Salmos 75 - Biblia Dc en Mixe de Quetzaltepec

Salmo 75 Tios yë'ë tu'uk nipaye'epyë

¹ Nkukajpxëtëp, mits Dios, nkukajpxëtep; nkajpxpatëpës ja mxëëw ets nkuuy'ëëwtëpës ja tëëpë xytyunyën, jä'ä ko mëj këjää winë të xytyuny të xykyäjpxy.

² Jëtu'un yë Wintsën y'ënä'äny: Nwin'ixäämpyës tu'uk yë xëëw jëmëjt maas nipaye'eyä'änyën tëkokyë yë nëë poky, ijxtëm yajxon tyiyajtënëtyën.

³ Ko yë naaxwiinyëtë tyëkë yu'kxpë, mëët tëkokyë mëti'ipë ënety tsënaay juuky'ajtëpën ma yë'ëjën, ëjts npëjk'ijtyp nmajts'ijtyp ma yajxon nyäkyumatsëtëtyën,

⁴ Yë ëxëëkja'aytyëjk mëti'ipë nämyëjja'aw näjyääntyja'awëtëpën tyaajës n'ënëëmëtë: Këtii nëkoo mnäkyumayëtë ets janty mëj janty këjxm mnäyajnaxëtë;

⁵ këtii nëkoo janty yë'ë xykyatuk'ëmontë ko winë mmayëtë, ets këtii nëkoo këxy këpety mtimy'ëna'antëty ko mmëtya'aktëty.

⁶ Jä'ä ko yë nipaye'eyën ka'ap jam tsyoony xëëwpëtsëmtsyow ëkë xëëwkëtä'äkytsyow, ëkë të'ëts'itjotm ëkë yukjotm,

⁷ yë Dios yë'ë nipaye'epyë'ajtp, pënety tyajtsëtyuny ets pënëty tyajmëjnaxy.

⁸ Ko yë Dios jyoot'anpëky, jëtu'un tpaaty tä jeexyë a'ukën tmëët'atyën kyë'ëjotm mëët yë nëë mëti'ipë xunën. Ko ënety yë'ë tnaaxkutämë yë tsatym nyëë, tëkokyë yë ëxëëkja'aytyëjk jënu'un yajpaatën naaxwiiny, nëjkxëp t'ukmujkta'atë ya'atë tsatym nyëë, ets ni tu'ktsuny nëjkx tkayajwë'ëmtë.

⁹ Ëjts yë'ëjës xëmë nnikajpxäämpy nnimëtya'akäämpy yë Dios, mëti'ipë Jacob Tiosajtën, etsës yë'ë ntukwin'ëwa'any yë xoontakën;

¹⁰ jä'ä ko yë'ë yajkutëkooytya'ajäämpy tëkokyë mëti'ipë ënety ja ëxëëkja'aytyëjk të nyätyukmëjjawëtën, ets tyajmëjëja'any tyajkëjääjëja'any ja myëj'ajtën kyutujkën ja ja'ay oypyë jyot wyinma'anyën.