ënäty n'ixy ko ka'ap y'ëkjuuky'atanë, tëë yajxon mëj tsyëtyujnë. Tääts të ntimpyëjkës ja pyu'tspujxn kujup ets ja pyu'tspujxn kë'ëjän ets yaa mijts ntukniminy.

¹¹ Tää ja David mëët ja jyä'äy tyëjkëtyë moonpë tujkpë, yë'ëpaat ja wyit tyujkxyëty ojts tkëëtstë mëët ja ma'ayën tajën,

¹² ets tnijëëy tniyaxtë, ko ënäty ja Saúl të y'ooky të tyëkoy mëët ja myaank Jonatán, näjyëtu'un ja mëti'ipë mëët tu'knax y'o'ktën jam tsipjotm, ojts tu'kxëëw y'ayuu'atë ja Israel ja'ayëty tyimkutsu'ujëtyë jëtu'un mëët ko ja myëku'uk të y'ooktë.

¹³ Ënät ja David tyajtëëy ja ja'ay ja mëti'ipë ënäty ja aaw ayuk të tyajminyën, t'ënëmaay: ¿Maaxë mijts mkukajpnëty? Ënät y'ëtsooy: Jaaypyo'kxy ja'ayës ëjts, Amalec ja'ayës.

¹⁴ ¿E wi'ixtsën ko mijts të xy'ëknixajë'kpë ja ja'ay mëti'ipës mëj ënä'ämpë'ajtëpën mëti'ipë ja Tios kë'ëm win'ijxën? Jëtu'un ja David mëk y'ënäny.

¹⁵ Tääts ojts tu'uk ja tyuunpë tmëkäjpxy ets t'ënëmaay: Yaj'ook ya'atë ja'ay, tääts tjantyyaj'o'ky,

¹⁶ tä ja David ojts y'ënä'äny: Tyam ya'atë Amalec ja'ay të y'ooky, kë'ëm jëtu'un të nyätyunyë, ko të y'ënä'äny ko të tyaj'ooky mëti'ipë ënä'ämpën, mëti'ipë ja Wintsën wyin'ijxën.

Ma yajnijë'ëy yajniyä'äxyën yë Saúl ets Jonatán

¹⁷ David ojts tyaj'ëypëtsimy ko ojts tnijë'ë tniya'axtë ja Saúl mëët ja myaank Jonatán ko y'o'ktë,

¹⁸ ets ni'ënä'ämëy ets tëkokyë ja'ayëty yajtuknikäxtëty jam ma ja Judá y'itjotmën. Ya'atë ëy ma yajkuuy'iyën ja ëyo'on jotmay, jap myiny kuja'ay ma ja Wa'ats ja'ay ja nyokyëtyën.

¹⁹ Mijts Israel, tëë tsyëtyuty yë mmëj'ajt jam tunkëjxm kopkëjxm. Tëë y'ooky ja mja'ayëty mëti'ipë jotmëkëtyën.

²⁰ Ka'ap mëpaat yajnijawë jam Gad, nän ka'ap yajnimëtya'akëty jam Escalón, këtiipë ja filistejë to'oxytyëjkëty xyoonta'aktëty, ets ënät y'ätstëty pyutëty.

²¹ Nijëna'a nëjkx jam kya'ëktuu kya'ëkpojnë, nän ka'ap yë maanik jam y'ëkëtaknëty, jam ma ja tun kopk txëëwatyën Guilboa, jä'ä ko ma tääpë itjotmën o'kën yë jam të y'ity. Jam yaj'atä'än yajtukta'antë ja tsiptuunpëtëjkëty ja pyujxnëty kyu'umënëty. Jam ojts yaj'ijxtëkooynyë ja pujxn mëti'ipë ijty ja Saúl nätyuk'akëëytyujkëpën.

²² Yë Saúl ets Jonatán ko ijty tsyoontë, ets nyëjkxtë muum tsiptuunpë, nijëna'a yë kyu'umën jëtu'unyë tkamëwinpitë, koonëm ijty ja myëtsip tyaj'ooktë mëti'ipë ja näjya'awëtëpën jotmëkëty.

²³ Yë Saúl ets Jonatán mëkës ijty n'oyjyawëtë, ets nmëku'ukjawëtë, yë'ëjëty nijëna'a ojts kyanäy'ëxmatsëtë oy jyääjëty ko jyuuky'ajtë ets näjyëtu'un ko y'oktë. Pe'tym ijty ni'ikëty këtiinëm jyëtu'unëty yë witsn. Mëk ijty ni'ikëty këtiinëm jyëtu'unëty yë kaa.

²⁴ Miitsëty to'oxytyëjkëty mëti'ipë jam yajpatëpën ma Israel kajpnën, nijë'ë niya'axtë yë Saúl mëti'ipë ijty mxojxtëpën mëët yë oyëtypë wit, mëti'ipë ijty nitëy nixëmäm myaj'ijtëpën mëët yë pu'ts pujxn.

²⁵ Mëk oy yajjawë ko ja jotmëkja'aytyëjkëty të y'ooky të tyëkoytyë jam tsipjotm. Mëk yajjawë ko ja Jonatán të y'ooky të tyëkoy jam mëjtunkëjxm mëj kopkëjxm.

²⁶ Ëjts, mëkës nmony ntuky mëët mijts Jonatán mëët ko mëj këjää nmëku'ukjawë. Ko mjuuky'äjty janty tsuj janty'oy mijts xyjyëkyejpyës. Yë mtsojkën mja'awën maas ëjtsën ni'ik yë'ë nyajmëjnaxyës këtiinëm jyëtu'unëty ko tu'uk yë to'oxytyëjk xytsyojkmëty xyjya'awëmëty.

²⁷ Mëk oy yajjawë ko ja jotmëkja'aytyëjkëty të y'ooktën jam tsipjotm. Tëkokyë ja pujxn ets ja ku'umën tëë ja y'atëkooytyä'äy mëti'ipë ijty myëtsiptuuntëpën.