Salmos 67 - Biblia Dc en Mixe de Quetzaltepec

Salmo 67 Wä'än tëkokyë yë naax kajpn mtukxoontä'äkyë.

¹ Dios xypya'ëyo'owmëp ets xykyënu'kxmëty; wä'än xynyi''ijxkëtakëmë,

² ets tëkokyë yë naaxwiinyëtë ja'ay nijawëtëty mëti'ipë mtuknipëjktakëpën ets ko mijts myajnitsokp.

³ Mijts Dios, wä'än yë naax kajpn mwin'ëy mwinyä'äxyë, wä'än tëkokyë yë naax kajpn mwin'ëy mwinyä'äxyë.

⁴ Wä'än yë mëjëtypë naax kajpn tukyaax tukjokëtë yë xoontakën, jä'ä ko mijts, mëët yë tëyajtën yë naax kajpn xy'ëne'emy xymyëkäjpxy; mijts tu'kë'ëyë yë naax kajpn mtu'uwinwoopy naaxwiinyëtë apëtsëmy.

⁵ Mijts Dios, wä'än yë naax kajpn mwin'ëy mwinyä'äxyë, wä'än tëkokyë yë naax kajpn mwin'ëy mwinyä'äxyë.

⁶ Janty oyëty yë pëjktä'äky pyëti'iky ma kamën; jä'ä ko yë'ë nTios'ajtëm kyënu'kxën të tyajkëtä'äky ma ëëtsajtëmën.

⁷ Dios xykyënu'kxmëp. Wä'än tëkokyë yë naaxwiinyëtë ja'ay tukxoonta'aktë yë Wintsën.