Zacarías 13 - Biblia Dc en Mixe de Quetzaltepec

¹ Jä'ä xëëw tu'uk yë nëëkopk kyupëja'any ets nëjkx jam yë pyoky ets y'ëxëëk'ajtënëty t'ixtsi'iwtë yë David yë y'u'unk y'ok mëti'ipë jam Jerusalén tsënaaytyëpën.

² Nyajkutëkoyäämpyës tëkokyë yë awinax mëti'ipë yajpatëpën ma naax kajpnën, këtiipë pën t'ëwtatëty. Njëpëkäämpyës näjyëtu'un yë käjpxynyajxpëtëjk ets ëxëëk poj. Ëjts Wintsën, ëjts ënaanp,

³ paaty ko ënety pën kyäjpxynyaxa'any ets tukajpxpätëty yë Dios, yë'ë nëjkx kë'ëm tyeety tyaak y'ënë'ëmxëty: Mijts m'ookëp ënät, jä'ä ko mwin'ëënaanp je'eyë ko m'ëna'any ko yë Dios yë y'aaw y'ayuk xynyikajpxanëyë. Kë'ëm nëjkx ja tyeety tyaak tyukmoxmëtijëty ja tëypyujxn ko ënety nyäyajnaxyë käjpxynyajxpë.

⁴ Jä'ä xëëw ja käjpxynyajxpëtëjkëty je'eyë nëjkx tsyëtyuntë jyääypyätë ko ënety nikajpxtë nyätyijyë mëti'ipë të t'ijxpëtsëmtën. Ni pën nëjkx kyawin'ëëny oy ënety tjapëjktä'äky ja po'o'ak mëti'ipë yajtuuntëpën yë käjpxynyajxpëtëjkëty,

⁵ ni'ikyënëm nëjkx y'ëna'antë: Ëjts ka'apës nkäjpxynyajxpëty, naaxtuunpë ja'ayës ëjts. Mutsknëmës mpatso'ontä'äky yë naax tuunk.

⁶ Ets ko pën tyajtëwëty: ¿E tiixën ko mtsëtyutëty? ets nëjkx yë'ë y'ëtsoy: Jamës ja'ay të xyajtsëtyuty ma tyëjkën yë ja'ay mëti'ipës mëët oy nämyäyën.

Yë Wintsën yë'ëjës nTios'ajtyp

⁷ Yë Wintsën mëti'ipë maaytyääyëpën winë, jëtu'un y'ënä'äny: Pëtë'ëk, tëypyujxn, nipëtë'ëk yë kupixyny këwent'ajtpës ets nipëtë'ëk yë ja'ay mëti'ipës xypyutëjkëpën. Yaj'ook mëti'ipë kupixyny këwent'ajtpën ets kyääkwa'kxta'atëty yë kupixyny, etsës mëtsip n'awinpita'anyës ma ja kupixynyëtyën.

^8-9 Jawäänkakujkxwä'kxy nëjkx y'ooktë mëti'ipë yajpatëpën ma ya'atë naax kajpnën: Je'eyë nëjkx wyë'ëmtë juuky nän jawäänë kyakujkwä'kxyëty. E tääpë ënety juuky jyaakwë'ëmtën jëënjotyës nyajnaxa'antë; jëtu'unës nyajwintooywya'atsa'antë tä yë poop pujxn wyintooywyä'ätsyën, etsës nyajwa'atsa'any tä yë ja'ay pu'ts pujxn tyajwa'atsyën. Ënet nëjkx xymyëkajpxtës etsës nëjkx n'ëtsowtë. Ets nëjkx ntijtës Kajpn mëti'ipës nKajpn'ajtypyën, ets nëjkx xy'ëtsowtës: Yë Wintsën, yë'ë ëëts nTios'ajtëp. Ëjts Wintsën, ëjts ënaanp.