Zacarías 5 - Biblia Dc en Mixe de Quetzaltepec

Ma yajwinkëma'ayën ja noky axaatsy

¹ Ojtsës jatëkok nwinkumaakojnëpë, yë'ëjës nwin'ijx tu'uk yë noky axaatsy, pojëtijtp.

² Ënet ja tsajpjotmëtë kukäjpxy xyajtëëyës: ¿Tii m'ijxyp? Ets n'ëtsooyës: Noky axaatsyës n'ijxyp, pojëtitp; i'px kë'ënux yenyëty ets majk kë'ënux myëjwiinëty.

³ Ënet xy'ënëmaayës: Yë'ë mäjtsk it miimp kuja'ay yë pojkën. Tu'kpa'a tnikäjpxy ko ka'ap jëtu'unyë nyinaxa'any nyëë pyoky mëti'ipë nëkoo je'eyë Dios tyukajpxpejtypyën ets tu'kpa'a tnikäjpxy ko yajtëytyuna'any mëti'ipë toonp mä'tspën.

⁴ Yë Wintsën mëti'ipë maaytyääyëpën winë jëtu'un y'ënä'äny: Jamës ya'atë pojkën nyajkëta'aka'any mëti'ipë miinpën kuja'ay ma ja'ayën mëti'ipë toonp mä'tspën ets mëti'ipë nëkoo je'eyë wyäämpyën yë nxëëwës ëëwpäjn kajpxpäjn. Ets ya'atë pojkën ënätnëm jyëwa'aka'any ko ënety tëë kyëjxta'ay mya'ta'ay ja tëjkwitsë ets ja tsaa.

Ma yajwinkëma'ayën ja kijpxën ets ja to'oxytyëjk

⁵ Ënet jatëkok pyëtsiimy ja tsajpjotmëtë kukäjpxy mëti'ipës mëët nmëtyä'äkyën etsës xy'ënëmaay: Yajxon xy'ixëty mëti'ipë tyam pëtsëmaanpën.

⁶ Etsës nyajtëëy: ¿Tii yë'ë? Tääts të xy'ëtsoyës: Kijpxën yë'ë. Yë'ë yajtukijpxaanp yë nyëë pyokyëty yë ja'ayëty mëti'ipë kajpnjoty tsënaaytyëpën.

⁷ Ja kijpxën yë'ë mëët nyijupyëty yë yu'unk pujxn. Ënet yajyujktëëy ja ajup, e jap apëjkënjoty yë'ë jap ënyääpy tu'uk yë to'oxytyëjk.

⁸ Ënet xy'ënëmaayës ja tsajpjotmëtë kukäjpxy: tääpë to'oxytyëjk yaj'ixyën, ëxëëkajtën yë'ë. Ënet jatëkok jap tkutijëy ma ja apëjkënën ets tyaj'ëtujky.

⁹ Ix jatëkok ets të n'ijxyës mäjtsk ja to'oxytyëjk. Aaktam yë kyäknëty, jëtu'unyë pyojëtitë. Jëtu'un kyäkn yaj'ixtë wojnykyäknën ets tam twijts'itë ja kijpxën pojjoty.

¹⁰ Ënet nyajtëëyës ja tsajpjotmëtë kukäjpxy, mëti'ipës ënety mëët nmëtyä'äkyën: ¿Maaxën tääpë kijpxën tmënëjkxtë?

¹¹ Ets xy'ëtsooyës: Jam Babilonyë nyëjkxtë ets jam tkojanëtë tu'uk yë nyitsajp tëjk. Ko ënety ja nyitsajp tëjk tkoj'apaatëtë, tääts jap tpëjkta'aka'antë ma ënety të yajnipotsën.