Zacarías 2 - Biblia Dc en Mixe de Quetzaltepec

Ma yajmëkajpxtën mëti'ipë wiink naax wiink kajpn tsumy matsy ijtëpën

¹ Ojts jatëkok nwinkuma'ayës. Tu'ukës yë ja'ay n'ixy yë'ë kyë'ëwits'ajtyp tejxyp mëti'ipë mëët yë ja'ay winë tkijpxyën.

² Täätsës të nyajtëy: ¿Maa mnëjkxy? Etsës të xy'ëtsoy: Yë'ëjës nëjkx yë Jerusalén kajpn nkijpxa'any ets yajnijawëty jënu'un myëjwiinëty ets y'ayenyëty.

³ Ënätës të n'ixy tam nyijkxy ja tsajpjotmëtë kukäjpxy mëti'ipë ënety mëët të nmëtyä'äkyënës ets të nyipëtsëmyë jam wiinkpë tsajpjotmëtë kukäjpxy

⁴ ets të y'ënë'ëmxëty: Nëjkx pëyi'ikyë ënëëmë tääpë ja'ay mëti'ipë jam myënëjkxypyën yë tejpxy mëti'ipë winë yajtukijpxpën: Yë Jerusalén kajpn wintukaanp jatëkok mëët yë mayjyä'äy ets may jëyujk may tsyajpkaa, ka'ap nëjkx tjëkyepy wi'ix yajnapotsëtyën ja kajpn.

⁵ E yë Wintsën yë'ë ënaanp: Ëjts jëtu'un wa'anaanp kajpnnapotsën jëënmëëtpë ma Jerusalén kajpn pa'ajën ets kajpn itkujky nyaj'ita'anyës yë nmëj'ajt n'oyajtënës.

Yë Wintsën yajtso'okäämpy yë nyaax kyajpn

^6-7 Jëtu'un yë Wintsën y'ënä'äny: Ëjts të n'ëwa'atsy ets miitsëty axit ako'owë mjatëty wiink naax wiink kajpn. E tyam jëtu'unës n'ëna'any: Käkpëtsëmtë jam ma ja naax kajpnën, jam anëkëxmtsow. Käkpëtsëmtë jam Babilonyë, ma myajpaatën tsumy matsy, miitsëty mëti'ipë ijty tsënaaytyëpën jam Sión. Ëjts Wintsën, ëjts ënaanp.

^8-9 Yë Wintsën mëti'ipë maaytyääyëpën winë tëëjës yë aaw ayuk xytyukmëkäxë ma ja naax kajpnën mëti'ipë ojts määtsëtën: Pënës yë nkajpn ëxaty tyuunpy, ëjts yë nwintsaa yajtsëtyujtyp, paaty tääpë naax kajpn kë'ëmës mëët ntsiptuna'any etsës nyajkutëkoyä'äny, ëxëëk nëjkx tyunyë mëti'ipë ënety yaj'ëyoopy yajmëtuumpyën. Jëtu'un yë Wintsën yë myëj'ajt y'oyajtën tyajnikëxë'ëka'any ets xyjyä'äkyukëtëty ko yë'ëjës të xykyexy.

¹⁰ Jëtu'un yë Wintsën y'ënä'äny: Ëwtë ya'axtë akujk jotkujk, miitsëty Jerusalén ja'ayëty, jä'ä ko tëëjës nminy ets ntsëënëja'anyës ma miitsëtyën.

¹¹ Ko ënety jëtu'un tyunyë jyätyë, may yë naax kajpn tnimina'any yë Wintsën. Ets Wintsën nëjkx y'ënä'äny: Tyaapë kajpnëty nän ëjts yë nkajpn. Ënätës nëjkx ntsëënë ma miitsëtyën. Jëtu'un nëjkx xywyinjawëtë ko yë Wintsën mëti'ipë maaytyääyëpën winë yë'ëjës të xykyexy.

¹² Nëjkxëp ja Wintsën jatëkok tjä'äpëky yë Judá kajpn ets nëjkx wa'ats tyajnaxy yë Jerusalén kajpn, mëti'ipë të twin'ixyën.

¹³ Wä'än ni'ëmukë ja'ay t'ëmoonta'atë yë'ë wyintuuy, jä'ä ko yë'ë jam të tsyoony ma y'ijtaknën wa'atspë ets të xynyimi'inëmë yaa ëëts'ajtëmë.