Salmos 80 - Biblia Dc en Mixe de Quetzaltepec

Salmo 80 Ni''ijxkëtaktëkës mëët yë jot winma'any oypyë.

¹ Mëti'ipë wyoow'ijtyp wyijts'ijtypyën yë Israel, mëët ko oy yë José xytyu'uwinwoy xytyu'uwinwitsy jëtu'un tä ja'ay yë kyupixyny oy twojpjëtityën, ets ko yë mkutujkën xymyëëtëty itkujky ma Wintsën kyukexyën, mëtoow'it.

² Ni''ijxkëta'ak yë Efraín, Benjamín ets Manasés. Jootwij ets min yajtsoktëkës mëët yë mmëkajtën.

³ Mijts Dios, m'a'ixëp ets jatëkok jëtu'un nja'ay'atëtyës tä tëëyëpën. Ni''ijxkëtaktëkës mëët yë oyjyot oywyinma'any e jëtu'un'äämpy jatëkok nyajpaatëtyës ëwaatsëtuuy.

⁴ Wintsën, mëti'ipë maaytyääyëpën winë, ¿Jëna'a yë mjoot'an kyëxa'any xyajnaxa'any ma ja mnaax mkajpn mmëwaantä'äky mmënu'kxtä'äkyën?

⁵ Yë nwiinnëëjëtyës yë'ëjës të xytyukjë'kxtë; ka'ap y'ëk'ëmaay'ajnë, mëpaatëpës n'uknëtë,

⁶ jä'äs mijts të xyaj'awinpijnëtë yajja'ayxyikpë ma ja naax kajpnën mëti'ipë yajmëwinkon'ajtpën ets yë nmëtsiptëjkëtyës näjyëtu'un xynyëxik xytyukxiknëtës.

⁷ Dios, mëti'ipë maaytyääyëpën winë, mijts m'a'ixëp ets jatëkok ëëtsëty jëtu'un nja'ay'atëty tä pya'tkë'p'ajtyën. Ni''ijxkëtaktëk ëëtsëty ets jëtu'un jatëkok nyajpaatëtyës ëwaatsëtuuy.

⁸ Jëtu'un ojts jap Egiptë xyajtsoontës tä tu'uk yë tsatym kyepyën, ets ojts xykyojtës ma ja kajpnën ma xy'ixkäjxtaayën ja ja'ayëty mëti'ipë ka'ap ja Dios t'ëwtatën.

⁹ Ojts yajxon xyajni'ëwaatsë ma xypyäna'anyën, ets ja tsatym yoonë'ky ets tyiktskeky, jëtu'un tyajwintujky ja naax kajpn.

¹⁰ Ojts tninikë ja tun kopk, ets mëët yë xye'enty tninikëy yë mëjëtypë, këjxmëtypë kepy.

¹¹ Yë xye'enty jampaat nyasyo'onëy ma mëjmejy nyäxyën ets ja jyi'tsk jyä'äjty ma Éufrates mëjnëë jyënäkyën.

¹² ¿Wi'ix ko nyikemy të xyajkëtaawtaayë ets ënät akujk jotkujk tyëkëtë yë ja'ay mëti'ipë në'ëye'ey tu'uye'eytyëpën ets tuktë ja tsatymtyëëm?

¹³ Yë ujts ëtsëm jëtu'unyë tuknuk tukwëtsë ets jëyujk tsajpkaa mëti'ipë ëwa'anëtyën jëtu'unyë t'akääp tukääpëtë.

¹⁴ Dios mëti'ipë maaytyääyëpën winë, tun yë mëyajtën, winpit jatëkok. Ku'ijxnax jam tsajpjotm ets mëmay mëtaj ya'atë naax kajpn, mëti'ipë jëtu'unën tä tsatym kyepyën.

¹⁵ Ja tsatym kyepy mëti'ipë ojts kë'ëm xykyojyën ets ja jyi'tsk mëti'ipë ojts kë'ëm xyaj'ixtä'äkyën.

¹⁶ Myajkutëkoyëp mëët yë mjoot'an, mëti'ipë pyujxtëpën ets nyino'ktëpën;

¹⁷ e mijts mputëkëp ja ja'ay mëti'ipë kë'ëm të xywyin'ixyën, ja ja'ay mëti'ipë kë'ëm të xypyëjktä'äkyën,

¹⁸ ets jëtu'un ka'ap nijëna'a ëëts ëpëky nyajpaatëty mëët mijts, mooytyëkës ja juukyajtën ets mijts atu'uk myajja'amyätsëty.

¹⁹ Wintsën, Dios mëti'ipë maaytyääyëpën winë, mijts m'a'ixëp etsës jatëkok jëtu'un nja'ay'atëty tä ijty tëëyëpën. Ni''ijxkëtaktëk ëëtsëty etsës npaatëty ja nitsokën.