Salmos 8 - Biblia Dc en Mixe de Quetzaltepec

Salmo 8 Ja Tios ja myëj'ajt y'oyajtën mëti'ipë ja naaxwiinyëtë ja'ay tyukmëjnaxypyën

¹ Wintsën, mëj'äämpyë yajpaatyën ma ëëtsëtyën, yë mxëëw yë'ë y'ënä'ämtääpy yë naax kajpn naaxwiinyëtë apëtsëmy, yë m'oy'ajt mëj'ajtën wyinajxyp yë tsajp.

² Mëët ja y'aaw y'ayuk ja pi'k ëna'këty mëti'ipë tsi'tspnëmën, yë'ë mëët të xykyojy tu'uk ja ijtakn ma ja mëtsip ka'ap mnitëkëtëty ets jëtu'un kyutëkooytya'atëty ja ëxëëkja'aytyëjk ets ja ëxëëk ijxpë.

³ Koos n'ixy ja xëëw po'o ets ja mëtsa'a jam tsajpjotm mëti'ipë të xyajkojyën,

⁴ ënätës nmay ntajy: ¿jënu'un yë naaxwiinyëtë ja'ay tyimmëjjëty? ¿tii kyumëj'ajtëp? ¿wi'ix ko xyjyä'äymyetsy ets xymyëmay xymyëtajy?

⁵ Jä'ä të xyajkojy jawäänë tkamëpaaty yë tios, tëë xymyo'oy ja mëj'ajt oyajtën ets wintsë'ëkë y'itëty,

⁶ tëë xymyo'oy ja kuttujkën, ma tëkokyë winë të xyajkojyën, mëj'äämpy të xypyëjktä'äky ma winëjatyën,

⁷ ma tsajpaxën, kupixynyën, ma tsajpkaajën, ets ma jëyujkën yujypyëpë,

⁸ Ma joonën mëti'ipë kääkjëtijtëpën tsajpwinm, ma nëë jëyujkën nëëjotypë tsyëënëtën, ets tëkokyë winë jënu'un jap nëëjoty yajpaatyën.

⁹ Wintsën, mëj'äämpyë yajpaatyën ma ëëtsëtyën, yë mxëëw yë'ë y'ënä'ämtääpy yë naax kajpn naaxwiinyëtë apëtsëmy.