Salmos 79 - Biblia Dc en Mixe de Quetzaltepec

Salmo 79 Ma yajniyä'äxyën ko yë Jerusalén kajpn kyutëkooynyë

¹ Mijts Dios, yë ja'ayëty mëti'ipë y'ëwtajtëpën ka'apë tiosëtyën, tëë tniwa'kta'atë tëkokyë mëti'ipë mijts mjä'ä'ajtypyën, tëë tyajma'ta'atë yë mtsajptëjk ets xit ko'ow të tuunta'atë yë Jerusalén kajpn.

² Tëë tyaj'ook tyajtëkoytyë yë mtuunpëtëjk mëti'ipë oy të mmëtunëtën, ets tsyu'utsëtëty wyëtsëtëty yë majkwejkxy ets jëyujk mëti'ipë ëwa'anëtyën.

³ Jëtu'un tä nëëjën të tam të tyoktë ja jot ne'pyny ma Jerusalén kajpnën, ets ka'ap ma pën, pën yajnaaxtëkëtëpën.

⁴ Tyam je'eyë ënät ëëtsëty xynyëxi'ik xytyukxi'iktë ja naax kajpn mëti'ipë yajmëwinkon'ajtpën; tyam yajja'ayxyiktëpës je'eyë ma ja ja'ayëtyën mëti'ipës xywyinajx xywyintëjkëtyëpën.

⁵ Mijts Wintsën, ¿Jëna'apaat mijts mjoot'anpëka'any? ¿Xëmë yë mjoot'an tyoyä'äny tä jëënënë?

⁶ Yajnikëxë'ëk yë mjoot'an jam ma ënä'ämpëtëjkëtyën, mëti'ipë ka'ap yë Dios t'ëwtatën ets ka'ap m'ixy'ätyë ni mkamëkäjpxyë.

⁷ Jä'ä ko yë'ëjëty ojts ëxëëk tuntë yë Jacob yë jyä'äy, ets xit ko'ow tuuntë ja naax kajpn.

⁸ Këtiis xytyukkëpätëty ja nyëë pyokyëty ja n'ap n'okëtyës; wä'änës tsojk tminy ja myu'unkjot myu'unk winma'any, jä'ä ko ëëtsëty tëë nmëjaawkëjxta'atës.

⁹ Mijts Dios, mëti'ipë ëëtsëty xyajtsoktëpën, putëjkëtëkës, yaj'ëwaatsëpëtsëëmtëkës, ets pokywyinmä'kxtëkës mëët ja mxëëw ja myëj'ajt y'oyajtën.

¹⁰ Ka'ap tjëkyepy ets tääpë ja'ayëty mëti'ipë ka'ap të t'ëwtatyën y'ëna'antëty: ¿ma ënät ja mTios? Tuk'ijxtëk ëëtsëty näjyëtu'un wi'ix ëxëëk jyatën kyëpätën ja ja'ayëty mëti'ipë të tyaj'ooktën ja mtuunpëtëjk. Wä'än tnijawëtë ja'ayëty mëti'ipë ka'ap Dios t'ëwtatën.

¹¹ Mëtoow'it yë y'ëjën tyu'kën yë tsumjyä'äytyëjk, ets yajnitso'ok mëët yë mmëkajtën yë ja'ayëty mëti'ipë jyëjp'ijxtëpën ja o'kën tëko'oyën.

¹² Mijts Wintsën, wëxtujk ok näjyëtu'un ëxëëk xytyunëty yë nmëjëën nmëtëjkëtyës ko mëj të myajjoot'anpëkyë;

¹³ ets ëëtsëty, maas nxëëwatën mijts mnaax mkajpn, ets koos jëtu'un xykyëwent'atë mkamjoty tä ja'ay yë kupixyny tkëwent'atyën, ets tyajtänën yë kyupixyny mëëynyakjoty, kë'ëyxyëëw kë'ëyjyëmëjt nkukajpxëja'antë, ets nwin'ëwa'antë ma mijts myajmëjpëjktä'äkyën winë xëëw winë jëmëjt.