Salmos 44 - Biblia Dc en Mixe de Quetzaltepec

Salmo 44 Tsajpkäjpxy ma Tios näypyutëkë yaj'amëtoyën

¹ Mijts Dios, tëës nmëtowtë mëët yë nkë'ëmtatskëtyës, ets ojts xytyukmëmëtya'aktës yë n'ap n'okëtyës wi'ix ojts winë xytyunyën tëëyëp ko yë'ëjëty jyuuky'ajtë.

² Mijts ojts kë'ëm xy'ëxkexy yë ja'ayëty mëti'ipë ënety y'ëwtajtëpën wiink tios, ëxëëk ojts xytyuny yë naax kajpn ets xy'ëxwojpy ets jam xyajtsënaaytyaknpëjky ja n'ap n'okëtyës.

³ Ka'ap ojts yë'ëkyëjxmëty myëta'aktë ko tmëët'atë kyë'ë ets pyujxn mëti'ipë myëtsiptuuntëpën; ka'ap ojts yë it naaxwiinyëtë tpaatë. Mijts ojts winë xytyuny mëët yë mëk'ajtën ets mëjaaw. Yë mtë'kxën mjajën yë'ë ojts winë tyaj'ixyë, ko mëj këjää ënety xytsyoky xyjyawë.

⁴ Mijts, mëti'ipës nmëj ënä'ämpë'ajtypyën, mëti'ipës nTios'ajtypyën, Mijts të xyajmëtä'äky yë mnaax mkajpn;

⁵ mëët mijtskyëjxm tëës nmëmëta'aktë yë nmëtsipëtyës; mëët yë mxëëw jëtu'unyë yë mëtsip të n'atään të ntuktääntës, mëti'ipës ënety xynyipëtë'ktëpën.

⁶ Jä'ä ko ka'apës mëpaat yë'ë tu'ukyë ntukjotkujk'aty yë ti'pxn mëti'ipë yajmëtsiptuunpën, ëkë tëypyujxn mëti'ipës jeexyë xyajmëtakpën;

⁷ mijts ojts xypyutëkëtës ets nmëmëtaktës ja nmëtsip, mijts myajtsëtyu'unpat mëti'ipë ënety ëëtsëty xymyëtsip'ajtëpën.

⁸ Mijts Dios, mëj'äämpy xëmë nyaj'ita'antë, ets xëmë yë mxëëw nmëjpëjkta'aka'antës.

⁹ E mijts tëës xy'ixtijtë, tsëtyu'unmëëtës të xyajwë'ëmtë. Ka'ap mëët m'ëk tso'onë ntsiptuunpëtëjkëtyës.

¹⁰ Mijts të m'ëna'any etsës ja nmëtsiptëjk ka'ap nmëwinpitëty, mëti'ipës xymyëtsip'ajtëpën tëë tmä'tsta'atë winë ets të tmënëjkxtë mëti'ipë tyimtsojktëpën.

¹¹ Jëtu'un mijts të xykyë'ëyaktës tä tu'uk yë kupixynyën mëti'ipë yajmënëjkxpën ma y'o'ktaknën; axit ako'owës të xyajjatë ma ja'ayëtyën mëti'ipë ka'ap tios t'ëwtatën;

¹² jëtu'un tpatnë tä jeexyë yë mnaax mkajpn janty mëpaat të xynyito'knën, e tiitën mpatyp m'ijxyp ko janty mëpaat xytyooky.

¹³ Jëtu'unës mijts të xyaj'awinpijnëtë tä i'kën mëti'ipë je'eyë yajxik yaj'ëwë'kpën; yë nmëtëjkës ëxëëkjatyës xy'ënëëmëtë ets xynyëxi'ik xytyukxi'iktës.

¹⁴ Mijts yowë m'ëwatsnëp ets ja'ay xynyëxi'ik xytyukxi'iktëtyës mëti'ipë ka'ap yë Dios t'ëwtatën, ko muum xy'a'ijxnaxtës tääts yë kyëpajk tuntë jëpijpminy jëpijpxëpy.

¹⁵ Winjëpom nyajnëxi'iky nyajtukxi'ikyës; naax'ix naaxkow xëmë n'ityës mëët ja tsëtyu'un,

¹⁶ mëët koos yë nmëtsip xy'ëxëëk ixtë ets ko xyaj'ooka'antës.

¹⁷ Koos jëtu'un të njat të nkëpätë, ka'ap yë'ëjëty ko nja'atyëkoytyë. Ka'apës maa nkäjpxykyumëtoownaxtë yë mkäjpxytyu'unën.

¹⁸ Ka'apës nmaytyë ntajtë mijts n'ëxmatstëty, yë mnë'ë mtu'u xëmës nkuuynyëjkxa'antë.

¹⁹ E mijts ni'ikyës ëyo'ontum të xyajwë'ëmtë. Etsës o'kënjëjp'am të nka'atë.

²⁰ Ko jeexyë mijts Dios të nja'atyëkoytyë, ets jeexyë wiink tios të npanëjkxtëkëtës ets jeexyë të nja'atyëkooynyëtë.

²¹ Mijts wa'ats jeexyë xy'ixy xynyijawë, jä'ä ko mijts mtuk'ijxnajxyp yë jot winma'any.

²² E mëët mijtskyëjxm o'këntumës xëmë nyajpaatë; jëtu'unës nyajpëjktaknëtë tä tu'uk yë kupixynyën mëti'ipë yajmënëjkxnëpën o'këntum.

²³ ¿Wi'ix ko mma'ay Wintsën? Ëkwij, këtii mmaanaxy. Këtiis xëmë xyjyä'äytyëkoytyë.

²⁴ ¿Wi'ix ko mnäyu'utsyë? ¿Wi'ix ko xyjyä'äytyëkoytyës? ¿Këtii xy'ixy koos n'ëyowtë?

²⁵ Tëës Näkyë'ëyakëtë, ëxëëkës njajnëtë nkëpäjnëtë, ets ka'ap pën mëj xy'ëk'ijxnëtës, je'eyë nyajpawijts nyajpapo'tnëtës.

²⁶ Pëtë'ëk, min putëjkëtëkës, yajtsoktëkës mëët yë këjääpë mtsojkën mja'awën.