Salmos 45 - Biblia Dc en Mixe de Quetzaltepec

Salmo 45 Ma yajnimëtyä'äkyën wi'ix tu'uk ja yajkutujkpë pyikyën

¹ Janty oypyë yë aaw ayuk tyam nmääpy ntäjpyës; yë nyä'änës jëtu'un të tii yajtukja'ayën mëti'ipë jääpyëtëjk tyukjaaytyëpën. Tyam nkajpxa'anyës ja ayuk mëti'ipë oy yajmëtoopën, yajkutujkpë wyintuuy.

² Tu'uk mijts mye'etyëjk'aty janty'oy janty tsujpë ma ja nimaypyë ja ye'etyëjktëjkëtyën. Ko myajtukxoontä'äky ets ko myajtsoky myajjawë, jam yajmëtoy ma m'aaw m'ayukën. Paaty yë Dios kyënu'kxën të mmo'oyë xëmëkyëjxm.

³ Nätyukwëënët yë mtëypyujxn mijts jotmëkja'ay, jä'ä ko yë'ë mëët oy mkëxë'ëky.

⁴ Yë mmëj'ajt m'oyajtën tu'uye'eyaanp ets mëta'akaanp. Nyitsiptunäämpy yë tëyajtën, ets nyipaye'eyäämpy yë ëyoopëja'aytyëjk. Yë m'a'oykyë'ë mëjwiin këjää winë tuna'any.

⁵ Mijts yajkutujkpë, aak mwinkoxtënaayëp yë ja'ay wiink kajpnëpë tsyoontën, yajxon yë mti'pxn jyëjpme'eyëty, ets ko mmëtsip pyäätyë timtukjë'p najxëp yë jyot wyinma'any.

⁶ Yë m'ënä'ämën mkutujkën, mijts Dios, ijtëëp yë xëmëkyëjxm, yë'ë ja kuttujkën ma xëmë y'ityën ja mëtëypyë ja nipaye'eyën.

⁷ Mtsojkpy mja'ap yë oyajtën ets m'ëxëëk'ijxyp yë ëxëëkajtën. Paaty mijts, Dios të mwin'ixyë, yë Dios mëti'ipë mTios'ajtypyën, ets të mmo'oyë yë xoontakën wäänëni'ik këtiinëm jyëtu'unëty ja mmëku'uktëjk.

⁸ Tëkokyë yë mwit mtujkxy aak pa'akxu'kp. Jap ma mkutujktaknën mëti'ipë oytyunyën mëët yë pajk juunpë ets oyëtypë, xuxtëp koowtëp jap ja'ayëty.

⁹ Ja to'oxy'ëna'këty mëti'ipë jam yajpatëpën ma mëtëy winë xynyipaye'eyën aakjä'ä jam ja oyëtypë mëti'ipë mëj'äämpy ijtëpën; ja wintaj mëti'ipë yajkutujkpën a'oytsyow y'u'unyë ma mëët myajkutukyën, yë'ë mëët y'oytyunyëty ja pu'ts pujxn oyëtypë.

¹⁰ Mëtoow'it, mijts u'unk mijts nëëx; yajxon ja'akyukë mëti'ipë yam ntuk'ënëëmëjäämpyën: Ja'atyëkoy yë mteety mtaak ets tëkokyë yë mjëëky mmëku'uk,

¹¹ jä'ä ko yë yajkutujkpë y'oy'ijxyp ko mijts m'oyëty mtsujëty; yë'ë mwintsën'ajtyp ets yë'ë patëp xymyëmëtowëty.

¹² Yë to'oxytyëjk mëti'ipë mëj'äämpy ijtëpën jam Tirë, ets kumeenyjyä'äyëty mëti'ipë muum kajpntum yajpatëpën mayëty winë tmëmintë jä'ä ko yë'ë tsyojktëp ets xy'oyjyawëty.

¹³ Ja yajkutujkpë ja nyëëx, janty'oy yaj'ixy, yë wyit yë'ë mëët y'oytyunyëty yë pu'ts pujxn.

¹⁴ Oy të yajxoxy, jam yajwoownëjkxy ma yajkutujkpën, yë'ë paye'eyëp ja to'oxy'ëna'k mëti'ipë këwent'ajtëpën, ets ja to'oxy'ëna'k mëti'ipë mëët oy nyäjyawëtyën.

¹⁵ Mëët yë mëj xoontakën nyëjkxtë, ets tyëkëtë mëët ja jotkujk'ajtën ma ja yajkutujkpë yajkutukyën.

¹⁶ Yë m'u'unk m'ëna'k mijts yajkutujkpë, yë'ë jyä'ä'atantëp yë mkutujktakn, yë'ë nëjkx yajkutuktë ma ja m'ap m'ok të yajkutuktën, ets nëjkx xyajkutujkpë'aty ma tëkokyë naax kajpnën.

¹⁷ Ëjts nyaj'ijtëwäämpyës yë mxëëw, ets mja'amyätsëtëty yë ja'ayëty jënu'un kyamintënëm naaxwiiny, ets naax kajpn mëj'äämpy myajnaxëtëty.