1 Samuel 1 - Biblia Mixe de Quetzaltepec

Tios tmo'oy tu'uk ja u'unk maay ja Aná

¹ Jam ma tu'uk yë it naaxwiinyëtën ma ja kopkjotmën mëti'ipë Efraín ja'ay nyitënaaytyëpën, jam Ramá, jam ijty tu'uk yë ja'ay tsyëënë, yë'ë Suf yë myëku'uk, Elcana xyëëwajtyp. Yë'ë myaank yë Jeroham ets y'ok'u'unk yë Elihú. Yë y'apteety jä'ä ijty xyëëwajtyp Tohu, yë'ë myaank yë Zuf, yë'ë jyä'äy yë Efraín.

² Yë Elcana mäjtsk ijty yë tyo'oxytyëjk. Tu'uk txëëwaty Aná ets tu'uk Peniná. Yë Peniná yë'ë ijty jam yë y'u'unk, e yë Aná ka'ap.

³ Jëmëjt jëmëjt yë Elcana ijty jam nyijkxy Siló ets ja Tios nëjkx t'ëwtaty ets tmo'oy ja wyintsë'kën. Jam Siló ijty tyuntë nimäjtsk ja myaank ja Elí mëti'ipë teety'ajtëpën: Tu'uk txëëwaty Ofní ets tu'uk Finees.

⁴ Ko ja Elcana ijty tyäky ja wyintsë'kën, pyupëjkpy ja tsu'utsy mëti'ipë myoopyën ja Peniná ets ja y'u'unk y'ëna'k.

⁵ E ja Aná jaakni'ik ijty winë tmo'oy ets aakjä'ä tsu'utsy oyëtypë, mëët jä'äkyëjxm ko jaakni'ik tsoky tjawë, oy ënäty ka'ap ja u'unk maay tpaaty t'ixy.

⁶ Paatykyëjxm ja Peniná ijty y'ëxëëk'ixyë ets wyinwoony tyukxi'ikyë je'eyë ets naxym tpëjktä'äky mëët ko ënäty ka'ap ja y'u'unk.

⁷ Xëmë winjëmëjt, ko jam nyëjkxtë Siló ma ja Tios ja jyëën tyëjkën, ja Peniná je'eyë ijty t'ënaxë ja myëku'uk ets tnëxi'iky tukxi'iky. Paatykyëjxm yë Aná je'eyë xëmë jyi'iy yä'äxy ets ka'ap kyäy.

⁸ Ets ja Elcana ijty y'ënë'ëmxëty: Aná, ¿Tiitën ko mjë'ëy myä'äxy? ¿Wi'ix ko je'eyë mony mtuky ets ka'ap mkay m'uuky? ¿Ti këtiis jëtu'un ntsoopaaty ijxtëm jeexyë nimajk xymyëëtëtyën yë u'unk ëna'kë?

⁹ Tëkok, jam ënäty Siló yajpaatë, tääts yë Aná ajotkumonë y'ëxwä'ätsë'ky, tëë ënäty kyääytya'atë. Ja teety Eli jam ënäty y'u'unyë tsajptëjk ëkë'ëm sillë këjxm.

¹⁰ Ko yë Aná jyä'äjty jam ma tsajptëjkën, tääts tyëjkëy jëëpyë yaxpë, moonpë tujkpë ets kajpxtakpë, tmëpëjktsoy ja Wintsën.

¹¹ Ets ja wyaantakën tpëjktäky, t'ënëmaay ja Wintsën: Wintsën mëti'ipë maaytyääyëpën winë; pën mijts mpa'ëyoopy mnajts'ëyo'owëp ya'atë mtuunpë ets xyjyä'ämyäjtspës koos xymyo'ojëty tu'uk yë u'unk maay, ëjts nkë'ëyakëpës yë'ë ma mijtsën ets mëtunëtëty ets ka'ap ja kyuwaay nëjkx yajkeepy, yë'ë yajtuk'ixëp ko ënäty mijts të ntukmëyoxy.

¹² E ja Aná janty jeky ënäty jam ja Wintsën Tios tmëkajpxnë, ënät yë Eli y'amë'ijxëyë,

¹³ e komë yë'ë winma'anyjoty ënäty je'eyë Tyios'ëwtaty, ka'ap yajmëtoy wi'ixën y'ënä'äny, je'eyë yaj'ixy ja y'aaw yu'kxy, tääts ojts ja Eli myäy tyäjy ko ja Aná wä'änxyëp ja myu'ukyë,

¹⁴ ets t'ënëmaay: ¿Wi'ix ko nëë xykya'ëxmajtsnë? ka'ap ja'ay je'eyë y'uuky jyi'kxy.

