Salmos 7 - Biblia Dc en Mixe de Quetzaltepec

Salmo 7 Ja wintsën, mëtëypyë nyipaye'eyën

^1-2 Wintsën mëti'ipës nTios'ajtypyën, jam ma mijtsën të n'ixta'ayës kuwa'anën; Yajtsokës maas ja nmëtsiptëjk xy'ixjëtit xypyajëtitën. Yaj'ëwaatsëpëtsëëmkës jä'ä ko jëtu'un yë'ëjëty tä kaajën, këtiipës xynyuktëty xywyëtstëty ko ënety kyajam'aty mëti'ipës xyajtso'okëpën.

³ Wintsën mëti'ipës nTios'ajtypyën. ¿Tiijës të ntuuntëkoy? ¿Tëës ntuuntëkoyë?

⁴ ¿Tëës ja njëëky nmëku'uk ëxëëk ntuunwimmpity ma winë oy të tunyën mëët ëjtsë? ¿ëkë tëës nanëkoo ntsaatsytyuny ja nmëtsipë?.

⁵ Pën tëës ja jëtu'unpë ntuny nkäjpxy, jyëkyejpy ja nmëtsipës xy'ixjëtit xypyajëtitëty; xynyajtspaatëtyës etsës xywyitsëty xyjyëtutëty, etsës xypyëjkëtya'ajëty mëti'ipës ënety mëj'äämpy të xyaj'ityën.

⁶ Wintsën, pëtë'ëk mëët ja m'ëwa'an'ajtën. Putëjkëkës. Mijts wiinkuwa'akë ja nmëtsipës ja tsyip y'äkë, Mijts të xynyikäjpxy ko oy winë xynyipaye'eyä'äny, putëjkëkës ënät.

⁷ Näyajnatukët mëët ja naax kajpn ma tu'ukmukyë yajpaatën, ets jam këjxm xypyëjkta'akëty yë mkutujktakn, ma ka'ap pën mëpaatëtëtyën.

⁸ Wintsën, mijts mnipaye'epy ja naax kajpn ja tyuuntëko'oyën: Wintsën, nipaye'eykyës maas winë oy ntunyën, jëtu'unës xynyipaye'eyëty tä mëpaat yajnijawën ko ka'apës tii poky nmëëtëty.

⁹ Wintsën mëtëypyë nyipaye'eyën, mëti'ipë y'ijxypyën ja jot winma'any ets ja jot ja'awën këkpaat. Mijts myajkëx myajnaxëp ja y'ëxëëktu'unën ja ëxëëkja'aytyëjkëty, e ja ja'ay mëti'ipë mëtëy winë tyuunpyën jotmëk xyaj'itëty.

¹⁰ Dios ni'ik këjxmëpë, yë'ëjës nkuwaanpë'ajtyp, mëti'ipë yajtsokpyën ja ja'ay wa'atspë jyot wyinma'anyën.

¹¹ Yë Dios yë'ë tu'uk yajkutujkpë mëtëypyë nyipaye'eyën, mëti'ipë ka'ap nijëna'a t'oy'ixyën ja ëxëëktu'un ëxëëk kajpxën.

¹² Pën ka'ap ja naaxwiinyëtë ja'ay jyotwinpity ma Tiosën, Dios jyëjpmä'äjäämpy ja tyiypyujxn, tëë yë tyi'pxn two'onë'knë,

¹³ jëjp'ixy yë tyi'pxn kepy jëënmëëtpë tyaj'ijnë, a'ixy jëjp'ixy ja tyuunpäjn tmëët'ajnë mëti'ipë yaj'o'kpën.

¹⁴ Ixtë ja ëxëëk ja'ay, jëtu'un ja pëjkën ijxën tmëëtëty tä to'oxytyëjkën mëti'ipë u'unk yajminäämpyën naaxwiiny. Je'eyëp ko ja ëxëëk ja'ay yë'ë myoxjoty myëët'ajtyp ja ëxëëkajtën ets yë'ë yajminäämpy naaxwiiny yë win'ë'ënën antakën.

¹⁵ Tëë tu'uk ja o'kpë jut tajy këkpë, ets jap kyë'ëm jutjoty kyënaxa'any.

¹⁶ Ja y'ëxëëk'ajtën ets ja tsyiptu'un tsipkajpxën, kyëpajkëjxy kya'ataja'any.

¹⁷ Nmëjpëjkta'akäämpyës yë Wintsën jä'ä ko oy winë tnipaye'ey; n'ëwäämpyës yë ëy mëti'ipë kyuuy'iipyën yë Wintsën yë xyëëw, yë xyëëw Ni'ik Këjxmëpë.