Salmos 5 - Biblia Dc en Mixe de Quetzaltepec

Salmo 5 Ma mëët ja Wintsën nkuxëënytyakëmën

^1-2 Wintsën, mëti'ipës nkutujkën'ajtypyën, ets mëti'ipës nTios'ajtypyën, mëtoow'it yë n'aaw n'ayukës, ëkmëmay ëkmëtaj ja n'ëjënës ntu'kënës ets mëtoow'it mëti'ipës n'amëtoopy mpëjktsoopyën, jä'ä ko mijts nmëkäjpxyp.

³ Tsojk xymyëtoow'ita'any yë n'aaw nyo'knës. Jopy jopy ntuk'ëwa'anëkyojy yë n'amay njotmayës, ets ënät n'a'ixy njëjp'ixyës ja m'ëtsoowinpijtën.

⁴ Mijts ka'ap mTios'aty ets ënät ja poky këtyey xy'oyjawë ëkë xymyëjpëjktä'äky, yë ëxëëkja'aytyëjk ka'ap tjëkyepy jyuuky'atëty ma mijts myajpaatyën,

⁵ ka'ap jam nyatëkë'aty ja tsënaaytyakn ma mijtsën ets jam y'ijtëpëty ja ja'ay mëti'ipë Nämyëja'aw näjyääntyja'awëtëpën, mijts ëxëëk xy'ixy yë ja'ay mëti'ipë ëxëëkpë tyuunk'ajtypyën.

⁶ Myajkutëkoopy ja win'ë'ëmpë antakpë, ets ka'ap xykyupëky mëti'ipë ja myëku'uk y'ayäjkpy kyë'ëyäjkpyën ma ja ëxëëkpën ets mëti'ipë yajja'ay'o'kpën.

⁷ E ëjts mëëtkyëjxm koos xytsyoky xyjyawë, jyëkyejpyës ntëkëty ma ja mtsajptëjkën; njëkyejpy mijts n'ëwtat nmënu'kxta'akëty mëët tu'kë'ëyë ja winkutsë'kën, ets jamës ja njot nwinma'any mpëjktä'äky ma mtsajptëjkën.

⁸ Wintsën, mëët ko jyää'atë mëti'ipës xymyëtsip'ajtëpën, n'amëtoyës ets xytyu'uwinwow xytyu'uwinwitsëtyës ma ja nipaye'eyën mëtëypyë, ets woownëjkxkës ma ja oypyë ja mnë'ë mtu'ujën.

⁹ Yë'ëjëty nijëna'a winë tëyajtën tkakajpxtë; tëj joow yë jyot wyinma'any yajpaatë ma yë'ëjëtyën. Yë y'aaw yo'knëty, jëtu'un tä o'kpëjutën ëwa'atspë; aakyë'ë kyajpxtëp ka'apë myëtëyëtyën.

¹⁰ Dios, mëti'ipës nTios'ajtypyën, tëytyun. Mijts myajkutukëp ets jëtu'unyë mya'ta'ajëty mëti'ipë myëmaay myëët'ajtëpën. Këtii xykyupëkëty, jä'ä ko këjää pyokyëty; jä'ä ko tëë mkäjpxykyumëtoownaxëtë.

¹¹ Wä'än txoonta'aktë yë ja'ayëty mëti'ipë mijts mkuwäämpyën: wä'än xëmë t'ëwtë tya'axtë jä'ä ko mijts mkuwäämpy. Mtukxoontakëp mëti'ipë mtsojkëpën mja'awëpën,

¹² jä'ä ko mijts Wintsën mkënu'kxyp mëti'ipë oy mmëtuunëpën; yë m'oyjot jëtu'un xytyukna'ëwtity tä akëëytyukën.