Zacarías 1 - Biblia Dc en Mixe de Quetzaltepec

Ma ja Wintsën twoowtsoyën ja nyaax kyajpn

¹ Ma mëtuktujk po'o y'änyën ja mëmäjtskjëmëjtpë, ma ja Darío yajkutukyën, jää ojts yë Dios tmëkäjpxy yë Zacarías käjpxynyajxpë, yë Berequías yë myaank, yë Idó y'ok'u'unk. Ets t'ënëmaay:

^2-3 Ëjts Wintsën, mëti'ipë maaytyääyëpën winë, mëkës ojts ntukjoot'anpëky yë m'ap m'okëty, paaty xy'ënëëmëty tyam yë naax kajpn, ko ëjts ënaanp: Wimpitë ma ëjtsën, etsës miitsëty niwinpittëty, Ëjts Wintsën, ëjts ënaanp.

⁴ Këtii jëtu'un m'ëtë'ëtstë tä ja m'ap m'okëtyën, mëti'ipë ojts ja nkäjpxynyajxpës jya'ënë'ëmxëtën ets t'ëxmatstëty ja y'ëxëëktu'un y'ëxëëk kajpxënëty ets ja y'ëxëëk winma'anyëty, yë'ëjëty ka'ap kyäjpxymyëtoowtë ets ka'ap kyäjpxyjyä'äykyujkëtyë. Ëjts Wintsën, ëjts ënaanp.

⁵ E tyam, ¿maa ënät ja m'ap m'okëty? ¿wä'än jëtää yë käjpxynyajxpëtëjk xëmë jyuuky'atë?

⁶ E yë n'ayukës ets n'ënä'ämënës, mëti'ipës ënety të ntuknipëktën ja nkäjpxynyajxpëtëjkës, ojts pyaatëtë yë m'ap m'okëty. Yë'ëjëty ojtsës xynyiwinpitë ets ojts tja'akyukëtë ko paatyës ënety o'ktëy të nyajjat të nyajkëpätë jä'ä ko jëtu'unëtën ënety nyitëkëtë ja y'ëxëëktu'un y'ëxëëkkajpxënëty, ko ka'ap ënety tii oy të tuntë.

Ma yajkuma'ayën ja kwaay ets ja këwaaytyuk'u'unyääpyë

⁷ Ya'atë aaw ayuk ojts yë Wintsën xymyo'oyës, ëjts Zacarías, Berequías yë myaank, Idó yë y'ok'u'unk. Ma y'i'px taxk anyën yë mëmajktu'ukpë po'o, mëti'ipë tyijtëpën Sabat, ma mëtëkëëk jëmëjt yajkutukyën yë Darío.

⁸ Kootsës nwinkumaay: Nwin'ijxyës tu'uk yë ja'ay, kwaay tyuk'ënyääpy. Jam joyjotm tyänë, ujtsjoty, jëtu'un yaj'ixy ja ujts xunpoxën ets jam ix'am kanaak kwaay nyatänëty, tam mëti'ipë tsaptsën, naje'eyë yëkën ets poopën.

⁹ Etsës nyajtëëy: Wintsën, ¿pën ja'ay tääpëty mëti'ipë kwaay tyuk'u'unyääytyëpën? E tsajpjotmëtë kukäjpxy mëti'ipë ënety jam mëët nmëtyä'äkyënës, xy'ëtsooyës: Tyam ntuk'ixëty pën yë'ëjëty.

¹⁰ Ënet xy'ënëmaayës mëti'ipë xim yajpatëpën ujtsjotm: Yë'ë Wintsën të kyäxëtë ets tukjëtitëtëty yë naaxwiinyëtë.

¹¹ Ja ja'ayëty mëti'ipë ja kwaay tyuk'u'unyääytyëpën, mëti'ipë jam ujtsjotmëtyën, ënät t'ënëmaaytyë ja tsajpjotmëtë kukäjpxy: Tëës ntukjëtijtëtya'atë ja naaxwiinyëtë, jotkujk ja'ay yajpaatë ets ka'ap tiijotmay tmëët'atë.

