1 Samuel 8 - Biblia Mixe de Quetzaltepec

T'amëtowtë tu'uk yë yajkutujkpë

¹ Ko ja Samuel ojts myëjja'ayënë, ënät ojts ja myaank nimäjtskpë tuknipëky ets twinye'eytyëty ja naax kajpn ets ja tsip näjyëtu'un.

² Tu'uk ja myaank, jä'ä txëëwaty Joel, e ja mëmäjtskpë Abías; jam ijty y'ënä'ämtë Beerseba.

³ E tääpë ëna'këty ka'ap ojts oy winë tuntë tä ja tyeetyën, je'eyë ijty tsoktë ja wit meeny, ko pën tii tuuntëkoy ja meeny y'ëxajëkyojtëp tääts ka'ap tii winë oy tnipaye'eytyë.

⁴ Ënät ja mëjja'aytyëjk ojts ye'eymyuktë ets ojts tninëjkxtë ja Samuel jam Ramá, tääts mëët myëtya'aka'antë

⁵ ets t'ënëmaaytyë: Samuel, mijts kujk mëj ja'ayënë ets m'u'unk m'ëna'k ka'ap oy y'ënä'ämtë tä mijtsën, paaty npëjktsowtë ko nikë oy ko tu'uk xynyikajpxpätëty yë yajkutujkpë mëti'ipës xy'ënä'ämtëpën, jëtu'un tä wiinkëtypë kajpnën myëët'ajtëp yë yajkutujkpë.

⁶ Samuel ka'ap ojts t'oyjyawë ko jëtu'un ja Israel ja'ayëty y'ëna'antë, ko t'amëtowtë ja yajkutujkpë, paaty ojts ja Wintsën t'ëwaanë,

⁷ e ja Wintsën tyaa y'ëtsoowë: Mijts kupëkymës mëti'ipë naax kajpn m'amëtoowëpën. Jä'äxë ko ka'ap myijtsëty m'ixtijyë, ëjts yë xy'ixtijtëp, ëjts jëtu'un xykyatsojktëp ets n'ënä'ämëtyës ma yë'ëjëtyën.

⁸ Yë'ëjëty jëtu'unyëm jyä'äy'atë. Maju'unëmës jap nyajpëtsëmtën Egiptë ets tyampaat jëtu'unës xëmë yë jyot wyinma'any xytyuk'ixtë tä tyam xy'ixy xykyoyën; jëna'ajëtyë tëëjës xy'ëk'ëxmajtstëpë tääts yë wiink tios tpanëjkxtëkëtë.

⁹ Paaty n'ënëëmë ko kupëk je'eyë ijxtëm y'ëna'atën; je'eyëp ko tuk'ëwaanë wi'ix nëjkx ja yajkutujkpë jyä'äy'ätyën ets ijxtëm nëjkx winë tunyën ma yë'ëjëtyën mëti'ipë ënäty ënä'ämëtëpën.

¹⁰ Tä ja Samuel tukmëmëtyäky ja naax kajpn wi'ix ënäty ja Wintsën të y'ëtsoyën.

¹¹ Ets y'ënäny: Ya'atë jëtu'un nëjkx ja yajkutujkpë tuny ma miitsëtyën. Waatswitsy nëjkx ja m'u'unk m'ëna'këty tyajye'ey, mëti'ipë nëjkx tkëwent'atën ja pujxnwintëkäämpë, mëti'ipë myëtsiptuuntëpën, mëti'ipë nëjkx jëyujk këjxy jyëtityën ets mëti'ipë nëjkx yë'ë nyätyukëwent'atyën.

¹² Pënëty nëjkx tpëjktä'äky ets tniwintsën'atëty nitu'kmil ja tsiptuunpë ets mëti'ipë nëjkx tniwintsën'atëty niwëxtyikxymyajk je'eyë. Nëjkxëp näjyëtu'un tpëjktä'äky mëti'ipë ja kyam tyu'u pëjktakxëtëpën ets mëti'ipë nëjkx ja pëjktä'äky tyajpëtë'ëktën; ëpëky nëjkx tpëjktä'äky pën yaj'oyëtëpën ja ti'px, ja ku'umën, ja yenypyujxn ets ja pujxnwintëkäämpë mëti'ipë myëtsiptuuntëpën.

¹³ Nëjkxëp näjyëtu'un twoy ja mnëëxëty ets yë'ë tuk'oytyunëty ja pa'akxu'kpë, ja ka'ayën ukën ets ma kyojyën ja tsyajpkääky.

¹⁴ Nëjkxëp tniwa'any ja oyëtypë ja m'it mnaaxwiinyëtëty, ja mkam mtu'ujëty ma xyaj'itën ja tsatym ets ja olivë ets nëjkx tmo'oy jä'ä ja tyuunpëtëjk.

¹⁵ Ja majk pëkpyë ja m'ujts pajkëty ets mtsatymkyamëty, tu'kpëky nëjkx mpëjkxëtë ets yë'ë nëjkx tmo'oy ja tyuunpëtëjk ets mëti'ipë mëët tyuunmukyën.

¹⁶ Nëjkxëp näjyëtu'un mpëjkxëtë ja mtuunpëty ye'etyëjkpë to'oxytyëjkpë, näjyëtu'un ja mjëyujk mtsajpkaajëty ma nëjkx tyajtunyën ets tuk'oy'atëty.

¹⁷ Nëjkxëp näjyëtu'un tu'kpëky tjëëpëky ma ja majk pëkpyë xyajtänëtën ja mtsajppax mkupixynyëty ets miitspaat nëjkx xymyëtuntë.

¹⁸ E koots ënäty jëna'a xywyinkjawëtë ja yajkutujkpë mëti'ipë ënäty kë'ëm të xywyin'ixtën, yë Wintsën ka'ap nëjkx m'ëk tuunëtë këwentë.

¹⁹ Ja kajpn tyaa ojts y'ëtsoy ko Samuel tyukmëmëtyaktaayëtë wi'ix ënäty y'ixë'atyën: Wä'än timwyi'ixëty, ëëtsëty ntsojktëpës tu'uk yë yajkutujkpë,

²⁰ jëtu'un tä wiinkëtypë ja naax kajpn ja yajkutujkpë tmëët'atën, mëti'ipës xy'ënä'ämtëpën ets mëti'ipë nëjkx xytyu'uwinwowtësën ma ënäty ja jëën tsip yajmëët'atyën.

²¹ Ko ja Samuel jëtu'un tmëtoow'ijtaay wi'ix ja naax kajpn y'ënä'änyën, tä ojts ja Wintsën tuk'ëwaanë.

²² Tä ja Wintsën y'ëtsoowtë: Mëmëtow ijxtëm y'ëna'antën, nikajpxpäjtë tu'uk yë yajkutujkpë. Tä ja Samuel ja Israel ja'ayëty t'ënëmaay ets wyimpijta'atëty jatëkok ets nyëjkxtëty ma nyaax kyajpnëtyën.