Salmos 71 - Biblia Dc en Mixe de Quetzaltepec

Salmo 71 Tsajpkäjpxy ma tu'uk yë mëjja'ay t'amëtoyën yë näypyutëkë

¹ Wintsën, jam ma mijtsën jamës n'ixta'ay yë kuwa'anën; ka'ap mëpaat nijëna'a tsëtyu'unmëët nwë'ëmyës maas ja nmëtsiptëjkën.

² Yaj'ëwaatsëpëtsëëmkës ets yajtsokës; jä'ä ko mijts wa'ats mTios'aty. Tun yë mëyajtën, mëtoowkës yë n'aaw n'ayuk ets yajnitsokës.

³ Mijts jëtu'un mnax tä yë mëjtsaakopkën mëti'ipës xykyuwaanpën, mijts jëtu'un mnax tä tu'uk yë mëjpotsyën mëti'ipë tsoktaknën. Mijts jëtu'un tä tu'uk yë mëjtsaakopkën ets tä tu'uk yë mëjpotsyën mëti'ipës xykyuwaanpën.

⁴ Dios, mëti'ipës nTios'ajtypyën, yajpëtsëëmkës ma kyë'ë y'aawën yë ëxëëk ja'ay, ma kyë'ë y'aawën yë yaja'ay'o'kpë ets mëti'ipë tsiptuump tsip kajpxpën.

⁵ Wintsën, jëtu'unyëm mijts ntuk'ijxpety koos nmëxu'unk'ajty ets tyampaat maas të nmëj ja'ayënën, mijts n'a'ijxyp njëjp'ijxyp ets mijts näjyëtu'un ntukjotkujk'ajtyp.

⁶ Tapnëmës ënety nyajpaaty ntaakës jyootjoty ko mijts ntukjotkujk'aty. Mijtsës ojts xyajminy naaxwiiny paaty mijts xëmë nmëjpëjkta'aka'any.

⁷ Janty mëj'ixyës yë ja'ay muum xyjyawë, e jam ma mijtsën Wintsën jamës yë tsoktakn npaaty.

⁸ Jëtu'unës yë xëëw nyajnaxy, yë mmëjajtën m'oyajtën yë'ëjës nmëjpëjktäkpy;

⁹ këtiis xy'ëxëëkjawëty koos ënety tëë nmëjja'ayënë; këtiis xy'ëxmats xymyajtstu'utëty koos ënety ka'ap yë jot mëjaaw n'ëkmëët'ajnë.

¹⁰ Yë nmëtsiptëjkës mëti'ipës xyaj'ookan xyajtëkoyantëpën, aakyë'ë të nyäpyëk të nyämyatsëtë ets të nipëjktaakëtë wi'ixës xyaj'ooka'antën.

¹¹ Tyaa y'ëna'antë: Ixta'atë ets xymyatstëty, yë Tyios mëti'ipë y'ëwtajtypyën tëë jyä'äytyëkooyënë, paaty tyam ka'ap t'ëkmëët'ajnë pën yajtso'okëtëp.

¹² Dios, mëti'ipës nTios'ajtypyën, këtiis xymyëjëkämke'eky; nimiinkës tim tsojkyë ets putëjkëkës.

¹³ Wä'än twë'ëmtë tsëtyu'unmëët ets wä'än tkutëkooytya'atë mëti'ipë myëtsip'ajtëpën yë njuukyajtënës. Wä'än yë'ëjëty nëxi'iky tukxi'iky twë'ëmtë mëti'ipë tsyojktëpën ets jeexyë ëxëëk njaty nkëpetyës.

¹⁴ E ëjts, mijts xëmë n'a'ixäämpy njëjp'ixäämpy, ets ni'ikyë mijts nmëjpëjkta'aka'any;

¹⁵ jëtu'unës nyajnaxa'any yë xëëw jëmëjt, nikajpxa'any nnimëtya'aka'anyës koos mijts të xyajtso'oky ets koos të xynyipaye'ey ijxtëm tyim'ixë'atyën. E tëkokyë ya'atë mëti'ipë të xytyuny të xykyäjpxyën, ka'apës yajxon nja'akyukë wi'ix ko jyëtu'unëty.

¹⁶ Nimëtya'akäämpyës wi'ix winë mëj këjää të xytyunyën Wintsën, ntukyaaxëjäämpy ntukjojkëjäämpyës ko mijts aak'oy ets aak mëtëy winë xytyuny.

¹⁷ Dios, mëti'ipës nTios'ajtypyën, mijtsës të xytyukni''ixë winë koos të n'ëna'k'aty, e tyam je'eyëmës ka'ap ntuk'ëmony wi'ix winë të xyajkojy të xypyëjktä'äkyën.

¹⁸ Dios, mëti'ipës nTios'ajtypyën, këtiis xy'ëxmats xymyajtstu'utëty oyës ënety të nmëjja'ayënë etsës të nkupo'ojënyë, jä'ä ko ëjts njaaknimëtya'akäämpyës yë mmëjajtën ma ja'ayëtyën tyampë jyuuky'atën ets mëti'ipë juuky'atantëpnëm.

¹⁹ Yë mëtëypyë mnipaye'eyën, mijts Dios, jajtp jam tsajpwinm; mëjwiin këjää winë të xytyuny, kamaa jëtu'unpë tios tä mijtsën.

²⁰ Oyës të xy'ëktuk'ixy yë ëyo'on jotmay etsës të një'ëy të nyä'äxy, nija'apës wa'ats koos jatëkok xyajjuuky'ata'any, ets koos jatëkok jap xyajpëtsëma'any ëyoowtaknjoty maas ënety jap ëxëëk njatyën nkëpetyën.

²¹ Mijts myajmëjëjäämpy yë njotkujk'ajtënës etsës jatëkok akujk jotkujk nyajpaatëty.

²² E ëjts, mëti'ipës xypyatpën, n'ëwäämpyës yë ëy ets nmëjpëjkta'aka'anyës ko winë oy xytyuny, nyaj'ëna'anäämpyës yë xijn ets kow, Dios, mëti'ipës nTios'ajtypyën, Wa'atspë mëti'ipë yë Israel ja'ay y'ëwtajtëpën.

²³ Jotkujkës näjyawëja'anyë ko ënety mijts nwin'ëy nwinyä'äxy, ets näjyëtu'un tëkokyë yë njot nini'kxës, mëti'ipë mijts të xyajtso'okyën.

²⁴ Näyjyëtu'unës xëmë nikajpxa'any ko jëtu'un winë xynyipaye'ey ijxtëm pyaat'atyën, jä'ä ko mëti'ipë ënety tsyojkën'ajtëpën etsës ëxëëk njatëty nkëpätëty, yë'ë të y'ëkwë'ëmtaaynyëtë tsëtyu'unmëët.