Salmos 66 - Biblia Dc en Mixe de Quetzaltepec

Salmo 66 Tëkokyë mëti'ipë të xyajkojyën aak'oy yë'ë ets tukjotkëtaknëty

¹ Kuuy'ëwtë yë Dios mëët yë xoontakën, tëkokyë jënu'un m'itën mjuuky'atën naaxwiiny naaxkëjxy;

² kuuy'ëw kuuya'axtë yë myëjxëëw kyënu'kxyxyëëw, tukwin'ëwtë oypyë ëy yä'äxy.

³ Jëtu'un yë Dios ënëëmëtë: Dios, tu'kë'ëyë mëti'ipë të xyajkojy të xypyëjktä'äkyën janty oyëty yaj'ixy ets tukxoontaknëty. Mëët yë mmëkajtën, yë mmëtsiptëjk aakmijts mëmëtowanëp,

⁴ tëkokyë yë naaxwiinyëtë ja'ay aakmijts m'ëwtajtëp ets yë'ë mxëëw kyuuy'ëëw kyuuyaxtëp.

⁵ Min ixtë mëti'ipë Dios të tuuntä'äkyën, ja myëj'ajtën mëti'ipë të tyaj'ixyën ma naaxwiinyëtë ja'ayën:

⁶ ojts yë mëjnëë tyajnäywyä'kxyë ets ojts tyajwë'ëmy të'ëtsnaax, ye'epy ojts ja n'ap'ajtëm tuknaxtë ja nëë; paaty tyam tsojk Dios ntukxoontakëmë.

⁷ Yë'ë mëët y'ëne'emy myëk'ajtën xëmëkyëjxm, yë'ë kë'ëm y'ijx'ijtyp kyëwent'ajtyp yë mëjëtypë naax kajpn, këtiipë yë ja'ay mëti'ipë käjpxy kyumëtoownajxtëpën nyipëtë'ëkëtëty.

⁸ Miitsëty naax kajpnëty, wintsë'ëk mëjjawëtë yë Dios. Wä'än tyajmëtoy ko m'ëwtë mya'axtë.

⁹ Jä'ä ko yë'ë xyaj'ijtëmë juuky ets ka'ap nijëna'a të xy'ëxmajtsëmë ets ëxëëk njajtmëty nkëpäjtmëty.

¹⁰ Dios, mëti'ipës nTios'ajtëpën, tëës mijts xywyinma'any'ixtë wi'ixës nja'ay'atën, paaty mijts të xyajwa'atstës tä yë poop pujxn ja'ay tyajwa'atsyën.

¹¹ Tëë xy'ëwa'atsy etsës ëxëëk njatëty nkëpätëty; ojts yë mëjëtypë ëyo'on jotmay nyajnaxtës.

¹² Ojts xy'ëwa'atsy etsës nyaj'atään nyajtuktääntëty; jëtu'unës yë ëyo'on jotmay të ntuknaxtë tä mëk komnëë ets mëj jëën yajtuknaxyën, e ka'ap të xytyimja'atyëkoytyës, tëës jatëkok xyajjotmëkpëktë.

¹³ Tëkëjaanpës ma mtsajptëjkën etsës nyaka'any tu'uk yë wintsë'kën nino'okpyë mijts mwintuuy; jëtu'un'äämpyës ja nwaantakën nyaj'ëtukëty,

¹⁴ ja waantakën mëti'ipës ojts ntunyën ma mijtsën koos ënety nyajpaaty ëtsë'ëkëtuuy.

¹⁵ Ntukwintsë'ëkëjäämpy jëyujk nino'okpyë ets ni'kxpë; ntukwintsë'ëkëjäämpy yë oyëtypë tsajpkaayä'äy ets ni'kxëtypë tsajppax yä'äy, nëjkxëp näjyëtu'un ntukwintsë'ëkë kupixyny yä'äy.

¹⁶ Mintë miitsëty tu'kë'ëyë, jënu'un xytsyë'ëkëtën xymyëjjawëtën yë Dios. Mëtoow'itë, tyamës nimëtya'aka'any mëti'ipë të tunyën ma ëjtsën.

¹⁷ N'aawës të ntukmëkäjpxy ets nyä'änës të ntukmëjpëjktä'äky.

¹⁸ Ko jeexyë y'ëxëëkëty yë nwinma'anyës, kajxyëp yë Wintsën të tmëtoow'ity yë n'aaw n'ayukës;

¹⁹ e yë'ë, tëë tmëtoy ets tëë tja'akyukë yë ntsajpkäjpxyës.

²⁰ Tukxoontä'äky yë Dios y'itëty, jä'ä ko yë tsajpkäjpxy mëti'ipës të ntunyën ka'ap nëkoo të tkumëtoownaxy ets ka'ap të xytyukwintuk'ookyës yë tsyojkën jya'awën.