Tito 1 - Biblia Dc en Mixe de Quetzaltepec

¹ Ja nyoky ja Pablo, Dios mëtuunpë ets Jesukristë y'ayuk kajpxwa'kxpë, mëti'ipë të yajkexyën ma ja ja'ayëtyën tëëpë ja Dios wyin'ixëtën ets tpaatëty ja mëpëjkën ets nijawëtëty ja tëyajtën mëti'ipë yajpatpën ma n'ijxpëjkëmën,

² mëti'ipë ijtpën ko yajjëjp'ixy ja juukyajtën xëmëkyëjxmëpë. Dios ka'apë y'antä'äkyën, mëti'ipë ya'atë juukyajtën ojts twinwanën ka'anëm ënety yë naaxwiinyëtë tsyo'ontä'äky,

³ ets tyam, ko tiempo të tpatnë, tëë xytyuknija'awëmë ja y'aaw y'ayuk mëti'ipës nkajpxwä'kxypyën, mëti'ipës ja Dios yajnitsokpë ojts xytyuk'ëne'emyën.

⁴ Tyam ya'atë noky ntuknijayë, mijts u'unk Tito mëët ko mëpëky. Ja nTeety'ajtëm Dios mëët ja yajnitsokpë Jesukristë, yë'ë mmo'ojëtëp ja kënu'kxën ets jotkujk'ajtën.

Tito tyuunk jam Creta

⁵ Ko mijts ojts nyajwë'ëmy jam Creta, yë'ëkyëjxm ets xyaj'apaatëty ja tuunk mëti'ipë ënety jam apaatëjaanpën ets xypyëjkta'akëty mëti'ipë nyimëjja'ay'atëpën ja mëpëjkpëtëjk ma ye'eymyuktën, jëtu'un ijxtëm ënety të ntuknipëkyën.

⁶ Yë'ë mtuknipëkëp ja tuunk mëti'ipë oy tsuj juukyajtpën, këtiipë tii yajtuknikajpxëty, mëti'ipë tu'ukyë myëët'ajtypyën ja tyo'oxytyëjk, mëti'ipë y'u'unk y'ëna'k mëpëjktëpën, ka'ap kyäjpxykyumëtoownaxtën, myëmëtowtëp ja tyaak tyeety ets këtiipë tii yajtukni'ojëtëty.

⁷ Mëti'ipë nyikopk'atëpën ja Dios ja nyaax kyajpn yë'ë mëpaat t'ixy ttuny mëti'ipë Dios y'oyjya'apën, paaty kyopkpëkyëty ets oy tsuj jyuuky'atëty. Ka'ap kyujuunta'akëty, ka'ap wyin'äkë'atëty, ni kya'uuk kyamu'ukëtëty, ni tsip tka'ixta'ajëty, ni meeny tka''atsokëty

⁸ Ni'ikyë xëmë ja ja'ay tyajjajta'akëty oy tsuj ma tyëjkën; oy winë tunëty, wijy kujk jyä'äy'atëty, ka'ap tii tuuntëkoyëty ets mëtëy tyu'uye'eyëty.

⁹ Yë'ë mëti'ipë tyuk'o'kpejtypyën ja ijxpëjkën mëti'ipë të yajtukni''ixën ets näjyëtu'un ja ja'ay wiinkëtypë tjotmëkwinkajpxëty mëët ja ijxpëjkën oypyë ets tukja'akyujkëty mëti'ipë tëkatsy nyimëtyaktëpën ja Dios ja y'aaw y'ayuk.

¹⁰ Jä'ä ko tää ja'ay jyatëtë mëti'ipë je'eyë käjpxy kyumëtoownajxtëpën, mëti'ipë judá ijxpëjkën winma'any tyuk'ijtëtëpën; mëti'ipë je'eyë tyäty mëtyaktëpën ets wyin'ëëntë.

¹¹ Ya'atë ja'ayëty, ka'ap mëpaat nyajkajpxëmë, yajma'tëp ja ja'ay tu'kjëën tu'ktëjkpë ets tyuk'ijxpëjktëp mëti'ipë ka'ap pyaat'atyën ets tpaatëty ja meeny.

¹² Ojts tu'uk yë ja'ay y'ity Creta ja'ay, yë'ë jyiiky myëku'uk nyimëtyäkpy ets y'ënäny: Yë Creta ja'ayëty, je'eyë y'anta'aktë, na'uk najëyujkën yë'ë jyä'äy'atë, käx ets nuuxëty.

¹³ Ets tëy ojts y'ënä'äny, paaty xywyinkukajpxëty mëk'äämpy ets tu'ukyë tmëpëktëty ja Wintsën,

¹⁴ këtiipë mëjmëtoy tjawëtëty yë apmëtyä'äky mëti'ipë jutië ja'ay kë'ëm mya'kxtëpën, mëti'ipë ënä'ämtëpën ets mëti'ipë pyäjxtëpën ja tëyajtën.

¹⁵ Pën myëët'ajtëp ja jyot wyinma'any wa'ats, aak wa'ats winë t'ixtë; e mëti'ipë ka'ap ja jyot wyinma'any y'oyëtyën ets ka'ap tmëpëktën ja Dios ka'ap tii wa'ats t'ixtë. Jä'ä ko ëxëëk ja jyot wyinma'any tmëët'atë.

¹⁶ Jëtu'un y'ëna'antë ko Dios t'ixy'atë, je'eyëp ko tii tuntë jëtu'un yaj'ixy ka'ap yowë t'ixy'atë, ëxëëk'ijxtëp ets käjpxy kumëtoownajxtëp, ka'ap tukjatë wi'ix tii oy tuntëtyën.