¹⁵ Wintsën ka'ap yë'ëkyëjxmëty. Jëtu'un y'ëtsooy yë Aná. Ëjts ka'apës nitii nëë të n'uuky mëti'ipë mëkën, jä'ä tëy mon tukës näjyawëty paatyës yaa të nminy jëëpyë yaxpë Tios wintuuy.

¹⁶ Ijxkëm mijts määpyë mtajpë koos yë'ë tu'uk yë to'oxytyëjk ka'apë wyintëy wyinkujkëtyën, jä'ä tëy ëjts Tiosës të nmëkäjpxy maa të xy'ixyën ëjts një'ëy nyä'äxyës, jä'ä ko mon tukës näjyawëty ets je'eyës nkumon nkutëkë.

¹⁷ Nëjkx akujk jotkujk Jëtu'un y'ënëmaayë ja Eli, yë Tios mëti'ipë Tios'ajtpën ma Israel kajpn, yë'ë mo'ojëtëp mëti'ipë të xy'amëtoy të xypyëjktsoyën.

¹⁸ Tioskujuuyëp, jëtu'un y'ëtsooy yë Aná. Ënät ja Aná ojts wyimpijnë matsow ënäty të myinyën, jotkujk nyäja'awëyënë ets kyääynyë y'uknë, ka'ap nitii t'ëkmaay t'ëktajnë.

¹⁹ Komjëpom, ko ja Wintsën t'ëwtajtaaytyë, ënät ojts tsyo'onëtë ets nyëjkxnëtë jam Ramá ma ja tyëjkëtyën. Ko ja Elcana tmëëtko'knaay ja tyo'oxytyëjk Aná, ënät ja Aná ojts u'unk mëët wyi'imy. Jä'ä ko ja Wintsën ënäty të tpëjktsoy.

²⁰ Tä ja Aná ja y'u'unk myääy tyajja'ajty naaxwiiny ets txëëwmooy Samuel. Jä'ä ko ja Wintsën ënäty të tpëjktsoy.

²¹ Ënät ja Elcana ojts kom jëmëjt jam nyijkxy Siló mëët tëkokyë ja y'u'unk tyo'oxytyëjk ets ja wyintsë'kën tyaka'any mëti'ipë winjëmëjt yäjkpyën.

²² Ja Aná ka'ap ojts nyijkxy, je'eyë ja nyiye'etyëjk t'ënëmaay: Ka'apës nëjkxa'any koonëm ja u'unk maay ja tyi'tsk t'ëxmatsëty. Täänëmës nmënëjkxa'any, etsës ja Wintsën yë'ë ntukë'ëtëkëja'any, jamts wyë'ëmnëty.

²³ Tä ja Elcana y'ëtsoowë: Mijts ix, pën mwë'ëmaanp, oy mwë'ëmëty, koonë ja m'u'unk ja tyi'tsk xytyuk'ëxmatsëty. Yë Wintsën yë'ë tyunëp mëti'ipë të mtukwinwanëtyën. Ojts wyi'imy ets tyajye'ky tyajpejty ja myaank koonëm ja tsi'tsk t'ijxmajtsy.

²⁴ E ko ojts ja tyi'tsk tuk'ëxmajtsnë mutsknëm ënäty oy, ënät ojts tmënëjkxnë ma ja Wintsën ja jyëën tyëjkën jam Siló. Ojts näjyëtu'un mëët tmënëjkxy tëkëëk yë tsajpkaa'u'unk, i'px tëkëëk tsim yë tsajpmokway ets tu'kxuty yë tsatsym nyëë.

²⁵ Ënät ojts tu'uk ja tsajpkaa'u'unk tukwintsë'ëkëtë ja Wintsën ets tukë'ëtëjkëtyë ja u'unk may ja Eli.

²⁶ Tääts ja Aná t'ënëmaay ja teety: Wintsën, ëknamä'kx, jëtu'un ijxtëm mijts mjuuky'ätyën jëtu'un tyiyëty, ko ëjts jëtu'un ja to'oxytyëjk mëti'ipë yaa miinën jëëpyë yaxpë ets kajpxtakpë Tios wintuuy, ma ënäty yaa mijts myajpaatyën.

²⁷ Etsës yë Wintsën n'amëtooy etsës xykyë'ëmo'ojëty tu'uk yë u'unk maay, e yë'ë tëëjës xyäntymyo'oy.

²⁸ Ëjts tëëjës ntuknipëjktaakë, koos yë'ë Wintsën nkë'ëmo'oja'any maapaat jyuuky'ätyën, jëtu'un yë'ë tmëtunëty ja Wintsën. Ënät ja teety Eli nyäkyoxtënaaytyakë ets wyintäky nyaaxkooy, tkukajpxë ja Wintsën.