Salmos 90 - Biblia Dc en Mixe de Quetzaltepec

LIBRO IV Salmo 90 Wi'ix yë Tios y'ityën xëmëkyëjxm ets wi'ix yë naaxwiinyëtë ja'ay atón amatsë yajpaatyën

¹ Wintsën, mijts ëëts ntsoktakn'ajtëp tyimku'ty jëtu'un yë xëëw jëmëjt.

² Tyimtso'ontäky jëtu'un ma ënety ka'ap ja tun kopk kyojynyëmën, ets ma ënety ka'ap ja naaxwiinyëtë jyää'atynyëmën, ko jyeky'äjty ets tyampaat mijts jëtu'un mTios'ajtp.

³ Mijts pojën yë naaxwiinyëtë ja'ay jatëkok xyaj'awinpity naaxway ko m'ënaankojnë: Awinpitë naaxway miitsëty naaxwiinyëtë ja'ayëty.

⁴ Janty tëyajtën jëtu'un, ko ja kanaak jëmëjtpë jëtu'un xyjyawë tä jeexyë tyu'kxëëwëtyën, yë ëxë'ëypyë nyäxyën jëtu'un tä jeexyë tyu'ktsojkyëtyën ko kyoots'aty.

⁵ Jëtu'un yë naaxwiinyëtë ja'ay tu'ktsojkyë xywyitsy xyjyëtuty amëjaaw jëtu'un tä ja'ay wyinkuma'ayën;

⁶ jëtu'un nyäxy tä aay ujtsën, ko jyopyëp'aty janty'oy yë pyijy kyëxë'ëky, e ko jyënäky xyëëwajnë tëë nyaxo'tsnë ets jëtu'un y'ooky tyëkoy.

⁷ Janty tëy jëtu'un ko mijts mjoot'anpëky, tsojkës ntëkooytya'atëty, jä'ä ko jëtu'unyë ëëtsëty xyajwë'ëmtë kumon kutukë.

⁸ Ëëts yë nnëë npokyëty, yë ntuuntëko'oy nkajpxtëko'oyënëty mijts tëkokyë mkëwentëpëjktääpy ets mnija'awëtyääpy.

⁹ Tëyajtën ko tëkokyë ëëts yë njuukyajtënëty, paaty kyixy nyäxy jä'ä ko xymyëët'aty yë joot'an, yë njuukyajtënëtyës jëtu'un nyäxy poj'am tä ja'ay myëkxejy y'o'kxejyën.

¹⁰ Tëkë'px majk jëmëjt je'eyë njuuky'ajtëmë, e pën oy jeky ntimjyuuky'ajtëmë najääjën jyä'ty majkta'pxën; e oy ënät jëtu'un njajuuky'ajtëmë jeky, ka'ap xoontä'äky nyajpatmëty oywyi'ix njaak yajnajxmëty ja xëëw jëmëjt. Yë xëëw jëmëjt tsojkyë nyäxy, näjyëtu'un ëëts'ajtëmë.

¹¹ ¿Pën y'ëknija'ap? wi'ix mijts janty mëk mjoot'anpëkyën ets ¿pën y'ëknija'ap? wi'ix m'ëwa'antä'äkyën.

¹² Tukni''ijxëtëkës wi'ixës ja nxëëw njëmëjt nyajnaxtëtyën etsës nmëët'atëty ja ixpëkyajtën ets ja nija'awën.

¹³ Wintsën, niwinpijtëkës jatëkok Këtii mpo'oxy. Tun yë mëyajtën, mëët'at pa'ëyo'owën mëët ya'atë ja'ayëty mëti'ipë mmëtuunëtëpën.

¹⁴ Myaj'utsëp yë njot nwinma'anyëtyës mëët yë mtsojkën mja'awën ko xyiinytya'akëty, ets jotkujk n'ëwtëty nya'axtëtyës mapaatës njuuky'atën.

¹⁵ Jeky ëëtsëty yajjuuky'ajtëk mëët yë xoontakën ets jotkujk'ajtën, jëtu'un tääjës jeky të nmon të ntuktën.

¹⁶ Mijts myajkutukëp ets mtuunpë yë y'u'unk y'ok t'ixtëty wi'ix winë të xytyuny të xykyäjpxyën ets wi'ix yë mmëj'ajt m'oyajtën y'ityën.

¹⁷ Wä'än yë y'oyjyot y'oywyinma'any yë nWintsën'ajtëm Dios tyajpaaty ma ëëtsajtëmën. Wintsën, mijtsës xymyo'otëp yë ntuunkëtyës mëti'ipës ntuunk'atëpën. Mijts yaj'it xëmë ja tuunk mëti'ipës ntukjuuky'atëpën.