¹² Ënet ja Wintsën ja tyäjpjotmëtë kukäjpxy y'ënäny: Wintsën mëti'ipë maaytyääyëpën winë, tëkë'px majk jëmëjt tyam nyëjkxnë ma mijts xymyëtsipë'atyën yë Jerusalén kajpn ets tëkokyë yë Judá kajpn. ¿Jënaak jëmëjt jyaak naxa'any etsës xymyëët'atëty ja pa'ëyo'ow mnajts'ëyo'owën?

¹³ Ënet ja Wintsën t'ëtsooy mëët tu'uk yë aaw ayuk oypyë mëti'ipë yajjotkujkëpën, ja tsajpjotmëtë kukäjpxy mëti'ipës ënety xymyëmëtyakpën,

¹⁴ ets ja tsajpjotmëtë kukäjpxy xytyuknipëjkyës ets nimëtya'akëtyës ja aaw ayuk: Jëtu'un yë Wintsën y'ënä'äny, mëti'ipë maaytyääyëpën winë: Ëjts nëkooyës ntsojknë nja'awënë yë Jerusalén kajpn ets Sión kopk.

¹⁵ Paatyës të ntukjoot'anpëky tääpë naax kajpn mëti'ipë ka'ap tii tmaytyën tajtën, mëti'ipë ojts ni'ikyë ja jotmay t'ixkukëtën maas ënety ëjts të njoot'anpëkyën.

¹⁶ E paaty n'ëna'anyës, ëjts Wintsën: Mpa'ëyoopyës ja Jerusalén kajpn, paatyës yam nyajkutukäämpy ets ja tsajptëjk ets ja naax kajpn jatëkok yajkoj o'oyëtya'atëty.

¹⁷ Ojtsës näjyëtu'un ja tsajpjotmëtë kukäjpxy xy'ënëëmë: Nikajpx ya'atë aaw ayuk: Yë Wintsën mëti'ipë maaytyääyëpën winë, jëtu'un y'ënä'äny: Ëjts nyajkutukäämpyës ets nnaax nkajpnës jyotkujkta'akëty jatëkok; njotmëkmo'ojäämpyës jatëkok yë Sión kajpn etsës nikajpxa'any ma ja naax kajpnën ko yë Jerusalén kajpn yë'ëjës jatëkok të nwin'ixy.

Ma yajwinkëma'ayën ja tsajpkaawaj ets ja pujxnka'tspë

¹⁸ Ojtsës näjyëtu'un jatëkok nkumaakojnëpë, yë'ëjës yë tsajpkaawaj taxk n'ijxyp.

¹⁹ Ënätës nyajtëëy ja tsajpjotmëtë kukäjpxy wi'ix nyiwija'any tääpë taxkpë tsajpkaawaj, etsës xy'ëtsooy: Ya'atë tsajpkaawaj taxkpë xy'ixyën yë'ë nyikäjpxyp yë yajkutujkpëtëjk mëti'ipë ojts t'ëxwoptën ja Judá ja'ayëty, Israel ja'ayëty ets Jerusalén ja'ayëty ets tnajtswojpëtyë ma wiinkëtypë naax kajpnën.

²⁰ Ënet ja Wintsën näjyëtu'un xytyuk'ijxyës taxk ja ja'ayëty mëti'ipë pujxn'atsaaymyujktëpën.

²¹ Etsës nyajtëëy ja tsajpjotmëtë kukäjpxy: Tyaapë ja'ayëty mëti'ipë pujxn atsaaymyujktëpën ¿tii të tnimintë? Etsës xy'ëtsooy: yë'ë të tmëmintë ets tpëjkëja'antë yë kyutujkën yë naax kajpn, mëti'ipë ëxëëk yë Judá ja'ayëty të tuntën, jëtu'un tä yë pujxn atsaaymyujkpë tjë'tuktën yë tsajpkaawaj.