Salmos 60 - Biblia Dc en Mixe de Quetzaltepec

Salmo 60 Tsajpkäjpxy ma putëjkën yaj'amëtoyën mëti'ipë Tios jyä'ä'ajtypyën.

¹ Mëëtkyëjxm ko të mjoot'anpëky, mijts Dios, paaty ëëtsëty të xy'ëxmatstë, ixpëky ixtuny të xyajwë'ëmtës; e tyam ënät, tun yë mëyajtën mooytyëkës jatëkok ja jot mëjaaw.

² Mijts të xyajkutuky ets ja naaxwiinyëtë yu'kxëty ets y'ëwa'atsëty; e tyam yaj'ëtuk jatëkok ma të kyiitsyën, jä'ä ko jëtu'un kyëxë'ëky ni'ikyë yowë y'atëkooynyë.

³ Mijts të xyajkutuky ets mnaax mkajpn ëxëëk jyatëty kyëpätëty, jëtu'unës të tjatë tä ja'ay tsatym nyëë t'uukyën ets yajlokëjatyë.

⁴ Mijts të xymyo'oy tu'uk yë ijxpäjtën ja ja'ay mëti'ipë m'oyjya'awëyëpën, ets tkukä'äktëty ja ëyo'on jotmay.

⁵ Ëtsoowtëkës ets yajtsoktëkës mëët yë mëk'ajtën. Yaj'ëwaatsëpëtsëm mëti'ipëjaty m'oyjya'apën.

⁶ Jëtu'un yë Dios të y'ënä'äny ma tsyajptëjkën: Janty wi'ixpëmës jotkujk nnäjyawëja'anyë koos npëjkwä'kxa'any ja it naaxwiinyëtë mëti'ipë txëëwajtpën Siquem ets koos näjyëtu'un nyajwa'kxëty yë Sucotpë.

⁷ Galaad ets Manasés ëjts yë njä'ä; yë Efraín jëtu'unës njawë tääjës jeexyë yë nkujup nkëpajkëjxy nyaj'ityën; Judá jëtu'unës njawë tääjës yë ntajkën mëti'ipës mëët winë ni'ënä'ämën.

⁸ Yë Moab, jëtu'unës njawë tä pujxn kë'ëpujtaknën; yë nkë'ëkës jamës nasjänë ma Edomën, täätsës ntukyaax ntukjokë koos të nmëtä'äky ma ja Filistejë ja'ayëtyën.

⁹ ¿Pënës xy'ëkwoownëjkxëp jam ma ja naax kajpnën napotsypë? ¿Pënës xy'ëktu'uwinwowëp etsës nja'tëty jam Edom?

¹⁰ Jä'äxë ko mijts, Dios, tëës xy'ëxwa'antë; ka'ap tyam xy'ëkpanëjkxnë ja ntsiptuunpëtëjkëtyës.

¹¹ Putëjkëtëkës maas ja nmëtsipëtyën, jä'ä ko ëëts ja nmënaaxwiinyëtë ja'ay ka'ap myäyëtë xykyuwa'antëtyës.

¹² Mëët ja Dios ja nyäpyutëjkën jyëkyejpy wi'ix tii mëj këjää ntu'unmëty; jä'ä ko yë'ë jëtu'unyë tnaxkutäänëja'any ja nmëtsip'ajtëmë.