1 Samuel 2 - Biblia Mixe de Quetzaltepec

Ja Aná ja y'iy

¹ Jëtu'un ja Aná ojts ja Wintsën tkukajpxë: Wintsën, janty jotkujkës näjyawëty winë aaw winëjot ma mijtsën. Jä'ä ko mijts myaj'ajä'ämëp yë njot nmëjaawës. Jyëkyejpyës ëxëëkjaty ntijëty yë nmëtsiptëjkës, jä'ä ko mijts tëëjës xypyutëkë. Paaty janty jotkujkës tyam näjyawëty.

² Ni pën jëtu'un kyawa'atsëty tä mijtsën Wintsën. Ni pën jëtu'un kyakëwent'aty, tä mijtsën, Tios mëti'ipës n'ëwtajtëpën, ka'ap ma wiinkpë jëtu'unpë tä mijtsën.

³ Ka'ap tjëkyepy pën amëj akëjxm kyajpxëty myëtya'akëty, e ka'ap tjëkyepy pën nyämyëjawëtëty. Jä'ä ko yë Tios yi'iyë tu'uk winë nyija'ap, ets yë'ë y'ijxyp tyuunpy wi'ixjaty pën tii tunyën.

⁴ Jëtu'unyë tuktëjë jotmëkja'ay yë tyi'pxn, ets tyajjotmëktä'äky yë ja'ay mëti'ipë ëmaay amutsk yajpatpën;

⁵ mëti'ipë ënäty ka'ap tii y'ëmaaytyakxëtyën, tyam yajtsiptäkpy ja yiinpë wäänpë; e ja mëti'ipë ënäty yuu'o'këtëpën, tyam ka'ap ja tii t'ëkyaj'ëmaaytyaknë. Ja to'oxytyëjk mëti'ipë ënäty ka'ap tjëkyepyën y'u'unkpaatëty, tyam ni'ik wëxtujk'ok ja y'u'unk të tnayajmëxu'unk'ajnë; e ja mëti'ipë ënäty janty may ja y'u'unk y'ëna'kën, tyam jëtu'un ja jyaak yajpaaty tä yë aay ujts të xyjyotkëtaknën.

⁶ Yë Wintsën yë'ë yäjkpy yë juukyajtën, ets yë'ë pyijkpy jatëkok; yë'ë yajkutujkpy ets o'ktëy njajtmëty nkëpäjtmëty, ets yë'ë yajkutujkpy ets jotkujk nyajpatmëty.

⁷ Yë Wintsën yë yaj'ëyoop ets yë'ë yajkumeeny'ajtp, yë'ë yajkutujkpy ets nkëta'amëty nkëpijpmëty, ets yë'ë jatëkok xyajpëtë'kmëp.

⁸ Tios yajkumeenytyäkpy yë ja'ay mëti'ipë ëyoop jotëkoopyën, ets yajjotkujktäkpy yë ja'ay mëti'ipë o'ktëy yajpatpën. Jam tyajnaaxweetsy ma ja'ay mëj'äämpyëtypë kyäytyën y'uuktën. Jä'ä ko yë Wintsën yë'ë nyiwintsën'ajtyp yë naaxwiinyëtë ets yë'ë kyuwäämpy kyë'ëjotm

⁹ Yë ja'ay mëti'ipë oy mëtuunpën Kyëwent'ajtyp yë'ë oy maa tyimnëjkxy, E yë ëxëëkja'aytyëjkëty jëtu'unyë muum kyupi'its kyukootsëtë ets y'o'knëtë tyëkooynyëtë. Jä'ä ko atsip jyamëta'akantë ka'ap myëta'aktë.

¹⁰ Yë Wintsën piw nuuk yë myëtsip tuna'any mëët yë ënääw mëti'ipë ënäty yajtso'ompyën jam tsajpjotm. Yë Wintsën yë'ë nëjkx tukwinmëtoowta'ay nitu'ukjaty ja naaxwiinyëtë ja'ay wi'ix jyä'äy'atën; nëjkxëp tkutujkënmo'oy ja yajkutujkpë mëti'ipë ënäty yë'ë kë'ëm të twin'ixyën ets nëjkx tyajmëj tyajkëjääjë ja kyutujkën.

¹¹ Ënät ja Elcana ojts wyimpijnë, nyëjkxnë jam Ramá ma ja jyëën tyëjk tmëët'atyën, e ja myaank Samuel ojts jam wyë'ëmnë Siló ma ja tsajptëjkën ets ja Wintsën je'eyë tu'ukyë timmyëtunanë, yë'ë ojts kyë'ëwë'ëmëty yë Eli.

