Salmos 86 - Biblia Dc en Mixe de Quetzaltepec

Salmo 86 Mijts tu'uk mTios'ajtp

¹ Wintsën, tun yë mëyajtën mëtoow'ijtkës yë n'aaw n'ayuk, jä'ä ko janty mon janty tukës nyajpaaty ets ëyoop jotëkoopyës;

² kuwaankës, jä'ä ko oy nmëtuny. Mijts nTios'ajtyp, e paaty yajtso'ok jyuukyajtën ya'atë mtuunpë mëti'ipë mtuk'ijxpäjtëpën.

³ Wintsën, mëët'at pa'ëyo'ow najts'ëyo'owën mëët ëjts; mijts nmëpëjktsoopy janaam jatsojk.

⁴ Wintsën, yajxoontakës ma nmëtunyën, jamës yë nnu'kxtakën npëjktä'äky ma mijtsën.

⁵ Jä'ä ko mijts Wintsën, oy mTios'aty ets mpokymyä'kxp; janty'oy ja mjot mwinma'any xyajnikëxë'ëky ma ja'ayëtyën mëti'ipë mëkajpxëpën.

⁶ Wintsën mëtoow'ijtkës yë ntsajpkäjpxy ets ëxaj kupëk yë nnu'kxtakënës.

⁷ Maas mon tuk nyajpaatyën, ënätyë nmëkäjpxy, jä'ä ko mijts xy'ëëw'ëtsoopës.

⁸ Ka'ap ma wiinkpë tios jëtu'unpë tä mijtsën, Wintsën. Ka'ap ma wiinkpë mëti'ipë jëtu'un winë tyuunpyën tä mijtsën.

⁹ Mijts Wintsën, mijts të xyajkojy tëkokyë yë naax kajpn, yë'ë mniminanëtëp ets m'ëwtata'anëtë ets tukxoonta'aka'antë yë mxëëw.

¹⁰ Jä'ä ko tu'uk mijts mTiosëty, e mijts janty mëj ets mëj këjää yë mëj'ajtën xyaj'ixyë.

¹¹ Mijts Wintsën, tukni''ijxëkës yë mnë'ë mtu'u etsës yë'ë tu'ukyë npaye'eyëty. Mijts m'a'ixëp ets njot nwinma'anyës y'ëwa'atsëty, täätsës nmëjpëjkta'akëty yë mxëëw.

¹² Mijts Wintsën mëti'ipës nWintsën'ajtypyën ets mëti'ipës nTios'ajtypyën, mijts nyajmëjnaxäämpy winë aaw winëjot, ets nmëjjawëja'any nkënu'kxyjyawëja'anyës xëmë yë mxëëw.

¹³ Mëjwiin këjää yë mtsojkën mja'awën xymyëëtëty mëët ëjts. Tëës mijts xyajtso'oky, ets ka'ap të xy'ëwa'atsy etsës n'ookëty ntëkoyëty etsës nka'ajëty jap o'kpëjutjoty.

¹⁴ Mijts Dios, ëjts jëtu'unës xyjyänty'ixjëtit xyäntypyajëtitë yë ja'ayëty mëti'ipë ëxëëk yë jyiiky myëku'uk tyuuntëpën, ka'apë mja'amyetsyën, janty nimay nyäpyaatëtë mëti'ipës xy'ëxëëk'ijxtëpën etsës xyaj'ooka'an xyajtëkoya'antë.

¹⁵ E mijts Wintsën, jä'ä mTios'aty yujy tëtä'äky, ets pa'ëyoop, mä'kxtujkp mëët yë tsojkën ja'awën ets tëyajtën.

¹⁶ Ni''ijxkëtakës, ets pa'ëyoowkës. Yajtso'ok ya'atë mtuunpë, ets mo'o yë jot mëjaaw mëti'ipë myäjkpyën.

¹⁷ Yak tu'uk yë ijxpäjtën mëti'ipë yajtuk'ixëpën ko oy mTios'aty, e ko jëtu'un yaj'ixëty, tääts nëjkx tsyëyu'unpaatë ja'ayëty mëti'ipës xy'ëxëëk'ijxtëpën. Mijts Wintsën, mijtsës xymyoopy yë putëjk pupäjtën, ets mijtsës näjyëtu'un xymyoopy yë jotkujk'ajtën.