1 Juan 5 - Biblia Mixe de Quetzaltepec

Ja mëpëjkën mëët yajmëët'aty ja tsojkën ja'awën

¹ Pën myëpëjkpy ko ja Jesús yë'ë mëti'ipë ënäty yajjëjp'ijxpën, Tios ja u'unk'ajtëp; ets pën ja Tios Teety tsyojkpy, näjyëtu'un tsokëty ja Tios u'unk.

² Ko ntsojkmëty ja Tios ets ntu'unmëty mëti'ipë yë'ë tsyojkpyën, jëtu'un nija'awëmëty ko ënäty ntsojkëm näjyëtu'un ja y'u'unk y'ëna'k.

³ Ko ja Tios ntsojkmëty, ja y'ënä'ämën ënäty npatu'unëm ets ja y'ënä'ämën ka'ap tsyiptä'äky,

⁴ tëkokyë pën ja Tios u'unk'ajtëp myëmëtaktääpy ja naaxwiinypë. Ja nmëpëjkën'ajtëm yë'ë xyajmëtakëm naaxwiinyëtë.

⁵ Pën myëpëjkpy ko ja Jesús Tios y'U'unk'atyë, jä'ä myëmëtäkpy ja naaxwiinyëtë winma'any.

Ko ja Jesús yajnikäjpxy ko Tios y'U'unk'atyë

⁶ Ko ja Jesús myiiny yaa naaxwiiny, ijxwë'ëmy ojts wyi'imy mëët ja nëë ko ojts nyëëpety ets mëët ja ne'pyny ko ojts kyëruutspety; ka'ap yi'iyëty nëë, näjyëtu'un ja ne'pyny. Kënu'kxymyëk'ajtën ya'atë yajtëytyëjkëp, jä'ä ko yë Kënu'kxymyëk'ajtën mëtëy yë'ë.

⁷ Tëkëëkpëky nmëët'ajtëm mëti'ipë yajtëytyëjkëpën ko ja Tios t'U'unkëty ja Jesús.

⁸ Ja Kënu'kxymyëk'ajtën, ja nëë ets ja ne'pyny; jëtu'un nitëkëëk tyajtëytyëkëtë.

⁹ Tsojk nmëpëjkëm mëti'ipë nyikajpxpäjtëpën ko ja Jesús Tios y'U'unk'atyë. Ja ni'ik mëtëypyë mëti'ipë ja Tios Teety të tnikäjpxyën ko ja Jesús t'U'unkëty.

¹⁰ Pën myëpëjkpy ja Tios U'unk, jyotjoy wyinma'anyjoty ja y'ity ko ja Jesús Tyios y'U'unk'atyë. Pën ka'ap tmëpëky, jëtu'un ja Tios tyajnaxy ijxtëm jeexyë wyin'ëënyën; jä'ä ko ka'ap ja y'aaw y'ayuk tmëpëjkë ijxtëm ja y'U'unk tnimëtyä'äkyën.

¹¹ Ya'atë mëpëjkën yë'ë xytyuknija'awëm ko ja Tios të xymyo'oyëm ja juukyajtën xëmëkyëjxmëpë, ets ya'atë juukyajtën jam yajpaaty ma y'U'unkën.

¹² Pën ja Tios U'unk myëët'ajtyp, myëët'ajtyp ja juukyajtën xëmëkyëjxmëpë. Pën ka'ap tmëët'aty ja Tios U'unk, ka'ap ja juukyajtën tmëëtëty.

Ko ja Juan ja kajpxwijën ets ja kajpxpo'kxën t'ëkjaakyajknë

¹³ Tyam miits nnijäyëtë jënu'un ja Tios U'unk xymyëpëktë ets xynyijawëtëty ko xymyëët'atë ja juukyajtën xëmëkyëjxmëpë.

¹⁴ Yë'ë ja Tios ntuk'ijxpäjtëm, jä'ä ko nnija'awëm ko n'amëto'owmëty winë ijxtëm yë'ë tsokyën myëtoopy yë'ë.

¹⁵ Jëtu'un ijxtëm të nnija'awëm ko ja Tios tmëtoy ja nnu'kxtakën'ajtëm, näjyëtu'un ëëts nnija'awëmë ko nmëët'ajtëm ja mëti'ipës të n'amëto'owëmën.

¹⁶ Ko pën ja myëku'uk t'ixëty ko tam pyokytyuny ets jä'ä ja poky mëti'ipë ka'ap yaj'ookyën, tuknija'amyätsëtë ja Tios ets ja Tios yajjuuky'atëtëty, ënät jëtu'un pën jä'ä ja poky mëti'ipë ka'ap yaj'ookyën. Jä'ä ko tää poky mëti'ipë yaj'o'kpën, ko pën tääpë jëtu'unpë poky tuny, ka'ap tjëkyepy ja Tios yajtuknija'amyätsëty.

¹⁷ Aak tim poky yë'ë mëti'ipë tuuntëko'oyën'ajtpën; je'eyëp ko tää poky ka'apë yaj'ookyën.

¹⁸ Nnija'awëm pën ja Tios tyeety'äjtypyën, ka'ap ja pyokytyuny, jä'ä ko Tios U'unk këwent'ajtëp ets ka'ap ja ëxëëkpë pyäätyë.

¹⁹ Nnija'awëm ko ëëtsajtëm Tios xyjyä'ä''ajtëm, tu'kë'ëyë ja naaxwiinyëtë atsojkën ku'oypyë jä'ä'ajtëp.

²⁰ Nnija'awëm näjyëtu'un ko paaty ja Tios U'unk të xynyimi'inëmë ets nnija'awëmëty ja Tios tëyajtënpë. Yë'ë mëët njuuky'ajtëm mëti'ipë mëtëyën, jä'ä jëtu'un ja y'u'unk Jesukristë. Mëtëypyë ja Tios, mëti'ipë yäjkpyën ja juukyajtën xëmëkyëjxmëpë.

²¹ U'unk ëna'këty, näy'ijx'it näkyëwent'atëtë, këtiipë yë'ë xy'ëwtatëty mëti'ipë ka'ap Tyiosëtyën.