Salmos 92 - Biblia Dc en Mixe de Quetzaltepec

Salmo 92 Yë nyi'ëy ma winë yajmëjjaw yajkënu'kxyjyawën

¹ Wintsën Ni'ik Këjxmëpë, janty'oy ko mijts myajmo'oy yë kukkajpxën ja'awëkyëtakkën, ets ko yajkuuy'iy ja mmëjajtën m'oyajtën.

² Ko yajnikäjpxy yajnimëtyä'äky jopyëp ets uxëp wi'ix myëj kyëjääjëtyën ja mtsojkën mja'awën ets ja mwa'atsajtën

³ mëët yë kow xuxn.

⁴ Mijts Wintsën, janty jotkujkës xyaj'ity koos xytyuk'ixy wi'ix mijts winë janty'oy xytyunyën. Janty jotkujk janty xoontä'äkyës nnäjyawëty koos n'ixy tëkokyë mëti'ipë mijts të xyajkojy të xypyëjktä'äkyën.

⁵ Mijts Wintsën, tëkokyë mëti'ipë të xyajkojyën të xypyëjktä'äkyën mëj këjää oy. Yë mjot mwinma'any mëj këjää yë'ë.

⁶ Yi'iyë yë tsuuja'aytyëjkëty ka'ap jëtu'unpë tja'akyukëtë.

⁷ Pën yë ëxëëkja'aytyëjk ets tuuntëkoopyëtëjk yoontëp ji'tstëp tä ujtsën ets mëtaktëp ma wit meenyën, nëkoopë yë'ë, je'eyë nëjkx kyutëkoytyë.

⁸ E mijts Wintsën, xëmë këjxm m'ita'any.

⁹ Tää tu'uk yë tëyajtën Wintsën, yë'ë ko mmëtsiptëjk nëjkxëp jëna'a kyutëkooytya'atë ets tëkokyë tuuntëkoopyë, axit ako'owë jyajta'aja'antë.

¹⁰ Mijtsës xyajmëktakpës, etsës nkumëjaaw'atëty tä tsajpkaajën, tëë xytyukkujaaxyës yë on mëti'ipë pa'akxu'kpën.

¹¹ Ëjts n'ixäämpyës wi'ix jyat kyëpätën yë nmëtsiptëjkës; ets nmëtowëpës kë'ëm ko ënety ya'axtë ja tuuntëkoopyëtëjkëty.

¹² Yë oyjyä'äytyëjk jëtu'un yaj'ixtë tä kumpëjyën, ets jëtu'un yontë jyiitstë tä ajë kepyën mëti'ipë yajpatëpën ma ja Líbano itjotmën.

¹³ Kojy peny jam yajpaatë ma Wintsën yë tsyajptëjkën; ets janty'oy yaj'ixtë ko pyëjtë ma Dios yë tyëjkën, mëti'ipë nTios'ajtëmën.

¹⁴ Oy ënety tëë jyamëjja'ayënëtë, yë'ëjëty je'eyëm tyëëmpäta'antë ets oy mëk xëmë yajpaata'antë.

¹⁵ Yë'ë nyikajpxantëp ko yë Wintsën, mëti'ipës xykyuwaanpën mëtëy winë tuny ets ma yë'ëjën ka'ap jyam'aty ëxëëkpë nipaye'eyën.