Salmos 42 - Biblia Dc en Mixe de Quetzaltepec

LIBRO II Salmo 42 Ëjts Tiosës yi'iyë ntuk'ijxpejtyp

¹ Jëtu'un tä jëtyu'u u'unk tyëëtsën, nëë'ëkë'pë nyijkxyën nëë ukpë, jëtu'un n'ixta'ay mijts Dios, mëti'ipës n'ëwtajtypyën.

² Ëjts nyajmëyäjtypyës yë Dios yë näpyutëkë, Dios juukpyë. ¿Jëna'ajës jëtää jatëkok jam nëjkxëty Dios wintum?

³ Xëëny kootsës të një'ëy të nyä'äxy, jëtu'un yaj'ijxnë yë'ëjës yowë nwiin nëë xykyuxp. Ja nmëtsipës jëtu'un y'ëna'antë: ¿Maa ënät ja mTios?

⁴ Koos jëtu'unpë nmëmay nmëtajy, japës ntimjyawë pyëjkë'ëky njootjotyës. Je'eyës njaakja'amyetsy ko ijty mëët yë mayjyä'äy nnëjkxyës jam tsajptëkotm, maas ijty ëjts jëyëjp nëjkxyën akujk jotkujk ets nyajnaxtës ja kukajpxën ja'awëkyëtakën. Mëj ja xëëw ijty tyunyë.

⁵ ¿Wi'ixës ko nkumon nkutukëty, ¿wi'ixës ko nkumay nkutajëty? Ëjts Tiosës ntuk'ijxpejtyp, mëti'ipës je'eyëm nyajmëjnaxäämpyën. Tääpë Dios yajtsokp yë'ë ets yaj'ëwaatsëpëtsëëmp.

⁶ Mon tukës nnäjyawëty, paaty mijts nmëmay nmëtajy. Jampaat ma Jordán mëjnëëjën, ma Hermón kopk ets ma Misar kopkën.

⁷ Yamëtoop yë mnëëtax ko kyëtä'äky jap wokjoty, yë nëëkom mëti'ipë të xykyexyën jam të nyajxta'ay maas yë nini'kxën.

⁸ Yë Wintsën xytyuknikäjxpës yë tsyojkën jya'awën xëëny; e ko kyoots'aty ëëp yaxpës jää, etsës yë Dios nmëkäjpxy mëti'ipës xyajjuuky'ajtpën.

⁹ Jëtu'unës Dios n'ënëëmë mëti'ipës xykyuwaanpën: ¿wi'ixës ko xyjyä'äytyëkoy? ¿Wi'ix koos nyajpaatëty jë'ë ya'ax ko ja nmëtsipës ëxëëk y'ëti'itsy y'ënä'äny?

¹⁰ Jëtu'unës yë nwaay mpajk pyëjknë y'atoonë koos xyajjoot'anpëktë yë nmëtsiptëjk, ets janaam jatsojk xyajtëwtës: ¿Ma ënät ja mTios?

¹¹ ¿Wi'ixës ko nkumon nkutukëty? ¿Wi'ixës ko nkumay nkutajëty? Ëjts Tiosës ntuk'ijxpejtyp, mëti'ipës je'eyëm nyajmëjnaxäämpyën. Tääpë Dios yajtsokp yë'ë ets yaj'ëwaatsëpëtsëëmp.