Wi'ix ëxëëk y'ëtë'ëtstën ja Eli ja y'u'unk y'ëna'k

¹² Yë Eli y'u'unk y'ëna'k ëxëëk ijty jyä'äy'atë. Nijä'ä tkatuntë këwentë ma ja Wintsën ja tyuunk yajtuna'anyën,

¹³ ets ijxtëm jyapaatëtën ma tyeety'atën ets tmëtuntën ja naax kajpn. Ko ijty pën Israel ja'ay tmëminy ja wyintsë'kën, ënätyë tkäxtë tu'uk ja tyuunpë mëët tu'uk yë jä'pn.

¹⁴ E ma jap kyi'iyën ja tsu'utsy tu'tsjoty tääts ja tju'tkojy, e ja mëti'ipë jyu'typyën yë'ë ja teety yajtukninëjkxp. Aak jëtu'unën ja ja'ay tuntë mëti'ipë myëmiintëpën ja wyintsë'kën jam Siló.

¹⁵ Näyjyëtu'un ma ënäty ka'ap tnino'oktën ja on jam ma wintsë'këntyaknën, tä ijty myiny tu'uk ja teety ja tyuunpë ets t'ënëëmë ja mëti'ipë ja wintsë'kën yakäämpyën: Mooykyës wäänë yë tsu'utsy wä'änës yë teety ntsaayë, yë'ë tsyojkpy. Jä'ä ko yë'ë ka'ap ënät tkupëkëty jëtu'un kë'ëw, jëtu'unyë tsoky tsuxk.

¹⁶ E ko ja'ay ijty y'ëtsoy ka'ap, jëyëjp tëy n'ukno'okëtyës ja nyi'on täänëm nyakëtyës ijxtëm ja teety timtsyokyën, tääts ja tuunpë y'ëtsoy: ka'ap, mooykyës tyämyë. Pën kajtsës xymyo'oy atsip ënät yam npëjkëty.

¹⁷ E jëtu'unkyëjxm ja poky, mëti'ipë ya'atë ëna'ktëjk tyuuntëpën mëj këjää ënäty nyipäjnë jam Tios wintum, jä'ä ko yë'ë ënäty tyuk'ëyë'këtëp ja Wintsën ja wyintsë'kën.

¹⁸ E ja Samuel oytyuny ijty mëët ja wyit xyox mëti'ipë teetytyëjk yajtuuntëpën ets ja Tios oy tmëtuny.

¹⁹ E winjëmëjt, ko ijty ja tyaak nyijkxy mëët ja nyiye'etyëjk jam ma tsajptëjkën, xëmë ijty tmëminy tu'uk ja nijän mëti'ipë kë'ëm yajkojpyën ets ja myaank tmo'oy.

²⁰ Ko ja Eli jëtu'un t'ijx, tä ijty tkënu'kxy ja Elcana mëët ja tyo'oxytyëjk. Yë Wintsën yë'ë mkumayëtëp mëët ya'atë to'oxytyëjk ets tjaakyajja'tëty yë u'unk maay mëët ko tu'uk të tukmëyoxy ja Wintsën. Ko jyëtu'un'ajty tääts jatëkok wyimpijnëtë ma ja jyëën tyëjkëtyën.

²¹ Ja Wintsën kyënu'kx'ëtëtsyp ja Aná mëjwiin këjää mëët ja u'unk maay. Paatykyëjxm ojts ja y'u'unk myääy tyajmëxu'unk'aty nitëkëëk yë yä'äy'ëna'k ets nimäjtsk yë to'oxy'ëna'k, e ja Samuel ya'k päjt jä'ä jam ma ja Tios tmëtunyën.

²² Ja Eli mëjja'ay'ëtëtsnëp ënäty ni'ikyë, e oy jyëtu'unëty, nyija'awëtyääpy wi'ix ja y'ëna'k y'ëtë'ëtstën, ets yë'ëpaat ënäty mëët y'ijtmujknëtë ja to'oxytyëjkëty mëti'ipë jam tuuntëpën ma yajnitëkën ja wit tëjk ma mëët ja Tios ja näpyaatë y'ityën.

²³ Ënät t'ënëmaay jatëkok ja myaank: Xii yaa yë'ëjës nmëtoopy wi'ix miitsëty ëxëëk m'ëtë'ëtstën. ¿Wi'ixëtën ko jëtu'un mja'ay'atë?

²⁴ U'unk maayëty, jëtu'un tä miits m'ëtë'ëtstën ninu'un kyatimy'oyëty, ëjts tëëjës wa'ats nmëtoy wi'ix yë Tios yë nyaax kyajpn mnimëtya'akëtën.

²⁵ Pën yë ja'ay myëtëkoopy yë myëku'uk, yë Wintsën jyëkyejpy nyipaye'eyëtëty, e pën tu'uk yë ja'ay myëtëkoopy yë Tios. ¿Pën jää nëjkx y'ëknipaye'eyë? Yë'ëjëty ka'ap tmëtoowkujkëtyë oy jëtu'un ja tyeety jya'ënëmaayëtë, jä'ä ko yë Wintsën tëë ënäty tuknipëjktaakë ko yaj'ooka'anëtë.

