Salmos 96 - Biblia Dc en Mixe de Quetzaltepec

Salmo 96 Tu'uk yë jemy'iy mëti'ipë yajmoopyën yë Wintsën

¹ Tukwin'ëwtë yë Wintsën tu'uk yë jemy'iy; win'ëwtë yë Wintsën tëkokyë miitsëty jënu'un m'itën naaxwiiny naaxkëjxy;

² win'ëwtë yë Wintsën ets kënu'kxyjyawëtë yë xyëëw, nikajpx nimëtya'aktë yë nyitsokën winjëpom.

³ Nimëtya'aktë wi'ix yë mëj'ajt oyajtën ets xoontakën tmëëtëty maajaty yë naax kajpnën mëjpë mutskpë.

⁴ Yë Wintsën mëj yë'ë ets patëp yajmëjpëjkta'akëty. Ni'ik yë kyutsë'ëkëty këtiinëm wiinkëtypë tios.

⁵ Yë wiink tios mëti'ipë wiink naax wiink kajpn y'ëwtajtëpën, ka'ap tii mëk'ajtën tmëëtëty, jä'ä ko yë nWintsën'ajtëm yë'ë ojts yë tsajp tyajkojy.

⁶ Mëj jam yë të'kxën jajën yajpaaty ma yë'ëjën. Yë'ë jam yajpatp ma tsyajptëjkën mëk'ajtën ets oypyë tsujpë.

⁷ Tukxoonta'aktë yë Wintsën ninu'un mtu'kjëëky'at mtu'kmëku'uk'atën, tukxoonta'aktë yë Wintsën mëët yë jot mëjaaw ets mëj'ajt oyajtën.

⁸ Wintsë'ëkëtë yë Wintsën ijxtëm pyäätyën, ets tukxoonta'aktë, mëjjawëtë ma jyëën tyëjkën.

⁹ Ëwtatë ets wiinkajpxta'aktë yë Wintsën ma tsyajptëjkën, tëkokyë yë naaxwiinyëtë ja'ayëty wä'än twinkutsë'ëkëtë.

¹⁰ Ënëëmëtë yë naax kajpn: Yë Wintsën, yë'ë tyam mëj ënä'ämpë'ajtp. Yë'ë ojts ta'tspëky tpëjktä'äky yë naaxwiinyëtë këtiipë yu'kxëty, yë'ë y'ënä'ämtääpy tëkokyë yë naax kajpn tu'knax.

¹¹ Wä'än yë tsajp ets naaxwiinyëtë txoonta'aktë. Wä'än yë mejy t'ëëty tkomy ets tëkokyë jënu'un jap yajpaatyën ma yë'ëjën.

¹² Wä'än yë kam tu'u txoonta'aktë, mëët tëkokyë jënu'un jam winë yajpaatyën. Wä'än akujk jotkujk tya'axtë tjoktë yë aay kepy mëti'ipë yuukjoty yajpatëpën,

¹³ Jam Wintsën wyintum, mëti'ipë miinpën. Mëti'ipë ja kyutujkën yaa naaxwiiny itaanpën ets yë'ë y'ënä'äma'any ma ja naax kajpnën naaxwiinyëtë apëtsëmy mëët ja mëtëypyë ja nipaye'eyën ets ja tëyajtën.