Salmos 98 - Biblia Dc en Mixe de Quetzaltepec

Salmo 98 Yë Tios tëë myëtä'äky tsipjoty

¹ Tukwin'ëwtë ja Wintsën ja ëy yä'äxy jempyë, jä'ä ko mëj këjää myëj'ajtën të tyaj'ixyë. Tëë myëtä'äky jam tsipjotm mëët ja myëk'ajtën ets ja kyutujkën wa'atspë.

² Yë Wintsën tëë tnikäjpxy ko myëta'aka'any, tëë tuk'ixy yë naax kajpn wi'ix oy winë tunyën ets wi'ix winë tpaye'eyën mëtëy;

³ tëë tyajnikëxë'ëky ko tmëëtëty yë oyjyot oywyinma'any, ets tëë tuny mëti'ipë të tuknipëjktaakën ma Israel kajpnën, Mapaat yë naaxwiinyëtë y'ëwtityën të yajnijawë ko Tëyajtën ko tëë tmëmëtakta'ay yë myëtsip.

⁴ Jotkujk win'ëw winya'axtë yë Dios, tëkokyë miitsëty jënu'un m'itën naaxwiiny naaxkëjxy; akujk jotkujk ëwtë ya'axtë ets tukxoonta'aktë mëët yë ëy yä'äxy.

⁵ Win'ëwtë yë Wintsën mëët yë kow, tukpa'ëna'antë tëkokyë oymyëti'ipë kowëty.

⁶ Jotkujk win'ëw winya'axtë yë Wintsën, mëti'ipë mëj ënä'ämpë'ajtpën, ets tukpa'ëna'antë yë xuxn.

⁷ Wä'än t'ëëtsy tkomy yë nëëmejy akujk jotkujk ets tëkokyë jënu'un jap winë y'ityën ets näjyëtu'un yë naaxwiinyëtë, wä'än jotkujk t'ity mëët nitëkokyë jënu'un jam tsyëënëtën jyuuky'atën;

⁸ wä'än yë mëjnëë jotkujk näjyawëty, ets wä'än nämyujkta'ajëtë tun kopk ets xi'iky xony yajpaatëty mëët yë jotkujk'ajtën,

⁹ jam Wintsën wintum mëti'ipë yajkutukaanpën yaa naaxwiiny. Yë'ë jä'ä t'ënä'äma'any yë naax kajpn mëët ja tëyajtën ets ja tu'knaxajtën.