Salmos 4 - Biblia Dc en Mixe de Quetzaltepec

Salmo 4 Ko yë Wintsën tu'ukyë ntuk'ijxpäjtmëty

¹ Dios mëti'ipës xykyuwaanp xykyënu'kxpën, xy'ëtsowëpës ko nmëkajpxëty. Koos ënety nyajpaaty mon tuk, ojtsës xymyo'oy jotkujk'ajtën. Pa'ëyoow najts'ëyo'owëkës ets mëtoow'it wi'ix n'ënëëmën.

² Miitsëty ninu'un mëj këjxm mnäyajnaxëtën, ¿Jëna'apaat ëxëëk maya'an mtaja'antë, mëët ëjts koos oy njuuky'äty, jëna'apaat yi'iyë xytyuunk'ata'antë ka'apë myëtëyëtyën ets ka'apë jyääntyëtyën?

³ Nijawëtë ko yë Wintsën yë'ë tsyojkpy yë ja'ay mëti'ipë oy mëtuunëpën ets mëmëtoowëpën; nijawëtë ko yë Wintsën xymyëtoow'ijtpës koos nmëkäjpxy.

⁴ Mëët'atë ja näywyinkutsë'kën ets këtii mpokytyuntë. Ko ënety jam mmaanëtë mpo'kxnëtë, ëk'itë amonyë ets mëmay mëtajtë pën oy winë të xytyuntë.

⁵ Tukwintsë'ëkëtë yë wa'atspë ets oypyë ëmuumtu'ukjot, yi'iyë tuk'ijxpätë yë Wintsën.

⁶ May y'ëna'antë ja'ayëty: ¿Pën jëtää xy'ëktuk'ijxmëp ja oyajtën jotkujk'ajtën? Wintsën, ni''ijxkëtaktëkës mëët yë m'oyjot m'oywyinma'any.

⁷ Mijts tëë ni'ik xyajjotkujktä'äkyës, këtiinëm jëtu'un jyotkujk'atë mëti'ipë myëët'ajtëpën tsajpmok ets ja tsatym nyëë mëjwiin këjää.

⁸ Akujk jotkujkës nyäkyo'okyë ets näjyëtu'unës nma'ay, jä'ä ko mijts Wintsën, mijtsës xyajjuuky'ajtp akujk jotkujk.