1 Samuel 5 - Biblia Mixe de Quetzaltepec

Ko jam ja kaaxë jyä'äjty ma filistejë ja'ayëtyën

¹ Ko yë filistejë ja'ayëty tjä'äpëjktë ja Tios ja kyaaxë, ënät jam tmëtso'ontë Eben-ézer ets ojts tmënëjkxtë jam Asdod.

² Ko jam tmëja'ajtë jap tpëjktaktë ma ja tyiosëty jap yajpaatyë mëti'ipë xyëëwajtypyën Dagón.

³ E komjëpom ko myiintë yë ja'ayëty mëti'ipë kukajpn'ajtëpën jam Asdod, ënät tuk'ijxpäjjë ko ja Dagón naaxkëjxy jyëpijpnë, winkon ma ja Wintsën ja kyaaxën. Ënät tyajpëtë'ktë ets jatëkok tpëjktaktë jam ma ënäty të yajpaatyën.

⁴ E ko kyomjëpom'ajty näjyëtu'un ojts jatëkok tpatkojnëtëpë ja Dagón naaxkëjxy jyëpijpnë, jam kaaxë winkon mëti'ipë ja Wintsën jyä'ä'ajtypyën ets t'ijxtë ko tëëtëm ja kyëpajk nyëka'ay ets mäjtsk ja kyë'ë jam ëpëky jyëpijpnë naaxkëjxy. Yi'iyë ojts ëmuum jyaak wë'ëmy ja kepy'apujxtuky.

⁵ Paatykyëjxm tyampaat yë teetytyëjkëty ko jam tyëkëtë ma Dagón yë tsyajptëjkën, ka'ap tuktääntë yë tëjk'apu'uy.

⁶ Ok yë Wintsën mëk tëytyuuny yë ja'ayëty jampë tsyëënëtën Asdod ets mëti'ipë yajpatëpën ma jampë ja it naaxwiinyëtën, tääts tyukmiinëtë ja yuu pa'am mëkëtypë, tä yë pu'utspa'amën, xi'ikyë pa'amën ets tsaamaxnën.

⁷ Ko y'ijxtë jëtu'un ja Asdod ja'ayëty, ënät y'ënantë: Yë kaaxë mëti'ipë Tios jyä'ä'ajtypyën mëti'ipë y'ëwtajtëpën yë Israel ja'ayëty, ka'ap mëpaat yaa yajpaaty. Jä'ä ko paatykyëjxm jëtu'un tyam o'ktëy njajtëmë ets nëkooyë këxëty yë yuu pa'am myiinë ets ix näjyëtu'un yë Dagón yë'ëpaat pyatënë ja tëytyu'unën mëti'ipë ntios'ajtëmën.

⁸ Paaty ojts tëkokyë twoowmujkta'atë yë mëjja'aytyëjk ets kopktëjkëty jampë yajpaatën ma filistejë kajpnën ets tyajtëëwtë: ¿Tii mëpaat ntu'unëmë mëët yë Tios yë kyaaxë mëti'ipë yë Israel ja'ayëty y'ëwtajtëpën.? Tä y'ëtsoowtë: Mënëjkxtë jam Gad. Tääts ja filistejë ja'ayëty ojts jam tyajnëjkxtë.

⁹ E ko jam tyajtso'ontë, Tios mëk ojts jam ja ëyo'on tyajkëtä'äky ma ja naax kajpnën. Jä'ä ko wa'ats ja ja'ayëty ojts pya'ampäjta'atë mëët ja ki'ix pa'am ets ja pu'uts pa'am; ojts pya'ampäjta'atë mëjja'ay, mutskja'ay.

¹⁰ Ko jëtu'un t'ijxtë, ënät jatëkok tmëtso'ontë ets ojts tmënëjkxtë jam Ecrón, ko jam tmëja'ajtë, ja ja'ayëty mëti'ipë jam tsënaaytyëpën ënät y'ënaantaktë: Tëë ënät tmëmintë ja Tios ja kyaaxë mëti'ipë yë Israel ja'ayëty y'ëwtajtëpën yaa ets xytyukyaj'o'kta'aja'anëmë.

¹¹ Tëë ënäty tëkokyë ja ja'ayëty tsyë'ëkëtëjkëtya'atë mëët ja mëk pa'am jampë jyëtityën mëti'ipë ja Tios të tkexyën, ënät ojts tyaxmujkta'atë ja kopktëjkëty mëti'ipë jam yajpaatën ma ja filistejë kajpnën ets t'ënëmaaytyë: Mënëjkxtë ya'atë Tios yë kyaaxë ma të xymyëtsoontën, nëjkx jam pëjkta'aktë jatëkok ma të y'ityën këtiipë n'o'ktä'ämyëty.

¹² Ja ja'ayëty jampë kyukajpn'atën nëkooyë yaxnëtë jyojknëtë mëët ja yuu pa'am mëti'ipë myënajx yajnajxtëpën. Jä'ä ko ja mëti'ipë ënäty ka'ap y'ooktënën ujts ënäty yajpatnëtë ja nyini'kxëty mëët ja ki'ix pa'am.