Salmos 40 - Biblia Dc en Mixe de Quetzaltepec

Salmo 40 Tios, n'oyjya'apës koos npatuny yë mtsojkën.

¹ Tu'ukyë jam yë njot nwinma'anyës npëjktä'äky ma Wintsënën, ets yë'ë tëë tmëtoy koos nyä'äxy njoky;

² tëës xyajpëtsëmy jap o'kpëjutjoty, nëëjoty mo'ontsjoty. Jamës të xyajwa'kta'atsy tsaakëjxm ets ta'tspëky të nwa'ak'oyës.

³ Tëës xytyuk'ëy yë jemy'iy, ëy mëti'ipë yajtukkuuy'ëëpën nWintsën'ajtëm Dios. Nimay yë ja'ay jyot wyinma'any të y'oyë ko jëtu'un të t'ixtë ënät të tpëjkta'aktë ja wyinma'any jämyë ma Wintsënën.

⁴ Jotkujk yë ja'ay yajpaaty mëti'ipë yi'iyë tyuk'ijxpejtypyën yë Wintsën, ets ka'ap tmëjwa'kpety mëti'ipë je'eyë nämyëjja'aw näjyääntyjya'awëyëpën mëti'ipë wiink tios y'ëwtajtëpën.

⁵ Wintsën mëti'ipës nTios'ajtypyën, mëj këjää winë të xytyuny të xykyäjpxy ma ëëtsëtyën koos xyajmëj'atë. Ni pën kyajëtu'unëty tä mijtsën. Ëjts njanikajpxäämpyës tëkokyë mëti'ipë të xytyunyën, je'eyëp ko may oy, ka'apës xymyäyëty nikajpxta'ajëty.

⁶ Mijts ka'ap xytyukjotkëtä'äky ko ja jëyujk ooky myajtukwintsë'ëkë, ëkë ko ja aaypyajk ujtspajk myajtukwinkupëkë; ni yë'ë të xykya''amëtoy wintsë'kën ets tii myajtukmëyoxëty. Mijts ni'ikyës yë nkopk ntatsk të xyaj'ëwatsë.

⁷ Paatyës të n'ëna'any: Tyaajës nyajpaaty, jëtu'un ijxtëmës jap nokyjoty nyajnikäjpxyën.

⁸ Ëjts ntunäämpyës mëti'ipë mijts mni'ënä'ämëpën, Dios, mëti'ipës nTios'ajtypyën; Njootjoty nwinma'anyjyotyës nyaj'ity mëti'ipës mijts xytyuk'ni''ijxëpën.

⁹ Tëës nikäjpxy ma mnaax mkajpnën tëkokyë mëti'ipë oy yajtuunp yajkajpxpën. Mijts Wintsën, wa'ats xynyijawë ko ka'apës amonyë n'ity.

¹⁰ Ka'apës të ntuk'amony mijts ja mtëyajt m'oyajtën; tëës nikäjpxy nimëtyä'äky ko mijts aak'oy winë xytyuny ets myajnitsokp. Ka'apës nijëna'a të nkuyu'utsy yë mtsojkën mja'awën ets mtëyajt mjaantyajtën ma mnaax mkajpnën mëjpë këjääpë.

¹¹ E mijts, Wintsën, këtii xytyukmëj'aty yë myu'unkjot mnaxym jot ma ëjtsën. Yë'ëjës xykyëwent'atëp xëmë yë mtsojkën mja'awën ets mtëyajtën.

¹² Kanaak yë ëyo'on jotmay të nmënaxy të nyajnaxyës ka'apë nyimëtyaknëtyën. Nkë'ëmpokyës të nätyuktunyë ëxëëk; yë'ëpaat yë n'ijxënës të myoonë. Tääjës yë nkuwaayën jëtu'unës yë npoky myäyëty, ka'apës yë njot nwinma'any y'ëk'ënanë tii ntunëtyës.

¹³ Wintsën, tun yë mëyajtën, yajnitsokës. Wintsën nimiinkës pojën, putëjkëkës.

¹⁴ Wä'än tsëtyu'unpaatë mëti'ipë ja ënantëpën xyaj'ooka'antës. Wä'än tkä'äktë wintsëtyu'un jëjptsëtyu'un mëti'ipës xy'ëxëëktunantëpën.

¹⁵ Wä'än tkä'äktë tsëtyu'unmëët mëti'ipës xynyëxik xytyukxiktëpën.

¹⁶ E mëti'ipë mtuk'ijxpäjtëpën wä'än txoonta'aktë; tëkokyë ja'ay jënu'un tsoktën ets xyajnitso'okëty wä'än t'ëna'antë xëmë: Yë Wintsën myëët'ajtyp yë mëj'ajtën.

¹⁷ E ëjts maas nyajpaatyën mon tuk, këtiis xyjyä'äytyëkoyëty, Wintsën. Mijtsës xypyutëjkëp etsës xyaj'ëwaatsëpëtsëmy; Wintsën këtii mpo'oxy, tsojkyë min.