Salmos 97 - Biblia Dc en Mixe de Quetzaltepec

Salmo 97 Yë Wintsën yë'ë mëj kutujkën'ajtp

¹ Xoonta'aktë naaxwiinyëtë apëtsëmy, xoonta'aktë miitsëty naax kajpn tu'këëyi'ikpyë muum yajpaatën mejyjoty, Yë Wintsën, yë'ë yajkutujkp.

² Na'ëwtity yajpaaty mëët yë yoots, yë mëtëypyë nipaye'eyën ets oypyë ja kuttujkën yë'ë jeky yaj'ijtyp ja kyutujktakn.

³ Tu'uk yë mëj jëën nyijkxy jëjp'am ma yë'ëjën ets no'ktëkooytyä'äy ja mëtsip mëti'ipë wyintuuy pyë'aay yajpatëpën.

⁴ Ko tyajwëtsuky tëkokyë tyajtukjajëtyä'äy yë naaxwiinyëtë, ets naaxwiinyëtë yu'kxy ko jëtu'un t'ixy.

⁵ Yë tun kopk jëtu'un jyiiytyakta'ay tä yë pu'unykyën ma Wintsënën, mëti'ipë nyiwintsën'ajtypyën yë naaxwiinyëtë.

⁶ Yë tsajp yë'ë yajtuk'ijxp ko yë'ë mëtëy winë tnipaye'ey; ets tëkokyë yë naax kajpn tëë t'ixtë yë myëj'ajt y'oyajtën.

⁷ Naxkutij naxkumatsë wyë'ëmta'atë yë ja'ayëty mëti'ipë y'ëwtajtëpën wiink tios, mëti'ipë mëj këjxm näjya'awëtëpën ko wiink tios t'ëwtatë, tëkokyë mëti'ipë yajtijtëpën wiink tios kwanë ko näjyëtu'un twinkoxtänëtëty yë Tiosën.

⁸ Wintsën, janty'oy xyoontä'äky yë Sión, ets Judá yë nyaax kyajpn mëët ko jyääjëty yë m'ënä'ämën;

⁹ jä'ä ko mijts Wintsën këjxmëpë, mijts tëkokyë m'ijxtääpy mtuuntääpy yë naaxwiinyëtë ets jaakwäänë këjxm mijts myajpaaty këtiinëm jyëtu'unëty wiinkëtypë tios.

¹⁰ Yë Wintsën y'oyjya'ap yë ja'ay mëti'ipë y'ëxëëk'ijxypyën yë ëxëëkpë, ets kyuwanëp yë jyuukyajtën mëti'ipë tëy tëtä'äky mëtuunëpën. Kajëna'a tkamajtstu'uta'any ets kya'ajëty ma ëxëëkja'aytyëjk yë kyë'ë y'aawëtyën.

¹¹ Jam'ajtp yë të'kxën jajën ma oyjyä'äytyëjkëtyën; yë xoontakën yë'ë ojts yajtuknipëjktaakëtë ja'ayëty mëti'ipë juuky'ajtëpën mëët yë näywyinkutsë'kën.

¹² Jotkujk mnäjyawëtëty ma Wintsënën, miitsëty naaxwiinyëtë ja'ayëty ninu'un oy mja'ay'atën, mëjjaw kënu'kxyjyawëtë wya'atsajtën.