²⁶ E ja Samuel yä'kp päjtp ja ni'ikyë ets mëti'ipë tyuunpyën y'oy'ijxyp ja Wintsën ets näjyëtu'un ja ja'ayëty.

²⁷ Jä'ä jëmëjt tu'uk yë Tios y'ayuk akajpxpë jyä'äjty ma Eli tyëjkën ets y'ënëmaayë: Jëtu'un yë Tios y'ënä'äny: Mijts yë m'ap m'ok mëti'ipë myëtuuntën yë yajkutujkpë jap Egiptë wa'ats tnija'awëtë ko ojtsës nnänyikëxë'ëkyë ma yë'ëjëtyën,

²⁸ E ma tëkokyë yë Israel ja'ayëtyën, mijts ojts nwin'ixtë etsës xymyëtuntëty ets mteety'atëty. Xyaktëty ja wintsë'kën ets xynyino'oktëty jam ma ja wintsë'këntyaknën, xyajtoytyëty ja poom ets xëmë xymyëët'atëty ja mwitëty mëti'ipë mëteety'atëpën ëjts nwintuuyës. Ojts näjyëtu'un nmo'oyës yë m'ap m'okëty ja jë'kxy pëky tä ja tsyu'utyën mëti'ipë myëmiintëpën ja Israel ja'ayëty ets yë'ë tsu'utstëty tjë'kxtëty.

²⁹ E pën jëtu'un y'ixë'aty tii ko ka'ap xy'ëkmëjpëjktaknëtë ja ayajk ako'onën mëti'ipë ja'ayëty yë Wintsën tyuknimiintëpën. ¿Wi'ix ko ja m'u'unk m'ëna'k jä'ä ni'ik mtsojkpy mja'ap ets këtiinëm ëjts, je'eyë xyajni'kxënyë mëët ja tsu'utsy mëti'ipë myëmiintëpën ëjts nwintuuyës ja Israel ja'ayëty, mëti'ipës nkajpn'ajtypyën?

³⁰ E paaty tyam y'ënanë, ja Wintsën mëti'ipë jëyëjp të y'ënä'änyën ko miits jëtu'un kë'ëyxyëëw kë'ëyjyëmëjt mëtuntëp ja Tios, jëtu'un tyam y'ënä'äny: Ëjts ka'apës jëtu'un n'ëkkupëkanë. Yë'ëjës n'oyjawëjäämpy ja ja'ay mëti'ipës xy'oyjya'apën, e mëti'ipës xy'ixtijpën o'ktëy nëjkx jyäty. Ëjts Wintsën, ëjts ënaanp.

³¹ Tim miimp jajëmëjt jëna'ajës nyaj'atëkoyä'änyën mijts ja mkutujkën ets ja m'ap m'okëty ja kyutujkënëty, yë m'u'unk mto'oxytyëjk nitu'uk nëjkx kyamëja'ayëtë.

³² Nëjkxëp xyjya'ëxëëk'ixy koos ënäty oy nyajjuuky'ajnëtë ja Israel ja'ayëty, mijts yë mjëëky mmëku'uk ka'ap nëjkx nijëna'a jeky jyuuky'atë.

³³ E nëjkxëpës tu'uk mäjtsk nyajwë'ëmy yë mjëëky mëku'uk winkon maas yë nwintsë'këntyaknën ets ëxëëk nëjkx nyäyjyawëtë mëët ja nämyëtsip'atë, ka'ap nëjkx ninu'un tii oy t'ixtë ets ka'ap nëjkx jyotkujk'atë yë jyot wyinma'anyëty; ja wiinkpë ja m'u'unk m'ëna'këty, ja'ay nëjkx yaj'ookëtë.

³⁴ Yë'ë nëjkx xytyuk'ixy wi'ix nimäjtsk ja maank y'ooka'antën mëti'ipë xyëëwajtëpën Finees ets Hofní ets nimäjtsk nëjkx tyim'ooktë jä'ä xëëw.

³⁵ Etsës nëjkx kë'ëm npëjktä'äky tu'uk yë ntuunpë ets tyeety'atëty, mëti'ipës yajxon xymyëtunëpën ejxtëmës n'oyjyawën ets ja y'u'unk y'ok nëjkxëp jeky jyuuky'atë ets xëmë nëjkx mëët yajpaatë ja yajkutujkpë mëti'ipë ënäty ëjts nwin'ijxypyën.

³⁶ Ja ja'ayëty mëti'ipë të jyaakwë'ëmtën juuky ma ja m'u'unk mto'oxytyëjkën nëjkxëp je'eyë jyaak tuunk'amëtowtë ets ja ëna'antëp jeexyë tii yiin wään tjaaktuntë ma ja teetytyëjkëtyën këtiipë yuu'ooktëty.