Salmos 48 - Biblia Dc en Mixe de Quetzaltepec

Salmo 48 Yë Sión myëj'ajtën mëti'ipë Tios kyajpn'ajtypyën

¹ Yë Wintsën myëët'ajtyp mëj'ajtën; yë nTios'ajtëm patëp ets nwin'ë'ëw nwinyaxmëty ma kyajpnën ets ma tyun kyopkën wa'atspë.

² Janty oy kyëxë'ëky yë Dios yë tyun kyopk mëti'ipë txëëwajtpën Sión, anëkëjxmtsowpë yajpaaty. Yë'ë xyoontakën'ajtyp tëkokyë yë naaxwiinyëtë; ja kajpn mëti'ipë yajkutujkpë kyajpn'ajtypyën.

³ Dios yë'ë jam yajpatp ma akujktëjkën jam Jerusalén tëë Dios nyänyikäjpxyë ko yë'ë tsoktakn'ajtp xëmëpë y'ityën.

⁴ Ojts yë yajkutujkpëtëjk may jyanämyukëtë ets tjanitso'ontë ja Jerusalén kajpn tääts tyajkutëkoya'antë;

⁵ e ko t'ijxtë ja naax kajpn, tääts ojts tsyë'ëkëtë ets tsyëtyuuypyëjktë, jëtu'un kyäktaaytyë.

⁶ Yajxon yë tsë'ëkë nyijäämku'tsëtë: jëtu'unyë nyäwyi't nyäxya'tsënëtë mëët ja pëjkën, tä tu'uk yë to'oxytyëjkën mëti'ipë u'unk maay pyatäämpy y'ixäämpyën.

⁷ Jëtu'un tä mëkpoj myinyën anajnytsyow, mëti'ipë yajma'typën yë kepy nëëwinye'epyë jampë yajpaatën Tarsis.

⁸ Jam ma ja Dios ja nyaax kyajpnën, yë Wintsën mëti'ipë maaytyääyëpën winë, tëës mëët yë nwiin ntimy'ixtë, mëti'ipës ënety tëë nyajtukmëmëtya'aktën: Dios yë'ë xëmë oy yaj'itëp yë Jerusalén kajpn.

⁹ Dios, koos të nyajpaatë jap tsajptëkoty, yë'ë nmaaytyëpës ntajtëpës ko mëj mijts yë tsojkën ja'awën xymyëët'aty.

¹⁰ Dios, kënu'kxy yë mxëëw nyäxy naaxwiinyëtë apëtsëmy, jëtu'un ijxtëm mëpaat mëj'äämpy yajjawën. Mëët yë mkutujkën ets mmëkajtën winë xynyipaye'ey.

¹¹ Wä'än yë xoontakën jam tyajpaaty ma Sión kopkën; wä'än yë Judá ja'ayëty t'ätstë txoonta'aktë mëët yë jotkujk'ajtën mëët ko mijts oy winë xytyuknipëjktaakë.

¹² Na'ëwtitë yë Sión ets mëtyowtë naak yë potsy tmëëtëty;

¹³ ixtë wi'ix nyapotsyëtyën ets ixtë yë kyëmoontëjk, ets tjëkyäpëty wi'ix xytyukmëmëtya'aktëtyën mëti'ipë juuky'atantëpnën.

¹⁴ Jä'ä ko ya'atë Dios, yë'ë xëmë nTios'ata'anëm oy tyimjëna'ajëty. Yë'ë xytyu'uwinwowa'anëm winë xëëw winë jëmëjt.