Tito 3 - Biblia Dc en Mixe de Quetzaltepec

Mëti'ipë mëpëjkpëtëjk paat'ajtëtëp tuntëty

¹ Tukja'amyäts ja mëpëjkpëtëjkëty ets twintsë'ëkëtëty ja yajkutujkpë ets ja kutuunktëjk, wä'än xëmë winë oy tuntë mëti'ipë yajkutujkpë tuk'ënä'ämëtëpën.

² Ka'ap pën tni'oj tniyaaxëtëty, mä'kxtuktëp, ja'akyukëtë, yajnikëxë'ëktëp ja yujyajtën tëtä'äkyajtën winë'aaw winëjot ma ja ja'ayëtyën ni'ëmukë.

³ Tëëyëp näjyëtu'un ijty ntsuu'ajtëmë, ka'ap nmëmëto'owëm ja Dios, tëkoy ijty nyajpatëmë. Ja atsojkën ets mëti'ipë ni'ik ntukjotkëtakëmën yë'ë ijty xyaj'ijtëm ijxtëm ja mëtuunpën ëne'empyë y'ityën. Ëxëëk ijty nja'ay'ajtëmë, ntuk'ëxëëk'ijxëm ijty winë ja nmëku'uk'ajtëmë, ëxëëk ijty nyajpatëmë ets ëxëëk näy'ijxëmë xim yam.

⁴ E ko ja Dios yajnitsokpë ojts tyaj'ixyë ja y'oyajtën ets ja tsyojkën ma ja naaxwiinyëtë ja'ayën,

⁵ ënät ojts xyajnitsokëm, ka'ap yë'ëkyëjxmëty ko oy tii ntu'unëmë, yë'ëkyëjxm ko ojts xypya'ëyo'owëmë ets të xymyo'oyëmë ja jempyë juukyajtën mëët ka kënu'kxymyëk'ajtën.

⁶ Ja nWintsën'ajtëmë Jesukristë, mëti'ipë yajnitsokpën, tëë xymyo'oyëmë ja Kënu'kxymyëkajtën mëjwiin këjää,

⁷ ets oy nwë'ëmëty mëët ja Dios yë y'oyajtën, jëtu'un npatmëty xëmëkyëjxm ja juukyajtën.

⁸ Tëyajtën ya'atë, ntsojkpyës ets xynyikajpxëty mëk'äämpy, wä'än ja oypyë tuntë mëti'ipë ja Dios myëpëjktëpën. Oy ya'atë ijxpëjkën tu'unxëtëp ja ja'ay oypyënëty.

⁹ Këtii xykyupëkëty ets ja ja'ay nëkoo atsuu apoj tii tyajkäjpxykyojtëty, ëkë nëkoo tii apmëtyä'äky tnanimëtya'aktëty, ma ja ja'ay ka'ap nyäjyä'äkyukëtën wi'ix ja Moisés ja tyiyajtën y'ënä'änyën. Ya'atë jëtu'unpë näkyäjpxytsyiikë nëkoopë je'eyë xëëw tiempë tyajtëkoy.

¹⁰ Pën jam pën tyajnäwya'kxa'anyë ja mëpëjkpëtëjk, wiinkukajpxë tëkok ëkë mäjtsk ok; pën ka'ap mmëmëtoyë, tim käjxpëtsëm ma ja mëpëjkpëtëjkëtyën.

¹¹ Nijawë ko ya'atë ja'ay tëë tyëkooynyë ets tëë ja kyë'ëmpoky kë'ëm yajnitujkëyënë.

Ko ja Pablo tuunknipëky ja Tito

¹² Ko mijts ntuknikäxëty ja Artemas ëkë ja Tíquico, tun mëyajtën mnëjkxëp jam Nicópolis, jëtu'unës të ntuknipëjktaakë koos jam nyaxa'any ja potm.

¹³ Mo'o ja putëjkën ja nikajpxtutpë Zenas ets ja Apolo mapaat mmëtä'äkyën këtiipë tii myëyajtxëtëty ma tyu'uye'eytyën.

¹⁴ Wä'än näjyëtu'un ja nmëku'uk'ajtëmë tjatë ja oyajtën wi'ix ja myëku'uktëjk tputëkëtëty mëti'ipë tii yajmëyajtëpën ets ja jyuukyajtën tyajtuntëty.

Ko ja kajpxpo'kxën ets ja kënu'kxën tjaakyäky

¹⁵ Ni'ëmukë tkäxtë ja kajpxpo'kxën mëti'ipës yam mëëtën. Kajpxpo'kx ja nmëku'uk'ajtëmë mëti'ipë mëët nämyä'äyëmën, mëti'ipë ni'ik yajmëku'ukja'apën. Wä'än ja Dios mkënu'kxëtë ni'ëmukë.