Salmos 51 - Biblia Dc en Mixe de Quetzaltepec

Salmo 51 Mijts Tios, pa'ëyoow najts'ëyo'owëkës

¹ Mijts Dios, mëët yë mtsojkën mja'awën, pa'ëyoow najts'ëyo'owëkës; mëët ja m'oyjot m'oywyinma'any ja mëjpë këjääpë, po'tëkës yë npoky.

² Pujkës jä'tskës ja n'ëxëëk'ajtën. Tukniwijtstutkës ja nnëë npoky.

³ Ëjts nja'apës kë'ëm ko tëës nkäjpxykyumëtoownaxy; yë nnëë npokyës ninu'un jap kyatimjyëwä'äky maas yë njot nwinma'anyën.

⁴ Mijts të nmëtëkoy, koos të ntuny ja ëxëëkpë mëti'ipë ka'ap xy'oy'ixyën. Paatykyëjxm ja mtëytyu'unën xypyaat'ajtpës; e ëjts ka'apës mëpaat njëjpmëwa'akë mëti'ipë mijts mtëy'ajtën'ajtypyën.

⁵ Tyamës yajxon nikäjpxy koos ëxëëkës nja'ay'äty, jëtu'unës ntimmyiiny ntimyjyä'äjty naaxwiiny naaxkëjxy pokyjyä'äy, koos ënety njap'atynyëm ntaakës jyootjoty.

⁶ Tëyajtën ko mijts yë'ë mtsojkpy mja'ap yë jot winma'any mëti'ipë wa'atsën ets mëtëyën, mijtsës yë wijyajtën të xymyo'oy mëti'ipë yu'utsypyaat yajpatpën.

⁷ Yajwatskës yë njot nwinma'any mëët yë po'tn ets jëtu'un wa'ats nwë'ëmëtyës, pujkës ets poop nwë'ëmëtyës tä tsajp o'pkyën.

⁸ Mooykyës yë xoontakën ets jotkujk'ajtën, yajjotkujktakës jatëkok oyës ëxëëk të xy'ëktuny.

⁹ Ka'ap mëpaat yë'ë xy'ix nnëë npokyës, po'ta'a tëkokyë yë ntuuntëko'oy nkajpxtëko'oyënës.

¹⁰ Wintsën, pëjkta'ak ma ëjtsën tu'uk jot winma'any wa'atspë ets mooykyës yë jot winma'any oypyë ets mëtëypyë.

¹¹ Ka'ap mëpaat xyjyëkexyës mijts mwintuuy, ets ka'apës mëpaat xypyëjkë yë wa'atspë mmëkajtën m'oyajtën.

¹² Mooykyës jatëkok ja xoontakën mëti'ipë ja mnitsokën yäjkpyën; ets wä'änës yë jot winma'any oypyë nnätyuktu'uwinwoyë,

¹³ jëtu'un tjëkyäpëty ntukni''ixëtyës ja mnë'ë mtu'u ja ja'ayëty mëti'ipë käjpxy kyumëtoownajxtëpën, ets pokyjyä'ätyëjk jyootwinpitëty ma mijtsën.

¹⁴ Dios, yë nTiosës mëti'ipës xymyoopyën yë nitsokën, këtii xy'ëwa'atsëty etsës pën nyaj'ook nyajtëkoyëty, ets jëtu'un tjëkyäpëty nikajpx nimëtya'akëtyës ko mijts aak'oy aak mëtëy winë xytyuny.

¹⁵ Wintsën, mijts myajkutukëp ets tjëkyäpëty wi'ixës nkajpxëtyën, etsës nkuuy'ëw nkuuyya'axëty mijts yë mmëjajtën.

¹⁶ Jä'ä ko mijts ka'ap xytsyoky yë wintsë'kën no'okpyë, mëti'ipë jeexyë yam mijts nmoopyën, ka'ap jëtu'unpë xytyukjotkëtä'äky.

¹⁷ Yë'ë Dios wyintsë'kën'ajtyp jot ja'awën yu'unkpë naxymyëpë, Mijts Dios, ka'ap xy'ixtijy yë jot ja'awën mëti'ipë näjya'awëyëpën piw nuuk.

¹⁸ Oyjyawë yë Sión kajpn, ko oy mTios'aty; kojë'ëk jatëkok yë pyotsy.

¹⁹ Jäänëm xy'ëxajëty ja wintsë'kën mëti'ipë myajmoopyën, tä yë jëyujk tsajpkaajën, jëëntë'ëtspë; jäänëm myajtukwintsë'ëkëty ja tsajpkaa ayääkë ma mwintsë'këntyaknën.