Salmos 35 - Biblia Dc en Mixe de Quetzaltepec

Salmo 35 Tsajpkäjpxy ma Tios näypyutëkë yaj'amëtoyën

¹ Wintsën, jëjpkuwa'akë näjyëtu'un, mëti'ipës xyjyëjpkuwa'këpën; ëtuk mëti'ipës xy'ëtujkpën.

² Pëjkë'ëk mëti'ipë mnätyuk'akëëytyujkëpën ets minës putëjkëk;

³ kajpë'ëk yë mku'umën ets xyjyëjpkuwa'akëty mëti'ipës xy'ixjëtijtp xypyajëtijtëpën; nëmaaykyës ko mijtsës xyajnitsokp.

⁴ Wintsëtyu'un jëjptsëtyu'un kyä'äktëty mëti'ipës xyaj'ookantëpën; wintsëtyu'un jëjptsëtyu'un kyä'äktëty mëti'ipës ëxaty të xyjyatuna'antën.

⁵ Wä'än jëtu'un tjatë tkëpätë tä pu'uxm wyimpapojyën, mëti'ipë yë tsajpjotmëtë kukäjpxy të t'ëxkexyën.

⁶ Wä'än yë nyë'ë tyu'u tkukootsë ets wä'än nokts twë'ëmy, yë Dios kyukäjpxy yë'ë ixjëtit pajëtitëtëp.

⁷ Ajotkumonë yë n'o'ktaknës të tnipëjktaakëtë, ets ka'apës tii poky ntuny, tëë jut tajtë maas nkuka'anaxëtyën.

⁸ Kë'ëm ajotkumonë tyukmina'anëtë ëyo'on jotmay; kë'ëm kyuka'anaxa'antë ma ja o'ktaknën mëti'ipë të tuknipëjktaakëtën. Wä'än twë'ëmtë jotmayjoty.

⁹ Ënätës ja Wintsën ntukxoonta'aka'any, jä'ä ko yë'ëjës ënety të xyajtso'oky.

¹⁰ Täätsës n'ëna'ana'any ëmuumtu'ukjot: ¿Pën jëtu'un tä mijtsën Wintsën? Myaj'ëwaatsëpëtsëëmpy yë ëyoopëja'ay ets mëti'ipë winë yajmëyäjtypyën ma ëxëëk yajtun yaj'ënëëmëtën, ma ja jotmëktëjkëtyën.

¹¹ Tä ja'ay mëti'ipë poky nyikajpxëpën ka'apë myëtëyëtyën ets ënät tyajtëwtë ka'apës nijawën.

¹² Ëxëëk tuunwinpitë koos tii oy ntuny; mon tukës näjyawëty koos jëtu'un n'ixy.

¹³ Ko ijty pyëkëtë y'ixëtë, näjyëtu'unës ijty ëjts nyajpaaty mon tuk mëët yë'ëjëty, etsës ja nwit ntuktëkë mëti'ipë kuumpën u'kxpën, täätsës näjyëtu'un n'ayuu'aty n'axëëw'aty; ets maas ja njot nwinma'anyën ka'apës npo'kxy mëët ja wa'anën tso'owën.

¹⁴ Mon tukës ijty njëtity, jëtu'un tä jeexyë nmëkjawënës koos yë ntaak të y'o'knë, ëkë tä jeexyë yë nmëku'ukës ëkë nmëkä'äxës të y'o'knën.

¹⁵ E koos ënät näjyëtu'un të xytyukka'ay ja ëxëëkpë, tu'kë'ëyë yë'ëjëty je'eyës të xynyëxi'ik të xytyukxi'iktë; jëtu'un tä jeexyë ka'ap n'ixy'atënës ëkë tä jaaypyaat jaaypyo'kxyën; ëxëëkës të xytyuntë janaam jatsojk.

¹⁶ Je'eyës të xyajjë'ë të xyajya'axtë etsës të xynyëxi'ik të xytyukxi'iktë, täätsës xywyintë'kxtë äjkëtëp yowë.

¹⁷ Wintsën, ¿jënaak xëëw jënaak jëmëjt jëtu'un tyaapë xyaj'ita'any? Yajtsokëkës yë njuukyajtën mëti'ipës tu'kpajk njuukyajtën'ajtypyën, ma tääpë ja'ayëtyën mëti'ipë jëtijtëpën kaa yowë ni'tsp.

¹⁸ Nmo'ojäämpy yë kukkajpxën ja'awëkyëtakkën ma ja mnaax mkajpnën. Mijts nkuuy'ëwäämpy nkuya'axäämpy ma ja mayjyä'äy yajpaatën.

¹⁹ Ka'apës mëpaat yë nmëtsip xytyukxoontä'äky, ka'ap mëpaat wyinmä'äktë mëti'ipës nëkookyëjxm xytsyip'ijxtëpën.

²⁰ Yë'ëjëty ka'ap t'ixta'atë jotkujk'ajtën, yi'iyë myääytyëp tyajtëp wi'ix yë myëku'uk t'ëxëëk tuntëtyën mëti'ipë oy juuky'ajtëpën ma nyaax kyajpnën.

²¹ Nëkooyë xynyi'ëwë'ëktës ets y'ëna'antë: Ix tii n'ëkjaak'ijxënëp.

²² Mijts Wintsën wa'ats xynyijawë. Këtii jëtu'unyë amonyë mwë'ëmy. Këtiis ni'ikyë xymyëjëkämke'eky.

²³ Pëtë'ëk Wintsën mëti'ipës nTios'ajtypyën, Nipaye'eykyës ets niwaantutkës.

²⁴ Wintsën mëti'ipës nTios'ajtypyën, tukwinmëtoowkës ja npoky, jëtu'un ijxtëm tëyajtën winë xynyipaye'eyën, këtii xykyupëkëty etsës pën xynyëxi'ik xytyukxi'ikëty.

²⁵ Këtii xykyupëkëty ets y'ëna'antëty: Jëtu'un yajtsoky jyatëty kyëpätëty. Këtii xykyupëkëty ets y'ëna'antëty: Tëë yajxon ëxëëk ntu'unëmë.

²⁶ Wä'än twë'ëmtë tsëtyu'unmëët ets wä'än tkumon tkutukëtë mëti'ipës xytyukxoontaktëpën koos n'ëyo'onpaaty; wä'än twë'ëmtë tsëtyu'unmëët mëti'ipë mëj këjxm näjya'awëtëpën këtiinëm ëjts.

²⁷ E mëti'ipë tsyojktëpën ets nmëta'akëtyës, wä'än txoonta'aktë ets y'ëna'antëty xëmë: Yë Wintsën mëj yë'ë ets tsyojkpy yë tyuunpë oy tsuj yajpaatëty.

²⁸ Nikajpxäämpy nimëtya'akäämpyës ko mijts mëtëy winë xynyipaye'ey; tu'kxëëwpaaty mijts nmëjpëjkta'akany.